Akwa Kuyula 15 - MUKANDA USANDU WA ZAMBI 1975

¹ Kulutwe lia kashimbu te ha mwaka wa kucha tiliku, Samasone wayile mukunangisa mukwo-pwo nikumutwalila mwana-pembe. Ngwenyi, Mungunjila kuli mukwetu-pwo ndo mu chipatulo chenyi. Alioze tato wamukanjishile kunjila.

² Tato ngwenyi, Namwene ngwe unamunu pundu, chocho namuhana kuli sepa lie. Mwanakwo te kamuhianyine kupema, nyi? Mutambule iye, amusalakane.

³ Samasone yamba kuli ayo ngwenyi, Musono mungusamba ha kulinga chipi kuli A-Filistea.

⁴ Kashika Samasone yaya, yakwata kulakaji atatu a mikuza, yanda nawa masoka. Yaalumuna muchila ku muchila, muchila ku muchila, yasa soka mukachi ka michila yiali, soka mukachi ka michila yiali.

⁵ Muze te hawika e masoka, yatusula mikuza aye mu tiliku ya A-Filistea yize kuyishi kuteta. Yocha yichita ya tiliku ni tiliku yize kuyishi kuteta, ni minda ya uva ni ya olevwe nawa.

⁶ A-Filistea yamba ngwo, Iya halinga chino? Ngwo, Samasone, tato-weno wa Ka-Timna, mumu iye, wahanyine mukwo-pwo kuli sepa lienyi. Kashika A-Filistea yeza, yocha pwo ni tato ni kahia.

⁷ Samasone yamba kuli ayo ngwenyi, Nyi chocho nwakulinga, chamwenemwene mungukala mulonga wenu, mba mungulitwamina.

⁸ Yaalamba liakulu nikushiha anji. Mba wapalumukine, watwamine mu chivwenge cha luliwe lwa Etame.

⁹ Hohene A-Filistea yakanduka, yasa chilombo cho mu Yunda, yasa jita ni akwa Lehi.

¹⁰ A-Yunda ngwo, Kuchi te nuneza mukulimika ni yetu? Ngwo, Hitweza hanga tukakase Samasone, tumulinge ngwe chize hatulinga yetu.

¹¹ Mba tununu atatu a malunga a Yunda apalumukine ku chivwenge cha luliwe lwa Etame, yamba kuli Samasone ngwo, Mala, kwanyingikine, A-Filistea kapwa akwa kuyula kuli yetu? Chino unatulingi chika? Iye ngwenyi, Chizechene ngwe o anakangulinga, chocho ngunaalingi.

¹² Yamba kuli iye ngwo, Hituneza mukukukasa, tukakukunjike mu moko ja A-Filistea. Samasone yamba kuli ayo ngwenyi, Lakenyenu kuli yami ni shingo ngwenu, Yetwene kutuchi kukushiha.

¹³ O yamba kuli iye ngwo, Mwomwene. Chino wika, mutukukasa, tukakukunjike mu moko jo. Kutuchi kukushiha. Kashika yamukasa ni mihipu yiali yaha, yamuchiza ku liwe, yamukandwisa.

¹⁴ Muze te haheta ku Lehi, A-Filistea yeza mukumupatwiza nikulikwiza. Spiritu ya Yehova yahulumukina hali iye ni tachi, chocho mihipu ya ku moko jenyi yiyalumuká ngwe wanda wa linyu uze hiwawema mu kahia, yize yakumukasa yiyisangunuka ku moko jenyi.

¹⁵ Yawana lumbangachi mwaha wa chimbulu, yazoza kwoko, yamwanda, yashiha nenyi kanunu ka malunga.

¹⁶ Samasone yamba ngwenyi, Milumba ha milumba Ni lumbangachi wa chimbulu, Hinashiha kanunu ka malunga Ni lumbangachi wa chimbulu.

¹⁷ Muze halitwamina kuhanjika, yambila mwe lumbangachi. Jina lia homa haze ngwo, Ramate-Lehi.

¹⁸ Pwila yinji evwile, kashika yateta kuli Yehova, ngwenyi, Ulamwino uno unene unahana ku kwoko lia yami kanganda ke, mba haliapwila ngufwe ni pwila, wano yilima akangukwate nyi?

¹⁹ Zambi yapula mungutanga kuze ku Lehi, meya yatuhukamo. Samasone muze hanwa yahuzuluka, yevwa tachi. Kashika jina liako ngwo, Ene-Hakore, kwe ku Lehi kukuli ndo musono.

²⁰ Samasone wayulile A-Izalele makumi aali a miaka ha matangwa a A-Filistea.