Akwa Kuyula 11 - MUKANDA USANDU WA ZAMBI 1975

¹ Jefeta Ka-Ngiliate iye lunga wa tachi ni hamu ahoze mwana wa chikoi. Tato ya Jefeta mwe Ngiliate.

² Mukwo-pwo wa Ngiliate wamusemenene ana a malunga nawa, mba muze ana ja mukwo-pwo hakola ahumine Jefeta ngwo, Ena uli mwana wa pwo weka, kashika kuchi kuswana mu zuwo ha tata.

³ Jefeta yachina ana-akwo, yatwama mu chifuchi cha Tope, mba amwe malunga amokomoko akungulukilile kuli Jefeta, endele nenyi nikupupa.

⁴ Kulutwe ha shimbu A-Amone ashile jita ni A-Izalele,

⁵ mba muze A-Amone ashile jita ni A-Izalele makulwana a Ngiliate ayile kusaka Jefeta ku chifuchi cha Tope.

⁶ Yamba kuli Jefeta ngwo, Tweya ukapwe kapitau ketu tukase jita ni A-Amone.

⁷ Ahoze Jefeta yamba kuli makulwana a Ngiliate ngwenyi, Nwanguvwilile kole; nwanguhumine ku zuwo ha tata. Kuchi te nuneza kuli yami haliapwila ni lamba lienu?

⁸ Makulwana a Ngiliate yamba kuli Jefeta ngwo, Ha chikuma chenacho hitwatewulukila kuli yena haliapwila, hanga ukaye hamwe ni yetu mukwasa jita ni A-Amone ukapwe helu ha yetu ni helu ha atu eswe atwama mu Ngiliate.

⁹ Jefeta yamba kuli makulwana a Ngiliate ngwenyi, Nyi munungutwala ku mahietu nawa mukwasa jita ni A-Amone mba Yehova maakunjika kuli yami, pundu mungupwa helu lienu nyi?

¹⁰ Makulwana a Ngiliate yamba kuli Jefeta ngwo, Yehova iye chela hakachi ketu, pundu mutulinga ngwe hiwamba.

¹¹ Chocho Jefeta wayile ni makulwana a Ngiliate mba e atu amusele helu lio akapwe kapitau ko. Jefeta wambile maliji jenyi eswe kumeso ja Yehova mu Mizepa.

¹² Henaho Jefeta yatuma tunganda kuli mwanangana wa A-Amone ngwenyi, Chika unguli nacho hiweza kuli yami mukwasa jita mu chifuchi chami?

¹³ Mwanangana wa A-Amone yakumbulula tunganda twa Jefeta ngwenyi, Mumu A-Izalele, muze akatukile ku Engitu, atambwile chifuchi chami chize ku Arnone ndo ku Yapoke ni ku Yordau. Kashika hilwisacho haliapwila ni vumbi.

¹⁴ Mba Jefeta yatuma tunganda akwo nawa kuli mwanangana wa A-Amone ngwenyi,

¹⁵ Chocho ngunambe yami jefeta ngwami, A-Izalele katambwile chifuchi cha A-Moape chipwe cha A-Amone.

¹⁶ Alioze muze akatukile ku Engitu A-Izalele apalikile ndusu mu puya ku Kalunga-lwiji Muchila, yeza ku Kandeshe.

¹⁷ Mba A-Izalele atumine tunganda kuli mwanangana wa Endome ngwo, Tutayize kama kupalika mu chifuchi chenu, alioze mwanangana wa Endome kasolo kupanjika. Atumine kuli mwanangana wa Moape alioze iye nawa katayile. Chocho A-Izalele atwamine ku Kandeshe.

¹⁸ Mba apalikile mu puya nikujinguluka chifuchi cha Endome ni chifuchi cha Moape ndo ahetele sali lia Moape ku Chivumbuko. Yasa yilombo yo sali lize lia Arnone. Kanjilile mu chifuchi cha Moape mumu Arnone wapwa njiza ya Moape.

¹⁹ A-Izalele yatuma tunganda kuli Sahone mwanangana wa A-Amore ni wa Heshebone ngwo, Tutayize kama kupalika mu chifuchi chenu tukahete ku mahietu.

²⁰ Alioze Sahone kafulielele A-Izalele akapalike ku chifuchi chenyi. Kashika Sahone yakungulula atu jenyi eswe, yatunga chilombo ku Yahaze, yasa jita ni A-Izalele.

