2 Timoteu 3 - MUKANDA USANDU WA ZAMBI 1975

¹ Alioze nyingika chino, ha matangwa a kusula kumuku kapwa miaka yikalu.

² Mumu atu kumakapwa akwa kulifwila ene, akwa kufwila mbongo, akwa kulizata, akwa kulizelula, akwa kushililika, keshi kwononoka kuli yisemi jo, akwa kaleleso, akwa luchisa,

³ keshi zango lia atu, keshi kuhutuka, yilamikiji, keshi kusúla, asasu, keshi kufwila yipema,

⁴ akwa kuhandukulula, akwa kulipupula, akwa kulifuza, akwa kufwila kuwaha hi Zambi ko.

⁵ Kusoloka cha uwayilo kali nacho, alioze kakulikata tachi jawo: kuli wano nawa kondoloka.

⁶ Hakachi ko kwali waze akuliomba nikunjila mu mazuwo, akatwale ku ufunge mapwo a kuhepuka, a kulemewa ni milonga, kanahunguka ku usolo weka ni weka.

⁷ Kakulilongesa matangwa eswe, alioze nilimwe tangwa keshi kuheta ku chinyingi cha umwenemwene.

⁸ Chizechene ngwe Yane ni Yambwe alimikine ni Mose, chocho wano nawa kakulimika ni umwenemwene; atu a kupiha mu kunyonga cho, yisáshili ha kutwala ku Ufulielo.

⁹ Alioze kechi kasenya kulutwe nawa; mumu uzuzuke wo kumuukasoloka kuli atu eswe, chizechene ngwe uzuzuke wa waze nawa wasolokele.

¹⁰ Alioze hiunakaula kulongesa chami, ni kwenda chami, ni upale wami, ni Ufulielo wami, ni uhomboloji wami, ni zango liami, ni kunyongonona chami,

¹¹ ni yihungumiona, ni lamba, lize lianguwanyine mu Andiakia, mu Ikoniu, mu Lesetra; yihungumiona yize nanyongonwene nayo; ni Mwene wangupulwile ku yeswe.

¹² Ewa, ni waze eswe mazanga kwenda ni uwayilo muli Kristu Yesu kumakamona yihungumiona.

¹³ Alioze yingulungulu ni akwa kwonga kumakapiha kuhiana, nikupiangula, nikupianguka.

¹⁴ Alioze yena, nyongonona mu yuma yize hiunalilongesa, ni yize hiunayisela chinyingi, se unanyingika yoze wakulongeseleyo;

¹⁵ ngwe chize ku ukemba we hiunanyingika je sona jisandu jize jinahase kukufumba mana mukuzuka ulamwino ku Ufulielo uze uli muli Kristu Yesu.

¹⁶ Yisoneko yeswe hanayihwimi kuli Zambi, neyo kuyakutumbuka ha kulongesa, ni ha kukumika, ni ha kululika, ni ha kufumba mu ululi:

¹⁷ hanga mutu wa Zambi akapwe mukwa kujama wakuteta liakulu yitanga yeswe yipema.