Akwa Kuyula 2 - MUKANDA USANDU WA ZAMBI 1975

¹ Mba mungelo wa Yehova yakatuka ku Ngilingali yaya ku Mbokimi. Yamba ngwenyi, Nanuchijile ku Engitu; yingunu-neha ku chifuchi chino nalakenyene ni shingo kuhana kuli tulamba twenu. Yingwamba ngwami, Chichi kutangula usendo hakachi ka yenu ni yami.

² Ni yenu kunuchi kukwata usendo ni akwa chifuchi chino. Munupuzula yilumbilo yo. Alioze kunwononokene ku shimbi jami. Chino nwalinga, chika?

³ Kashika haliapwila ngwami, Chichi kwahuma kumeso jenu alioze malumuka akwa kulimika ni yenu, ni mazambi jo mapwa makambwila kuli yenu.

⁴ Muze mungelo wa Yehova hamba maliji wano kuli A-Izalele eswe, alilile ni liji linene.

⁵ Kashika yaluka kuma kuze ngwo, Mbokimi. Kuze kwene nawa alumbilile Yehova milambu.

⁶ Muze Yoshua hamwanga e atu, A-Izalele ayile mutu ku chihinga chenyi mutu ku chihinga chenyi, akazuke chifuchi.

⁷ Atu alingilile Yehova matangwa eswe a Yoshua, ni matangwa eswe a makulwana aze Yoshua wahichikile, te waze hamona chitanga cheswe chinene Yehova halingila A-Izalele.

⁸ Yoshua mwana wa Nune kavumbi ka Yehova wafwile ni kulakaji Ha miaka ni miaka kumi

⁹ Yamufunda muchima lia njiza ya chihinga chenyi mu Timna-Here mu chifuchi cha Eframe ku milundu, ku sali Ha Norte lia mulundu wa Ngasha.

¹⁰ Chisemuko chize cheswe ayile kuli tulamba two; kwasemukine chisemuko chikwo kulutwe lio, cha waze kanyingikine Yehova chipwe chitanga chize halingila A-Izalele.

¹¹ A-Izalele alingile chipi kumeso ja Yehova nikuvumbika Ambale,

¹² nikwehuka Yehova, Zambi ya tulamba two yoze waachijile ku chifuchi cha Engitu. Akawile mazambi akwo hakachi ka mazambi a mavungu aajingilikile. Ahetamine kuli ayo nikwihia Yehova.

¹³ Ehukile Yehova nikuvumbika Ambale ni Asatarote.

¹⁴ Kashika utenu wa Yehova wakasumukine hali A-Izalele; waakunjikile kuli akwa kupupa, akaapupe. Yaalanjisa ku tachi ja akwa kole jo ha kwajingilika, chocho kahashile kulimika nawa ni akwa kole jo.

¹⁵ Kweswako ayile kwoko lia Yehova lialimikine no nikwanehena chipi, chizechene ngwe Yehova haatoweza; chizechene ngwe Yehova halishinga no. Chocho apinjile.

¹⁶ Henaho Yehova waahele akwa kwayula a kwalamwina ku tachi ja akwa kwapupa.

¹⁷ Hindu kapanjikile kuli akwa kuyula jo mumu alingile ukoi ha kukaula mazambi akwo nikuhetama kuli ayo. Nikawashi ahambulukile mu jila yize tulamba two endelele, waze ononokene ku shimbi ja Yehova. O kononokene.

¹⁸ Muze Yehova waahele mukwa kwayula, Yehova wapwile hamwe ni mwe mukwa kwayula, nikwalamwina ku kwoko Ha akwa kole jo matangwa eswe a mwe mukwa kwayula, mumu chavwishile Yehova keke kwivwa mikuma yize atwile mumu hali waze aapinjishile nikwahungumiona.

¹⁹ Alioze muze mwe mukwa kuyula hafwa o ahilukile munyima nikulinga chipi kuhiana chize alingile atato. Akawile mazambi akwo, nikwalingila, nikuhetama kuli ayo. Kambilile nijimwe ja ndako jo hanji ja pami jo.

²⁰ Kashika utenu wa Yehova wakasumukine hali A-Izalele. Yamba ngwenyi, Mumu wano atu hatangula usendo wami uze natumine tulamba two, chipwe liji liami kaliononokenene,

²¹ kashika mavungu aze Yoshua wahichikile muze wafwile chichi kwahuma kumeso jo,

²² hanga ngukeseke A-Izalele kuli ayo kumona nyi matala kanawa kwenda mu jila ya Yehova ngwe tulamba two endele, nyi ka.

²³ Kashika Yehova wahichikile mavungu aze. Kaahumine mwaka uze; kaakunjikile ku tachi ja Yoshua.