Akwa Kuyula 10 - MUKANDA USANDU WA ZAMBI 1975

¹ Kunyima lia Apimeleke kwakawile Tola wa Puvwa wa Ndodo wa A-Isaka akapulule A-Izalele. Watwamine ku Shamiri mu chifuchi cha Eframe ku milundu.

² Iye wayulile A-Izalele makumi aali a miaka ni miaka yitatu, mba yafwa. Yamufunda mu Shamiri.

³ Kunyima lienyi kwakawile Njaire Ka-Ngiliate. Iye wayulile A-Izalele makumi aali a miaka ni miaka yiali.

⁴ Wapwile ni makumi atatu a ana a malunga endele ha makumi atatu a yimbulu. Apwile ni makumi atatu a membo aalukile jina lia Havote-Njaire ndo musono. Mu chifuchi cha Ngiliate ali.

⁵ Njaire yafwa; yamufunda mu Kamone.

⁶ Mba A-Izalele alingile chipi kumeso ja Yehova cheka nawa, nikulingila Ambale ni Asatarote mazambi ja A-Seria, ni mazambi ja A-Sendone, ni mazambi ja A-Moape, ni mazambi ja A-Amone, ni mazambi ja A-Filistea. Yehuka Yehova. Kamulingilile.

⁷ Kashika utenu wa Yehova wakasumukine hali A-Izalele. Yaakunjika ku moko ja A-Filistea ni ku moko ja A-Amone.

⁸ O yapinjisa A-Izalele nikwahungumiona mwaka uze. Kumi lia miaka ni miaka nake ahungumionene A-Izalele eswe apwile mu sali lia Yordau mu chifuchi cha A-Amore mu Ngiliate.

⁹ A-Amone azaukile Yordau akase jita ni A-Yunda nawa ni A-Mbenjamine ni A-Eframe. Kashika A-Izalele apinjile chikolo.

¹⁰ Mba A-Izalele atetele kuli Yehova ngwo, Hitwakuvulumuna mumu hitwehuka Zambi yetu, hitwalingila Ambale.

¹¹ Yehova yamba kuli A-Izalele ngwenyi, Te chanupulwile kuli A-Engitu, ni A-Amore, ni A-Amone, ni A-Filistea?

¹² A-Sendone anupinjishile nawa, ni A-Amaleke, ni A-Mayone, ahoze nwatetele kuli yami mba nanupulwile ku moko jo.

¹³ Hindu hinwangwehuka nikulingila mazambi eka, kashika chichi kunupulula nawa.

¹⁴ Yénu nukatete kuli mazambi aze nwatongwele akanupulule ha mwaka wa kupinda chenu.

¹⁵ Alioze A-Izalele ambile kuli Yehova ngwo, Hitwavulumuna. Nutulinge cheswacho chanupemena alioze nutupulule kama musono.

¹⁶ Chocho ambilile hakachi ko mazambi a tundaka apwile no. Alingilile Yehova mba iye wevwilile kupiha luyinda wa Izalele.

¹⁷ Henaho asanyikine A-Amone ku jita. Yeza, yasa chilombo cho ku Ngiliate, mba A-Izalele akungulukile nikusa chilombo cho ku Mizepa.

¹⁸ Mba e atu akwa lutwe a Ngiliate aliambile umwe kuli mukwo ni mukwo ngwo, Mwe lunga iya maputuka jita ni A-Amone? Mutumupwisa helu lia A-Ngiliate eswe.