Akwa Kuyula 14 - MUKANDA USANDU WA ZAMBI 1975

¹ Samasone wapalumukine ku Timna, kwenako amwene umwe pwo, mwana wa A-Filistea.

² Muze hakanduka nawa wambulwilile tato ni naye ngwenyi, Hinamona umwe pwo mwana wa A-Filistea ku Timna, kashika ngutendeleye akapwe pwo liami.

³ Alioze tato ni naye amwambile ngwo, Te kukushi pwo niumwe hakachi ka ana ja usoko we, hanji hakachi ka atu jetu eswe, kashika Chakutamba kuya kufupa pwo kuli wano yilima ja A-Filistea, nyi? Hindu Samasone wambile kuli tato ngwenyi, Ngutambwileye mumu kanangupemena kanawa.

⁴ Tato ni naye kanyingikine ngwo, Chuma chino chinakatuka kuli Yehova, mumu iye te kanafupu unjililo kuli A-Filistea. Ha mwaka uze A-Filistea te kanayulu A-Izalele.

⁵ Chocho Samasone wapalumukine ku Timna hamwe ni tato ni naye. Yaheta ku minda ya uva ya Timna, kumanyi mwevu wa ndumba wamuhanjikilile.

⁶ Spiritu ya Yehova yahulumukina hali Samasone ni tachi, yapapulula mwe ndumba hakachi ngwe akupapulula mwana-pembe, ni moko jenyi amokomoko. Alioze kalwezele kuli tato ni naye chize halinga.

⁷ Mba yapalumuka, yahanjika ni mwe pwo, iye yamuwahila chikolo.

⁸ Kulutwe wejile kumumbata mba yajinga kumona mujimba wa ndumba. Kumanyi mwapwile mu mujimba wa ndumba Chizaji cha puka ni wuchi.

⁹ Yachiza wuchi ni moko jenyi; yaya nikulia mu jita. Muze wahetele kuli tato ni naye yahana umwe wuchi kuli ayo nawa, no alile. Alioze kaalwezele chize hachiza wuchi mu mujimba wa ndumba.

¹⁰ Tato yapalumuka kuli mwe pwo mba Samasone walingileko muzumbu, mumu akweze chocho alingile miaka yize.

¹¹ Muze atu amumwene amunehenene makumi atatu a masepa akapwe nenyi.

¹² Samasone yamba kuli ayo ngwenyi, Mungunwaha chijimbikilo haliapwila, nyi munuhasa kungwambulwilacho mu matangwa wano shimbiali a muzumbu nikungulumbunwinacho, mungunufweta makumi atatu a mazalo a linyu, ni makumi atatu a mahina a kuzala nawa.

¹³ Alioze nyi kunwahashile kungulumbunwinacho mba yenu munungufweta makumi atatu a mazalo a linyu ni makumi atatu a mahina a kuzala nawa. O ambile ngwo, Twehenu chijimbikilo che tuchivwe,

¹⁴ Iye yamba kuli ayo ngwenyi, Muli mukwa kulia mwatuhukile yakulia. Muli mukwa ndundo mwatuhukile ya kuyema. Ha matangwa atatu kahashile kulumbununa chijimbikilo.

¹⁵ Ha tangwa liamuchiwana o yamba kuli pwo lia Samasone ngwo, Lembejeka mukwenu-lunga atulweze chijimbikilo chino, nyi ka mutunwocha ni kahia, ni yena ni akwa zuwo lia tatenu. Watulakenyene kuno kutuneha ku uswale nyi?

¹⁶ Pwo lia Samasone Walilile kumeso jenyi ngwenyi, Kole wanguvwila; kwanguzangile. Hiwahana chijimbikilo kuli akwa chifuchi chami alioze kwangulwezelecho. Iye yamukumbulula ngwenyi, Chipwe tata ni mama chaalwezele mba mungukulweza yena?

¹⁷ Pwo Walilile kumeso jenyi matangwa eswe shimbiali a muzumbu, mba ha tangwa liamuchishimbiali wamulwezele mumu kanamuketeka chikolo. Pwo yaya, yalweza chijimbikilo kuli akwa chifuchi chenyi.

¹⁸ Mba malunga a chihunda ambile kuli iye ha tangwa liamuchishimbiali shimbu tangwa kanda Unjila ngwo, Chimwe chayema kuhiana wuchi nyi? Hanji kwali umwe Wahiana tachi ja ndumba? Mba iye yakumbulula ngwenyi, Nyi kachi kunwalimine ni ngombe yami Kachi chijimbikilo chami kunwachihashile.

¹⁹ Spiritu ya Yehova yahulumukina hali iye ni tachi. Yapalumuka ku Asekalone; yashiha makumi atatu a malunga a ku chihunda; yapupa upite wo; yahana mazalo kuli waze ajimbwile chijimbikilo. Yaya ku zuwo lia tato ni ufwatulo wunji.

²⁰ Pwo lia Samasone ahanyine kuli mukwo, yoze wapwile Sepa lienyi.