Akwa Kuyula 17 - MUKANDA USANDU WA ZAMBI 1975

¹ Kwapwile umwe lunga wa ku chifuchi cha Eframe ku milundu, jina lienyi Mika.

² Iye yamba kuli naye ngwenyi, Mbongo jize ja prata kumi lia kulakaji ni kulakaji umuwika akwiyile mba walishingile mwe mu matwi jami, tala, kuli yami jili. Yami najitambwile. Naye yamba ngwenyi, Yehova akuwahise mwanami.

³ Iye yahilwisa mbongo jize ja prata kuli naye, kumi lia kulakaji ni kulakaji umuwika. Mba naye yamba ngwenyi, Mbongo jino ja ku kwoko lia mwanami ngunajitumbikila kuli Yehova akalinge kaponya wa kwola ni kaponya Wa kuzuzulula; kashika haliapwila mungukuhilwisajo.

⁴ Chocho muze iye hahilwisa mbongo kuli naye, naye yanda kulakaji aali a mbongo ja prata yajihana kuli tuli. Iye walingile kaponya wa kwola ni kaponya wa kuzuzulula, yaasa mu zuwo lia Mika.

⁵ Mwe lunga Mika wapwile ni zuwo lia tuponya, kashika yalinga efode ni terafimi, yasela umwe mwanenyi akapwe sasendote yenyi.

⁶ Matangwa aze te mwanangana wakuhi mu Izalele, mutu mweswe walingile chize chamupemenene mu meso jenyi mwene.

⁷ Kwapwile umwe mukweze wa ku Mbeteleme-Yunda wa munyachi wa Yunda, iye te Ka-Levi watwamine hakachi ko.

⁸ Mwe mukweze wakatukile ku chihunda cha Mbeteleme-Yunda akatwame kweswako mawana chihela. Ha kwenda wejile ku chifuchi cha Eframe ku milundu ku zuwo lia Mika.

⁹ Mika yamuhula ngwenyi, Kuli unakatuka? Iye yamukumbulula ngwenyi, Nguli Ka-Levi wa ku Mbeteleme-Yunda. Ngunayi mukutwama kweswako munguwana chihela.

¹⁰ Mika yamba kuli iye ngwenyi, Twama ni yami, ukapwe kuli yami uli tata, kanda uli sasendote mba mungukufweta kumi lia mbongo ja prata ha mwaka, ni uzalo, ni kulia che.

¹¹ Chocho chapemenene Ka-Levi kutwama ni Mika, yalumuka kuli iye ngwe umwe hakachi ka ana jenyi a malunga.

¹² Mika yasela mwe Ka-Levi usasendote mba mukweze wapwile sasendote yenyi, yatwama mu zuwo lia Mika.

¹³ Kashika Mika wambile ngwenyi, Haliapwila ngunanyingika Yehova manguwahisa mumu Ka-Levi nguli nenyi sasendote yami.