2 Yoano 1 - MUKANDA USANDU WA ZAMBI 1975

¹ Mukulwana kuli ndona yoze amutongwele, ni kuli ana jenyi, waze ngunaazange ni umwenemwene; hi yami wika ko, aiioze nawa waze eswe ananyingika umwenemwene;

² mumu ha umwenemwene uze watwama muli yetu, kumuukapwa hamwe ni yetu ndo ku miaka ya mutolo:

³ Vumbi, ni keke, ni sambukila kumuyikapwa hamwe ni yetu, ya kuli Zambi Tata ni ya kuli Mwene Yesu Kristu, mwe Mwana wa Tata, ni umwenemwene ni zango.

⁴ Nakuwahilila chikolo ha kuwana amwe a kuli ana je akwenda mu umwenemwene, ngwe hitunatambula shimbi kuli Tata.

⁵ Haliapwila ngunaliumbu kuli yena ndona, kuchapwile ngwe ngunasoneka kuli yena shimbi yaha, aiioze yize twapwile nayo chize ku uputukilo, ngwetu, Tukalizange umwe ni mukwo ni mukwo.

⁶ Lino lie zango, ngwetu, Tukende nikulita ni shimbi jenyi. Yino ye shimbi ngwe nwevwile chize ku uputukilo, hanga nukende nayo.

⁷ Mumu akwa kupiangula anji haneza hano hashi, waze keshi kutayiza mwe Yesu Kristu heza mu musunya, mwe mukwa kupiangula yono, mwe mukwa kulimika ni Kristu.

⁸ Litatenu kuli yenwene, hanga kutuchi katokesa yuma yize hitunalingi, aiioze hanga tukatambule kwononona cheswe.

⁹ Mweswe matanguka, keshi kutwama mu longeso lia Kristu, iye keshi ni Zambi; yoze matwama mu longeso lia Kristu, kali ni eswe aali, ni mwe Tata ni mwe Mwana.

¹⁰ Kachi umwe meza kuli yena, kanehene longeso lino, kanda umutambula mu zuwo lie, kanda umumeneka:

¹¹ mumu yoze Kumumeneka, malifutula ni yitanga yenyi ya ungulungulu.

¹² Nguli ni yuma yinji kusoneka kuli yena, aiioze chazangile kuyisoneka ni papilo ni ulombo; aiioze ngunatalatala kwiza kuli yena, ni kuhanjika meso ni meso, hanga uwahililo wetu ukazale tò.

¹³ Ana ja pangie yoze amutongwele kanakumeneka.