Akwa Kuyula 19 - MUKANDA USANDU WA ZAMBI 1975

¹ Ha matangwa aze, shimbu te mwanangana wakuhi mu Izalele umwe Ka-Levi Watwamine mu chifuchi chisuku cha ku milundu ya Eframe. Iye watambwile umwe *konkubina ya ku Mbeteleme-Yunda.

² Alioze *konkubina yenyi wamuvulumwine ha kulinga utanji, yamuchina, yaya ku zuwo lia tato ku Mbeteleme-Yunda, yatwamako amwe tukweji awana.

³ Kulutwe lunga lienyi wamukawile, akahanjike nenyi ni vumbi amunehe ku zuwo. Yatwala hamwe nenyi umwe ngamba yenyi ni yimbulu aali. Yaheta ku zuwo lia tato-weno mba muze iye yamumona yatuhuka kumupatwiza ni uwahililo.

⁴ Tato-weno, tato ya mukwo-pwo, yamukwika, kashika yatwama nenyi matangwa atatu. Chocho atwamine nikulia nikunwa.

⁵ Ha tangwa liamuchiwana alimenekene, yakasakasa hanga aye. Alioze tato ya pwo yamba kuli tato-weno ngwenyi, Takamisa mbunge ye ni kakulia, mba kulutwe muoya.

⁶ Kashika e malunga aali yatwama, yalia, yanwa hamuwika. Mba tato ya pwo yamba kuli mwe lunga ngwenyi, Pomba kama musono, mbunge ye yikawahe.

⁷ Muze lunga hakatuka aye, tato-weno yamulembejeka ndo yapomba nawa.

⁸ Ha tangwa liamuchitano yalimeneka aye, alioze tato ya pwo yamba ngwenyi, Takamisa mbunge ye Utwame ndo tangwa hiliendala. Chocho alile eswe aali.

⁹ Mba muze lunga ni *konkubina yenyi ni ngamba yenyi akatukile aye, tato-weno, tato ya pwo yamba kuli iye ngwenyi, Tala tangwa, hikwapwa chingoloshi, pomba musono. Tala tangwa hiliaya kulu, pomba kuno, mbunge ye yikawahe mba hamene mulimeneka ha wenyi wenu nukaye ku mahienu.

¹⁰ Alioze lunga kasolo kupomba ufuku, yakatuka, yaya, yaheta kwakutalangana ni Yepushe (likwo Yerusaleme). Kali ni yimbulu aali ni yitwamo yaho, ni *konkubina yenyi nawa.

¹¹ Muze haheta hakamwihi ni Yepushe tangwa hiliaya, mba mwe ngamba yamba kuli mwata wenyi ngwenyi, Tuye tujinge ku limbo lino lia A-Yepushe tupombeko.

¹² Alioze mwata wenyi yamba ngwenyi, Kutuchi kunjila mu chihunda cha tundaka waze kapwile A-Izalele, mutuhiana tuye ku Ngibia.

¹³ Yamba kuli ngamba yenyi ngwenyi, Tuye tukundame ku chihunda chimwe cha kuno, tupombe, hanji ku Ngibia hanji ku Rama.

¹⁴ Kashika yahiana mu jila yo mba tangwa liaanjilila hakamwihi ni Ngibia limbo lia A-Mbenjamine.

¹⁵ Chocho ajingileko, anjilemo, apombe mu Ngibia. Yaya yatwama mu chota cha limbo, mumu niumwe kaatambwile mu zuwo lienyi apombe ufuku.

¹⁶ Kumanyi umwe mukulwana wa lunga te kanakatuka ku milimo yenyi ha chingoloshi, iye wa ku chifuchi cha Eframe ku milundu, hatunga mu Ngibia; enyembo o A-Mbenjamine.

¹⁷ Iye yatala, yamona ngeji mu chota cha limbo, mba mwe mukulwana yamba ngwenyi, Kuli unayi? Kuli unakatuka?

¹⁸ Yamukumbulula ngwenyi, Tunakatuka ku Mbeteleme-Yunda, tunayi kusuku kwe ku chifuchi cha Eframe ku milundu, kwe ku mahietu. Nayile ku Mbeteleme-Yunda, haliapwila ngunayi ku mahietu alioze niumwe kangutambwile mu zuwo lienyi.

¹⁹ Mwambu ni kulia cha yimbulu tuli nayo, ni mbolo ni vinyu tuli nayo ya yami ni mwe pwo kavumbi kenu, ni ya mukweze hamwe ni ngamba jenu; kutwahonene nichimwe.

²⁰ Mukulwana yamba ngwenyi, Hwima mbunge, cheswacho munuzanga, cha yami mwene, alioze kanda nupomba mu chota.

²¹ Chocho yamutambula mu zuwo lienyi, yahana kulia kuli yimbulu. E atu asanyine ku molu chocho yalia, yanwa.

²² Shimbu machiwahisa mbunge jo malunga a chihunda, atu amokomoko, aselekele zuwo nikungongwela ha pito nikwamba kuli mukulwana, mwata wa zuwo, ngwo, Lunga yoze wezanga ku zuwo lie, mutuhwise haze tukapombe nenyi.

²³ Lunga, mwe mwata wa zuwo yatuhuka, yamba kuli ayo ngwenyi, Hi chocho ko akwetu, kanda nulinga ungulungulu upwa haha. Se hanjila mu zuwo liami kanda nulinga chuma chino chipi.

²⁴ Tuli ni mwanami wa pwo kanda achilimona ni lunga, ni *konkubina ya mwe ngeji. Mungwaneha haliapwila. Pombenu no, nukaalinge cheswacho chanupemena alioze kuli lunga kanda nulinga chuma chino chipi.

²⁵ Alioze e malunga kamupanjikile, kashika lunga wakwachile *konkubina yenyi, yamutuhwisa kuli ayo, o yapombapomba nenyi, nikumupinjisa ufuku weswe ndo chimene. Muze hikwaputuka kupatwoka amwechele.

²⁶ Ha kuvumbuka tangwa, pwo yeza, yalimbukila ku chikolo cha zuwo lia lunga muze mwatwama mwata wenyi, ndo hikwacha.

²⁷ Muze mwata wenyi hahinduka chimene, yazulula mapito a zuwo akaye jila yenyi, kumanyi *konkubina yenyi kanapombo ku chikolo cha zuwo, moko jenyi anakwata ku chikuli.

²⁸ Yamba kuli iye ngwenyi, Katuka tuye. Alioze kumbululo kulishiko. Kashika yamusa ha chimbulu chenyi, yakatuka, yaya ku mahio.

²⁹ Muze haheta ku zuwo lienyi yanda poko, yakwata *konkubina yenyi, yamutetateta ni moko ni molu mu kumi lia yihanda ni yihanda yiali, yayihana ndusu chifuchi cheswe cha Izalele.

³⁰ Waze eswe achimwene ambile ngwo, Chuma chino kanda chipwa, chipwe kuchimona chize ku tangwa lize A-Izalele akatukile ku Engitu ndo musono. Kashika nyongenu, nutwame punga, nuhanjike.