Akwa Kuyula 1 - MUKANDA USANDU WA ZAMBI 1975

¹ Yoshua hafwa A-Izalele yahula Yehova ngwo, Yoze mahanga kukanduka kuli A-Kanana kwasa no jita hali yetu, iya?

² Yehova yamba ngwenyi, A-Yunda makanduka; hinakunjika chifuchi mu moko jo.

³ A-Yunda yamba kuli ayayo A-Simeone ngwo, Tweyenu hamwe ni yetu ku chifuchi chize hatusela, tukase jita ni A-Kanana, mba yetu chocho mutuya ni yenu mu chifuchi chize hanusela yenu. Mba A-Simeone yaya hamwe no.

⁴ Henaho A-Yunda yakanduka mba Yehova yakunjika A-Kanana ni A-Perize mu moko jo. Kumi lia tununu aakumbile ku Mbezeke.

⁵ Awanyine Adonibezeke kwe ku Mbezeke, yasa nenyi jita, yakumba A-Kanana ni A-Perize.

⁶ Adonibezeke yachina alioze yamuhanga, yamukwata, yamuteta minwe yenyi ya shina ku moko ni ku molu.

⁷ Adonibezeke yamba ngwenyi, Makumi shimbiali a mianangana naatetele minwe yo ya shina ku moko ni ku molu, anjile yifwenyufwenyu kushi ha mesa yami. Chize nalingile Zambi hananguhilwisacho. Chocho amunehene ku Yerusaleme, yafwilako.

⁸ Malunga A-Yunda ashile jita ni Yerusaleme, yachitambula, yaashiha ni katana, yocha che chihunda.

⁹ Mba kulutwe malunga A-Yunda apalumukine mukwasa jita ni A-Kanana aze atwama mu chifuchi cha milundu mu Negeve, ni ku yana.

¹⁰ A-Yunda ayile mukulimika ni A-Kanana atwama mu Heprone (jina lia Heprone kushi liapwile Kiriate-Arpa). Akumbile Sheshai, ni Ahimane, ni Talamai.

¹¹ Chize ku kuze ayile mukulimika ni A-Ndebire. Jina lia Ndebire kushi liapwile Kiriate-Zefa.

¹² Kalemba yamba ngwenyi, Mweswe makumba Kiriate-Zefa nikuchitambula mungumwaha Aksa mwanami akapwe pwo lienyi.

¹³ Mba Oteniele mwana wa Kenaze mwanakwo wa Kalemba yachikumba, kashika yamwaha Aksa mwanenyi, akapwe pwo lienyi.

¹⁴ Muze heza kuli iye pwo yashinjika lunga akete munda kuli tato Kalemba. Pwo muze hasunuka ha chimbulu chenyi Kalemba yamba kuli iye ngwenyi, Kuchi unazange?

¹⁵ Iye yamba ngwenyi, Nungwehe chawana. Se hinwangusa mu chifuchi cha Negeve, nungwehe nawa mashima a meya. Kalemba yamwaha mashima a ku tunda ni mashima a ku mwanda.

¹⁶ A-Kene, waze asemukine kuli tato-weno wa Mose, o akandukile hamwe ni A-Yunda katu ku chihunda cha mingaji ndo ku puya ya Yunda mu Negeve hakamwihi ni Arata. Akandukile nikutunga ni e atu.

¹⁷ A-Yunda wayile hamwe ni ayayo A-Simeone. Akumbile A-Kanana waze atwamine mu Sefate nikwakuwisa. Chocho jina lia chihunda lialumukine Horoma.

¹⁸ A-Yunda atambwile Ngeza nawa ni chifuchi chacho, ni Asekalone ni chifuchi chacho, ni Ekrone ni chifuchi chacho.

¹⁹ Yehova wapwile hamwe ni A-Yunda mba wazukile chifuchi cheswe cha milundu. Alioze kahashile kuhuma waze atwamine mu chana mumu apwile ni matemba-a-jita a utale.

²⁰ Ahanyine Heprone kuli Kalemba nikulita ni liji lia Mose, mba iye wahumine e ana atatu a malunga a Anake.

²¹ Alioze A-Mbenjamine kahumine A-Yepushe waze atwama mu Yerusaleme. Kashika A-Yepushe atwama mu Yerusaleme hamuwika ni A-Mbenjamine ndo musono.

²² Akwa munyachi wa José akandukile kwasa jita ni Mbetele, mba Yehova wapwile hamwe no.

²³ Akwa munyachi wa José yatuma kwendesa Mbetele (jina lia chihunda kushi liapwile Luze).

²⁴ Ngendeshi yamona lunga kanakatuka ku chihunda. Yamba kuli iye ngwo, Utulweze jila ya kunjila mu chihunda mba mutukulinga vumbi.

²⁵ Iye yaalweza jila ya kunjila mu chihunda mba o yashiha akwa chihunda ni katana, alioze yatusula mwe lunga ni atu jenyi.

²⁶ Mwe lunga yaya ku chifuchi cha A-Hete, yatunga chihunda, yachiluka jina ngwenyi, Luze. Chocho Hapwa jina liacho ndo musono.

²⁷ A-Manase kahumine akwa Mbete-Shiane ni tuyihunda twako, chipwe Tanaka ni tuyihunda twako, chipwe akwa Ndole ni tuyihunda twako, chipwe akwa Ibliame ni tuyihunda twako, chipwe akwa Megidu ni tuyihunda twako, alioze A-Kanana atwamine mu chifuchi chize ni pami jo.

²⁸ Muze A-Izalele hapwa ni tachi alingishile A-Kanana ungamba alioze kaahumine liakulu.

²⁹ A-Eframe no kahumine A-Kanana aze atwama mu Ngezere, alioze A-Kanana atwamine mu Ngezere hakachi ko.

³⁰ A-Zapulone kahumine waze atwama mu Kitrone, chipwe waze atwama mu Nahalale alioze A-Kanana atwamine hakachi ko nikulinga ungamba.

³¹ A-Ashe kahumine waze atwama mu Aku, chipwe waze atwama mu Sendone, chipwe mu Alaba, chipwe mu Akaziba, chipwe mu Helaba, chipwe mu Afeke, chipwe mu Rehobo.

³² Alioze A-Ashe atwamine hakachi ka A-Kanana akwa chifuchi, mumu kaahumine.

³³ A-Napatali kahumine waze atwama mu Mbete-Shemeshe, chipwe waze atwama mu Mbete-Anate, alioze o atwamine hakachi ka A-Kanana akwa chifuchi. Hindu waze atwama mu Mbete-Shemeshe, ni Mbete-Anate aalingilile ungamba.

³⁴ A-Amore ahumine A-Ndane ndo ku chifuchi cha milundu; kaatayijile kupalumuka ku yana.

³⁵ A-Amore aseleko pami kutwama mu Hara-Here, ni mu Ajalone, ni mu Shalabimi, alioze kwoko lia akwa munyachi wa José liapwile hali ayo ni tachi, yalinga ungamba.

³⁶ Njiza ya A-Amore yapalika chize ku mulundu wa Akarabimi, chize ku Sela ndo ku tunda.