Akwa Kuyula 16 - MUKANDA USANDU WA ZAMBI 1975

¹ Samasone yaya ku Ngeza, yamonako umwe chikoi, yanjila kuli iye.

² A-Ngeza hevwa ngwo, Samasone heza, kashika aselekeleko nikumujikinyina ufuku weswe ku chikolo cha limbo. Aholele ufuku weswe, ngwo, Mutumutwaminyina ndo hikwacha chimene, mba mutumushiha.

³ Alioze Samasone wapombele ndo ha muchima ufuku, mba ha muchima ufuku yahinduka, yakwata ku mapito a chikolo cha limbo hamuwika ni ye yikuli yiali, yayisokola hamuwika ni njalo yako, yayisa ha chipaya chenyi yayitwala helu lia mulundu uli kulutwe lia Heprone.

⁴ Mba kulutwe wazangile umwe pwo wa mu chikulo cha Soreke, jina lienyi Ndelila.

⁵ Miata ja A-Filistea ejile kuli iye ngwo, Umulembejeke unyingike kuze kwatwama tachi jenyi jinene, ni chize mutuhasa kumukumba, tumukase nikumuhombwesa, mba mweswe wa kuli yetu mutukwaha kumi lia kulakaji ni kulakaji umuwika wa mbongo ja prata.

⁶ Kashika Ndelila yamba kuli Samasone ngwenyi, Ungulweze kama kuze kwatwama tachi je jinene, ni chize mutu mahasa kukukasa akakuhombwese.

⁷ Samasone yamba kuli iye ngwenyi, Nyi mangukasa ni kusa shimbiali jaha jize kanda juma mba mungwalumuka mulelu, mungupwa ngwe malungani-akwetu.

⁸ Mba miata ja A-Filistea Yamunehena kusa shimbiali jaha, kanda juma. Pwo yamukasa najo.

⁹ Iye te kali ni malunga akwa kujikinyina mu chipatulo cha muchima. Yamba ngwenyi, Samasone, A-Filistea hakuwana! Alioze Samasone yapatula kusa ngwe wanda wamokomoko muupatuka muze kahia mukakwatako. Chocho chijimbikilo cha tachi jenyi kachinyingikine.

¹⁰ Ndelila yamba kuli Samasone ngwenyi, Tala wangulenyene ni mahuza. Ungulweze kama chize mahasa kukukasa.

¹¹ Iye yamukumbulula ngwenyi, Nyi mangukasa ni mihipu yaha, yize kanda alinga nayo milimo, mba mungwalumuka mulelu, mungupwa ngwe malunga-ni-akwetu.

¹² Kashika Ndelila yanda mihipu yaha, yamukasa nayo, yamba ngwenyi, Samasone, A-Filistea hakuwana! Akwa kujikinyina te mu chipatulo cha muchima ali. Alioze iye yapatula mihipu ha moko jenyi ngwe kawanda.

¹³ Ndelila yamba kuli Samasone ngwenyi, Ndo haliapwila wangulenyene ni mahuza. Ungulweze chize mahasa kukukasa. Samasone yamba kuli iye ngwenyi, Nyi museleka yimbonge shimbiali ya kambu jami hamuwika ni mbandwola nikujijika ni lumbambo, mba mungwalumuka mulelu, mungupwa ngwe malunga-ni-akwetu.

¹⁴ Iye chocho yajijika ni lumbambo, mba yamba ngwenyi, Samasone, A-Filistea hakuwana! Alioze Samasone yalaula, yazula lumbambo wa mutute hamwe ni mbandwola.

¹⁵ Pwo yamba ngwenyi, Kuchi muhasa kwamba ngwe, Ngunakuzange, alioze mbunge ye kuli yami kuyishiko? Hiwangulenya yisuho yino yitatu: kwangulwezele kuze kwatwama tachi je jinene.

