Akwa Kuyula 13 - MUKANDA USANDU WA ZAMBI 1975

¹ A-Izalele alingile chipi cheka nawa kumeso ja Yehova, kashika Yehova waakunjikile mu moko ja A-Filistea makumi awana a miaka.

² Kwapwile umwe lunga wa ku Zora, wa ku munyachi wa A-Ndane, jina lienyi Manoa. Pwo lienyi mumba, kasemene ana.

³ Mungelo wa Yehova yasoloka kuli mwe pwo, yamba kuli iye ngwenyi, Uli mumba; ana kushi no, alioze kumukapwa ni ufumba, kumukasema mwana wa lunga.

⁴ Kashika ukanyame, kanda ukanwa vinyu hanji kunwa chisasu. Kanda ukalia yuma ya luchisa,

⁵ mumu kumukapwa ni ufumba, kumukasema mwana wa lunga. Kanda ukasa tewula ku mutwe wenyi mumu mwana-lunga yono kumakapwa Kanazireu kuli Zambi chize ku kusemuka chenyi. Iye kumakaputuka kupulula A-Izalele ku moko ja A-Filistea.

⁶ Mwe pwo yeza, yalweza mukwo-lunga ngwenyi, Umwe mutu wa Zambi kezanga kuli yami. Ku meso jenyi kwapwanga ngwe meso ja mungelo wa Zambi—kole ni woma. Chamuhulile kuze akatuka, neye kangulwezele jina lienyi.

⁷ Alioze yamba kuli yami ngwenyi, Kumukapwa ni ufumba. Kumukasema mwana wa lunga, kashika kanda ukanwa vinyu hanji kunwa chisasu. Chikwo nawa kanda ukalia yuma ya luchisa mumu mwe mwana-lunga kumakapwa Kanazireu kuli Zambi chize ku kusemuka chenyi ndo ku tangwa lia kufwa chenyi.

⁸ Mba Manoa walembele kuli Yehova ngwenyi, Mwene, ngunalembe, mutu wa Zambi yoze watumine eze nawa kuli yetu atulongese chize chatutamba kulinga ni mwana-lunga yono meza kusemuka.

⁹ Zambi wapanjikile ku liji lia Manoa. Mungelo wa Zambi wejile cheka nawa kuli mwe pwo shimbu te kanatwama mu munda. Alioze mukwo-lunga Manoa keshiko.

¹⁰ Pwo yazomboka kapupushi, yalweza mukwo-lunga ngwenyi, Lunga yoze wejile kuli yami tangwa likwo mba hasoloka kuli yami cheka nawa.

¹¹ Manoa yakatuka, yakaula mukwo-pwo yaheta kuli lunga, yamba kuli iye ngwenyi, Lunga yoze wasolokele kuli pwo, yena nyi? Iye yakumbulula ngwenyi, Yami.

¹² Manoa yamba ngwenyi, Muze maliji je meza kumanunuka, kuchi chatamba mwe mwana-lunga kupwa? Yika malinga?

¹³ Mungelo wa Yehova yamba kuli Manoa ngwenyi, Yuma yeswe nambile kuli pwo, akayifunge kanawa.

¹⁴ Kuchamutambile kulia chuma chinakatuka ku mutondo wa uva. Kanda akanwa vinyu, hanji kunwa chisasu. Kanda akalia yuma ya luchisa. Akafunge shimbi jami jeswe.

¹⁵ Manoa yamba kuli mungelo wa Yehova ngwenyi, Tutayize tukukwike shimbu mutu-kushihila mwana-pembe.

¹⁶ Mungelo wa Yehova yamba kuli Manoa ngwenyi, Nyi munungukwika hindu chichi kutambula kulia chenu, alioze nyi munululika mulambu wa kulumba hilumbenuwo kuli Yehova. (Te Manoa kanyingikine ngwenyi, Mungelo wa Yehova.)

¹⁷ Manoa yamba kuli mungelo wa Yehova ngwenyi, Jina lie iya? Mba muze maliji je makamanunuka tukakulemese.

¹⁸ Mungelo wa Yehova yamba kuli iye ngwenyi, Kuchi te muhula jina liami se liapwa chikomokeso?

¹⁹ Kashika Manoa yanda mwana-pembe hamwe ni mulambu wa wunga. Yautambula ha liwe kuli Yehova. Mungelo walingile chipupu shimbu Manoa ni pwo lienyi machitala.

²⁰ Mba shimbu mulengi wakatukile ha chilumbilo nikuya kwilu mungelo wa Yehova wakandukile mwilu mwe mu mulengi wa ha chilumbilo kumeso ja Manoa ni mukwo-pwo. O yafulamana hashi ha meso jo.

²¹ Mungelo wa Yehova kasolokele nawa kuli Manoa ni mukwo-pwo. Kashika Manoa anyingikine ngwo, Mungelo wa Yehova.

²² Manoa yamba kuli mukwo-pwo ngwenyi, Kumutufwa, mumu hitwamona Zambi.

²³ Alioze mukwo-pwo yamba kuli iye ngwenyi, Nyi Yehova kapwanga ni mbunge ya kutushiha kachi hatambula ku moko jetu mulambu wa kulumba ni mulambu wa wunga? Kachi hatulweza yuma yino yeswe, nikutwambulwila yuma yipwa haha nyi?

²⁴ Mba mwe pwo yasema mwana. Yamuluka jina lienyi Samasone. Mwana-lunga watatukile mba Yehova Wamuwahishile.

²⁵ Spiritu ya Yehova waputukile kumusunga mu Mahane-Ndane hakachi ka Zora ni Esheteole.