Akwa Kuyula 12 - MUKANDA USANDU WA ZAMBI 1975

¹ Malunga a Eframe akungulukile ku jita, yazauka ku Zafone, yamba kuli Jefeta ngwo, Kuchi te wazaukile mukwasa jita ni A-Amone, kwatusanyikine tukaye hamuwika? Mutukwocha zuwo lie.

² Jefeta yamba kuli ayo ngwenyi, Yami ni atu jami twalimikine chinji ni A-Amone, alioze muze nanusanyikine kunwejile kutupulula ku moko jo.

³ Kashika muze namwene ngwami kunuchi kungupulula, nalisele mu Utoji, nazaukile kuli A-Amone, mba Yehova waakunjikile mu moko jami. Mba kuchi te nuneza kuli yami musono mukwasa jita ni yami?

⁴ Hohene Jefeta yakungulula malunga eswe a Ngiliate, yasa jita ni A-Eframe. A-Ngiliate yakumba A-Eframe, mumu o hamba ngwo, Enu A-Ngiliate nuli akwa kuchina a kuli A-Eframe, hinwaswama hakachi ka A-Eframe ni A-Manase.

⁵ A-Ngiliate atambwile yau ya ha mwa ya Yordau nikuyifunga kuchina A-Eframe mapalika. Muze Ka-Eframe mweswawo wambile ngwenyi, Ngupalike kama, A-Ngiliate ambile kuli iye ngwo, Uli Ka-Eframe? Nyi iye mamba ngwenyi, Ka,

⁶ mba o mamba ngwo, Amba ngwe, Shibolete. Iye makumbulula ngwenyi, Sibolete mumu kahashile kuchamba kanawa. Chocho amukwachile nikumushiha kwe ku yau ya Yordau. Ha matangwa aze afwile makumi awana a tununu ni tununu aali a A-Eframe.

⁷ Jefeta Ka-Ngiliate wayulile A-Izalele miaka yisambano, mba yafwa, yamufunda mu chihunda chenyi mu Ngiliate.

⁸ Ibzane Ka-Mbeteleme wamukawile nikuyula A-Izalele.

⁹ Iye wapwile ni makumi atatu a ana a malunga. Wahangishile anenyi a mapwo makumi atatu ku minyachi yeka, mba watendele makumi atatu a mapwo a ku minyachi yeka hali anenyi a malunga. Wayulile A-Izalele miaka shimbiali.

¹⁰ Chocho Ibzane yafwa. Yamufunda mu Mbeteleme.

¹¹ Eione Ka-Zapulone wamukawile nikuyula A-Izalele. Waayulile kumi lia miaka.

¹² Mba Eione Ka-Zapulone yafwa. Yamufunda mu Ajalone mu chifuchi cha Zapulone.

¹³ Abadone mwana wa Hilele Ka-Piratone wamukawile nikuyula A-Izalele.

¹⁴ Wapwile ni makumi awana a ana a malunga, ni ajikulu a malunga makumi atatu, eswe endele ha yimbulu makumi shimbiali. Wayulile A-Izalele miaka nake.

¹⁵ Mba Abadone mwana wa Hilele Ka-Piratone yafwa. Yamufunda mu Piratone mu chifuchi cha Eframe, kwe ku milundu ya A-Amaleke.