²¹ Alioze Yehova mwe Zambi ya Izalele yakunjika Sahone ni atu jenyi eswe mu moko ja A-Izalele akaakumbe. Chocho A-Izalele azukile chifuchi cheswe cha A-Amore waze atwamine mu chifuchi chize.

²² Azukile chifuchi cheswe cha A-Amore chize ku Arnone ndo ku Yapoke ni chize ku puya ndo ku Yordau.

²³ Chocho Yehova mwe Zambi ya A-Izalele yahuma A-Amore kumeso ja atu jenyi A-Izalele. Mba yena unambe kwazuka nyi?

²⁴ Yika wachina kuzuka chize zambi ye Chemoshe hakwaha kuzuka? Mba chize cheswe Yehova Zambi yetu hakumba kulutwe lietu yetu mutuzuka.

²⁵ Ena te Wahiana Mbalake mwana Zepore mwanangana wa Moape nyi? Iye te limwe tangwa yalitachika ni A-Izalele nyi? Hanji limwe tangwa washile no jita nyi?

²⁶ Shimbu lieswe A-Izalele atwamine mu Heshebone ni yihunda yako, ni Aroere ni yihunda yako, ni membo eswe ali mu chikulo cha Arnone, kulakaji atatu a miaka, yika wachina kuyitambula ha miaka yize?

²⁷ Ami chakuvulumwine alioze yena unanguvulumuna ha kwasa jita ni yami. Yehova mwe mukwa kupatula apatule musono hakachi ka A-Izalele ni A-Amone.

²⁸ Alioze mwanangana wa A-Amone kapanjikile ku maliji Jefeta amutumine.

²⁹ Henaho Spiritu ya Yehova yahulumukina hali Jefeta. Yapalika ndusu mu Ngiliate ni Manase; yaya ku Mizepa ya Ngiliate; mba chize ku Mizepa ya Ngiliate yaya kuli A-Amone.

³⁰ Jefeta yalishinga kuli Yehova ngwenyi, Nyi mukunjika A-Amone mu kwoko liami,

³¹ mweswawo matuhuka ku chikolo cha zuwo liami kungupatwiza muze munguhiluka ha kukumba A-Amone, mapwa wa mbala wa Yehova, mba mungumulumba mulambu wa kulumba.

³² Chocho Jefeta yazauka kuli A-Amone akase no jita, mba Yehova yaakunjika mu moko jenyi.

³³ Yaapupa chize ku Aroere ndo ku chifuchi cha Minite makumi aali a membo, ni ndo ku Abele-Keramini nikwashiha anji chikolo. Chocho A-Amone azeyele kumeso ja A-Izalele.

³⁴ Mba Jefeta yeza ku zuwo lienyi mu Mizepa. Kumanyi mwanenyi wa pwo yatuhuka kumupatwiza ni kamukupiela ni kuhangana. Iye te mwanenyi wa wika; mukwo keshi nenyi chipwe wa lunga chipwe wa pwo.

³⁵ Ha kumumona iye wapulile mazalo jenyi ngwenyi, Lwangu mwanami! Hiwangukoka mu mavu. Mumu ha mukunda wa yena hinapwa ni lamba linene. Mumu hinahanjika ni Yehova mba Chahashile kulishingulula ku chilakenyo chami.

³⁶ Iye yamba kuli tato ngwenyi, Tata nyi hiwahanjika ni Yehova ungulinge cheswacho wambile, se Yehova hakukala hali akwa kole je A-Amone.

³⁷ Yamba kuli tato ngwenyi, Ngutayize chuma chimuwika. Ngweche tukweji aali ngukaye nikwendangana ha milundu nikulilila uvirgem wami hamuwika ni masepa jami.

³⁸ Yamba ngwenyi, Yako. Yamutuma tukweji aali, mba yaya hamwe ni masepa jenyi, yalilila uvirgem wenyi ha milundu.

³⁹ Kulutwe lia tukweji aali yahiluka kuli tato mba yamulinga nikulita ni shingo lienyi. Kanda achilimona ni lunga nilimwe tangwa. Chocho chalumukine ndako mu Izalele,

⁴⁰ mapwo a Izalele ayile mwaka ha mwaka kulila mwana wa Jefeta Ka-Ngiliate matangwa awana ha mwaka.