3 Yoano 1 - MUKANDA USANDU WA ZAMBI 1975

¹ Mukulwana kuli Ngayu, mukwetu wa zango, yoze ngunamuzange ni umwenemwene.

² Mukwetu wa zango, ngunalembe hanga mu yuma yeswe Ukawahe, ukahinduke ngungungu, chizechene ngwe mbunge ye kuyakuwaha.

³ Mumu nawahililile chikolo muze mandumbu ejile ni muze ashindakenyene ha umwenemwene we, chizechene ngwe wakwenda mu umwenemwene.

⁴ Uwahililo wahiana uno chishi nawo shina kwivwa hali ana jami ngwo, Kanende mu umwenemwene.

⁵ Mukwetu wa zango, kuwakushishika ni cheswacho wakulinga kuli mandumbu ni waze anapu ngeji nawa;

⁶ waze kakushindakenya ha zango lie kumeso ja chikungulwila: mukalinga kanawa kwashinjikila ha jila yo ngwe chinatela Zambi.

⁷ Mumu ha jina lienyi hanatuhuka, katambwile nichimwe kuli akwa mavungu.

⁸ Yetu kashika chatutamba kusambilila atu ngwe wano, hanga tukapwe akwa milimo-ni-akwo ha umwenemwene.

⁹ Nasonekene chimwe ku chikungulwila, aiioze Ndiutrefwe, yoze unafwila kupwa ni muhela utangu hakachi ko, keshi kututambula.

¹⁰ Kashika, kachi mungwiza, kachi mungunwiwulula yitanga yenyi yize akulinga, ni kumbambula cha kulimika ni yetu ni maliji a ungulungulu; chipwe keshi kuyuka no, chipwe iye mwene keshi kutambula mandumbu; mba waze mazanga kwatambula maakanda, maambila haze lia chikungulwila.

¹¹ Mukwetu wa zango, kanda wimbulula yipi aiioze imbulula yipema. Yoze wakulinga yipema iye wa kuli Zambi; aiioze yoze wakulinga yipi kamweneko Zambi.

¹² Ndemetriu kali ni Shindakenyo kuli eswe, ni ku we umwenemwene; ewa, ni yetu nawa twa-kushindakenya; nunanyingika Shindakenyo yetu yamwenemwene.

¹³ Napwanga ni yuma yinji kusoneka kuli yena, aiioze chazangile kuyisoneka kuli yena ni ulombo ni sonekeso:

¹⁴ aiioze ngunatalatala kukumona kamunomuno, mba mutukahanjika meso ni meso.

¹⁵ Sambukila yikapwe kuli yena. Tusendo kanakumeneka. Meneka tusendo ha majina jo.