Akwa Kuyula 20 - MUKANDA USANDU WA ZAMBI 1975

¹ Henaho A-Izalele eswe atuhukile, chize ku Ndane ndo ku Mbia-shipa hamwe ni chifuchi cha Ngiliate. Chikungulwila chakungulukile ngwe mutu limuwika kuli Yehova ku Mizepa.

² Yilolo a atu eswe, a minyachi yeswe ya Izalele asotokele mu chikungulwila cha atu a Zambi, kulakaji awana a tununu a akwa kwenda hashi, akwa tutana.

³ (Achi A-Mbenjamine hanevu ngwo, A-Izalele haswila ku Mizepa.) Mba A-Izalele ambile ngwo, Nutwambulwile kama, ungulungulu uno kuchi wapwile.

⁴ Mwe Ka-Levi, ukwete *konkubina yenyi amushihile, yakumbulula ngwenyi, Nejile ku Ngibia ya A-Mbenjamine, yami ni pwo liami tukapombeko.

⁵ Malunga a Ngibia yangukatukila, yanguseleka mu zuwo ha ufuku. Yamba angushihe yami, *konkubina yami yamuvulumiona chocho hafwa.

⁶ Ami nanjile *konkubina yami yingumuteta yipinji, yingumutuma ndusu chifuchi cheswe cha chihinga cha Izalele, mumu halinga luchisa ni uhulu mu Izalele.

⁷ Nyongenu, enu eswe A-Izalele nutwehe chiyulo chenu kuno.

⁸ Atu eswe yakatuka ngwe mutu umuwika ngwo, Niumwe hakachi ketu maya ku mbalaka yenyi, niumwe maya ku zuwo lienyi.

⁹ Alioze chino mutulinga kuli A-Ngibia, mutuya kulimika no nikulita ni chela.

¹⁰ Mutusakula kumi lia malunga hakachi ka kulakaji, a ku minyachi yeswe ya A-Izalele, ni kulakaji hakachi ka kanunu, ni kanunu hakachi ka kumi lia tununu akambachile atu kulia, mba muze meza akahase kufwetesa A-Ngibia a Mbenjamine ha mutonga wo weswe wa uhulu hanavulumuna mu Izalele.

¹¹ Chocho malunga eswe a Izalele aswile kulimika ni lie limbo, ni mbunge yimuwika ngwe mutu umuwika.

¹² Minyachi ya Izalele yatuma mikeji ku munyachi weswe wa Mbenjamine ngwo, Ungulungulu uno nwalinga hakachi kenu kuchi wapwa?

¹³ Kashika nehenu malunga aze amokomoko a mu Ngibia tukaashihe tukalichize uhenge mu Izalele. Alioze A-Mbenjamine katayile ku liji lia akwo A-Izalele.

¹⁴ A-Mbenjamine akatukile ku membo a Ngibia akaye hamuwika mukwasa jita ni A-Izalele.

¹⁵ A-Mbenjamine a mu membo jo tangwa lize aalwile makumi aali a tununu ni tununu asambano akwa tutana, helu lia A-Ngibia, o aalwile kulakaji shimbiali malunga a kusakula.

¹⁶ Hakachi ka wano eswe kali ni kulakaji shimbiali malunga a kusakula, akwa chipipa waze te anahase kukonga liwe ku lukambu keshi kulweza.

¹⁷ A-Izalele alwile kulakaji awana a tununu akwa tutana, helu lia A-Mbenjamine, wano eswe tujita.

¹⁸ A-Izalele yakatuka, yaya ku Mbetele akahule Zambi ngwo, Munyachi uka wa yetu muulianga ku jita ni A-Mbenjamine? Yehova yamba ngwenyi, A-Yunda mahanga.

¹⁹ Mba A-Izalele yakatuka chimene, yasa yilombo yo ya kulimika ni A-Ngibia.

²⁰ A-Izalele yatuhuka mukwasa jita ni A-Mbenjamine. A-Izalele yasa mikana ya jita kulimika no ku Ngibia.

²¹ A-Mbenjamine yatuhuka mu Ngibia, yalamba hashi tangwa lioliene malunga A-Izalele makumi aali a tununu ni tununu aali.

²² Alioze malunga a Izalele yahamuka, yasa mikana ya jita hazehene ayisele tangwa litangu.

²³ A-Izalele yakanduka, yalila kumeso ja Yehova ndo ngoloshi. Yahula Yehova ngwo, Tuye cheka nawa ku jita ni akwetu A-Mbenjamine nyi? Yehova yakumbulula ngwenyi, Yénu, nulimike no.

²⁴ Kashika A-Izalele yakundama mukwasa jita ni A-Mbenjamine tangwa liamuchiali.

²⁵ A-Mbenjamine yatuhuka mu Ngibia kulimika no tangwa liamuchiali. Yalamba hashi kumi lia tununu ni tununu nake a kuli A-Izalele, eswe akwa tutana.