¹⁶ Mba muze hamuketeka ni maliji jenyi tangwa ha tangwa nikumuhalumwisa iye wevwile kupiha ngwe kufwa mu mbunge yenyi.

¹⁷ Yamulumbunwina mbunge yenyi yeswe ngwenyi, Kangutewile mutwe wami nilimwe tangwa mumu nguli Kanazireu kuli Zambi chize ku jimo lia mama. Nyi mangutewula tachi jami mujingukatuka, mungwalumuka mulelu, mungupwa ngwe malunga-ni-akwetu.

¹⁸ Muze Ndelila wamwene ngwenyi, Hangulweza mbunge yenyi yeswe, yatuma kusaka miata ja A-Filistea ngwenyi, Tweyenu chisuho chino chene mumu hangulweza mbunge yenyi yeswe. Chocho miata ja A-Filistea ejile nikuneha mbongo mu moko jo.

¹⁹ Pwo yamupombesa tulo ha molu jenyi, yasanyika umwe lunga yamutewula yimbonge yenyi shimbiali ya kambu. Mba yaputuka kumupinjisa, chocho tachi jenyi jamukatuka.

²⁰ Pwo yamba ngwenyi, Samasone, A-Filistea hakuwana! Mba iye yalaula ha tulo, yamba ngwenyi, Mungutuhuka ngwe matangwa akwo nikulisakumwinayo. Alioze kanyingikine ngwenyi, Yehova hanangukatuka.

²¹ A-Filistea amukwachile, yamutombongona meso jenyi, yamutwala ku Ngeza, yamukasa ni kúli ja unengu, watwile wunga mu utwilo wa zuwo lia ususu.

²² Alioze kambu ja ha mutwe jize amutewilejo japutukile kusokoloka nawa.

²³ Mba miata ja A-Filistea akungulukile mukulambula chitapo chinene kuli zambi yo Ndagone nikuwahilila, mumu ambile ngwo, Zambi yetu hanakunjika mukwa kole yetu Samasone mu moko jetu.

²⁴ Muze atu amumwene achichimiekene zambi yo mumu ambile ngwo, Zambi yetu hanakunjika mu moko jetu mukwa kole yetu yoze wapupile chifuchi chetu nikushiha akwetu anji.

²⁵ Muze mbunge jo jawahililile ambile ngwo, Sanyikenu Samasone ahehe kumeso jetu. Chocho asanyikine Samasone ku zuwo lia ususu mba ahehele kumeso jo. Amumanyishine hakachi ka manguji,

²⁶ kashika Samasone yamba kuli mukweze wamukwachile ku kwoko ngwenyi, Ngukwate kama ku manguji a kukolesa zuwo ngushachileko.

²⁷ Zuwo liazalile tò ni malunga ni mapwo. Miata eswe a A-Filistea apwileko; ha fulumba hatwamine ngwe tununu atatu a malunga ni mapwo waze atalile kuheha cha Samasone.

²⁸ Henaho Samasone watambikile kuli Yehova ngwenyi, Mwene Yehova ungwiwuluke kama ungutakamise kama kano kamuwika, Zambi, hanga ngufwetese A-Filistea ha meso jami aali.

²⁹ Chocho Samasone yakwata manguji aali a hakachi, aze akolesele lie zuwo. Yasaho tachi jenyi, nguji limwe ku kwoko lienyi lia chindume, likwo ku kwoko lienyi lia chimeso.

³⁰ Yamba ngwenyi, Ngufwe hamwe ni A-Filistea. Chocho yahetama ni tachi jenyi jeswe, mba zuwo liapuzukile hali miata ni atu aze eswe apwilemo. Kashika afu aze ashihile mu kufwa chenyi ahianyine aze ashihile mu mwono wenyi.

³¹ Mba ayayo ni ana-akwo ni atu jenyi eswe yeza, yamwanda, yamuneha nikumufunda hakachi ka Zora ni Esheteole mu fuka lia tato Manoa. Te hayula A-Izalele makumi aali a miaka.