2 Timoteu 4 - MUKANDA USANDU WA ZAMBI 1975

¹ Shimbi ngunakwehe kumeso ja Zambi ni Kristu Yesu, yoze makapatwila a mwono ni afu, ni ku usolokelo wenyi ni wanangana wenyi,

² ngwami, Ambujola lie Liji, hondangana nalio ha mwaka upema, ni haze hi mwaka upema ko; kumika, ámbila, shinjila, ni uhomboloji weswe ni longeso lieswe.

³ Mumu mwaka muukapwa muze kechi kulihumikiza ni longeso lingunu; alioze mapwa ni matwi a kuzwa, makalilunjikila alongeshi nikulita ni usolo wo ene.

⁴ Makatewulula matwi jo ku umwenemwene, makakondolokela ku yishima yamokomoko.

⁵ Alioze yena, keyela ha yuma yeswe, nyongonona ni utunu ndusu mu yipi, linga milimo ya mukwa kwambujola, manununa uvumbiko we.

⁶ Mumu himungutehuka, mwaka wa kutusuka chami hiweza.

⁷ Hingunalitachika kulitachika chipema, hingunamanununa kuma kwami kwa kuzomboka, hingunafungu Ufulielo.

⁸ Chize ku haliapwila hanangufulikila chipangula cha ululi, chize Mwene, mwe Sopi wa ululi, makangwaha ha tangwa lize; hi kuli yami wika ko, alioze nawa kuli waze eswe akuzanga usolokelo wenyi.

⁹ Lipupwise kwiza kuli yami nikawashi:

¹⁰ mumu Ndima hanangwehuka, mumu kanafwila yuma ya mwakono, hanayi ku Tesalonika; Cresene hanayi ku Ngalashia, Titu hanayi ku Ndalamashia.

¹¹ Luka wika ali hamwe ni yami. Hitula Marku, ukamunehe hamwe ni yena, mumu kanangutela ha uvumbiko.

¹² Alioze Techiku hingunamutumu ku Efwesu.

¹³ Chikuto chize nahichikile ku Troa mu zuwo lia Karpu, ukachinehe muze muwiza, ni mikanda, kuhiana chikolo yize ya malambu.

¹⁴ Alezandre fuli-unengu, wangulingile yipi yinji: Mwene makamwaha nikulita ni yitanga yenyi

¹⁵ Kanyama nenyi, yena nawa, mumu walimikine chikolo ni maliji jetu.

¹⁶ Ha kukumbulula chami chitangu, niumwe kamanyine ni yami, alioze eswe angwehukile: kanda akaatwikacho.

¹⁷ Alioze Mwene wamanyine hamwe ni yami, iye wanguhele tachi; hanga ku kanwa liami akambujole liakulu sango lipema; hanga akwa mavungu eswe akevwe; angupulwile ku kanwa lia ndumba.

¹⁸ Mwene kumakangupulula ku yitanga yeswe yipi, makangulamwina ndo ku wanangana wenyi wa mwilu: uhenya ukapwe kuli iye ndo ku miaka yeswe ya mutolo. Amene.

¹⁹ Meneka Priska ni Akwila, ni akwa zuwo lia Onesefworu.

²⁰ Erastu wasalile ku Korindu: aiioze nahichikile Trofwimu kunyima ku Miletu, kayiza.

²¹ Lipupwise kwiza shimbu mwaka wa chishika kanda uheta. Upulu kanakumeneka, ni Pundene, ni Linu, ni Kelautia, ni mandumbu eswe.

²² Mwene Yesu Kristu akapwe hamwe ni Spiritu ye. Vumbi likapwe hamwe ni yena. Amene.