²⁶ Mba A-Izalele eswe, e tujita eswe, yakanduka ku Mbetele mukulila. Yatwamako kumeso ja Yehova, ni kulia ka ndo ngoloshi. Yalambula milambu ya kulumba, ni milambu ya sambukila kumeso ja Yehova.

²⁷ A-Izalele yahula Yehova (mumu mushete wa usendo wa Zambi watwamineko ha matangwa aze,

²⁸ ni Finehase mwana wa Eleazare, mwana wa Arone wavumbikile kumeso jawo ha matangwa aze). Yahula Yehova ngwo, Tuye cheka nawa mukwasa jita ni akwetu A-Mbenjamine, nyi tulitwamine? Yehova yamba ngwenyi, Yénu, mumu hamene mungwakunjika mu moko jenu.

²⁹ Kashika A-Izalele yasa malunga kujikinyina kwa kujingilika Ngibia.

³⁰ A-Izalele yaya kulimika ni A-Mbenjamine tangwa liamuchitatu. Yalilonga kulimika ni Ngibia ngwe matangwa akwo.

³¹ A-Mbenjamine yatuhuka kulimika ni e atu, yaakoka kukatuka ku limbo, mba o yaputuka kulamba nikushiha amwe ngwe ha matangwa akwo, mu matapalo, limwe te linayi ku Mbetele, likwo ku Ngibia, ni hakachi ka chifuchi lume, ngwe makumi atatu a A-Izalele.

³² Chocho A-Mbenjamine yamba ngwo, Hitwaakumba ngwe hatangu. Alioze A-Izalele yamba ngwo, Tuchinenu, twakoke ku matapalo kusuku ni limbo.

³³ A-Izalele eswe yakatuka kuze te ali alilongele ku Mbale-Tamare, alioze A-Izalele akwa kujikinyina akatukile fuji kuze te ali ku Ngeba sali lia Chitokelo.

³⁴ Kwejile mukulimika ni Ngibia kumi lia tununu a malunga a kusakula kuli A-Izalele eswe. Jita yapwile ya tachi, alioze A-Mbenjamine kanyingikine ngwo, Lamba hiliatukundama.

³⁵ Yehova yapokwesa A-Mbenjamine kuli A-Izalele. A-Izalele yashiha tangwa lize makumi aali a tununu ni tununu atano ni kulakaji lia malunga A-Mbenjamine, eswe akwa tutana.

³⁶ Chocho A-Mbenjamine yamona ngwo, Hatukumba. A-Izalele achinyine A-Mbenjamine mumu afulielele akwa kujikinyina waze asele ku Ngibia.

³⁷ Akwa kujikinyina ejile fuji nikulundumukina ha Ngibia, chocho ayile nikushiha akwa chihunda eswe ni tutana.

³⁸ Chilayi alisele hakachi ka A-Izalele ni akwa kujikinyina ngwo, Muze matuhwisa lelwa linene lia mwishi mu limbo,

³⁹ mba A-Izalele alumuke mu jita. Achi A-Mbenjamine haputuka kushiha ngwe makumi atatu a A-Izalele, kashika yamba ngwo, Hitwaalamba hashi ngwe mu jita yitangu.

⁴⁰ Alioze muze chilayi chasoloka, mwishi unafwindangana ku limbo, A-Mbenjamine yatala kunyima, kumanyi limbo lieswe Unatuhwisa mwishi ndo kwilu.

⁴¹ Henaho A-Izalele yalumuka, mba A-Mbenjamine yevwa mwongo mumu yamona lamba hiliaakundama.

⁴² Kashika achinyine A-Izalele atalikise ku puya ahoze jita yaawana, chikwo nawa waze atuhukile mu membo aanongesene hakachi ko.

⁴³ Aselekele A-Mbenjamine nikwahanga, nikwaliata chize ku Noha ndo kuze kwatalangana ni Ngibia ha sali lia ku Chivumbuko.

⁴⁴ Kumi lia tununu ni tununu nake a A-Mbenjamine afwile; eswe yitakame.

⁴⁵ Atewulukile nikuchinyina ku puya ku luliwe lwa Rimone, kuze kwafwile tununu atano ku matapalo. Aahangile hindu ndo ku Ngidome kuze kwafwile tununu akwo aali.

⁴⁶ Kashika waze eswe A-Mbenjamine afwile tangwa Uze apwile makumi aali a tununu ni tununu atano a malunga akwa tutana, eswe yitakame.

⁴⁷ Alioze kulakaji asambano alumukine nikuchina ku puya ku luliwe Rimone. Kwenako atwamine ku luliwe Rimone tukweji awana.

⁴⁸ Mba A-Izalele ahilukile kulimika ni A-Mbenjamine nikwashiha ni tutana; malunga ni yimuna ni cheswacho awanyine. Membo jo eswe awanyine aochele ni kahia.