2 Timoteu 2 - MUKANDA USANDU WA ZAMBI 1975

¹ Kashika yena, mwanami, takama mu vumbi lize lili muli Kristu Yesu.

² Ni yuma yize hiunevu kuli yami kumeso ja yela anji, yino kulijika kuli malunga amwenemwene, waze makahasa kufumba akwo nawa.

³ Nyongonona ni utunu ndusu mu yipi, ngwe swalale mupema wa Yesu Kristu.

⁴ Swalale niumwe malilimba ni yuma ya mwono uno; hanga akapemene kuli yoze hanamusela ku uswalale.

⁵ Nyi kachi umwe malinjika ha kuheha, keshi kumusa chipangula shina malinjika nikulita ni shimbi yacho.

⁶ Njimi yoze makilikita, chamutamba kulianga kutambula chihanda cha mihuko.

⁷ Zewula chize ngunambe; mumu Mwene kumakakwaha malinjekela ha yuma yeswe.

⁸ Iwuluka Yesu Kristu amuhindwishile hakachi ka afu, wa ku munyachi wa David, nikulita ni sango liami lipema.

⁹ Mu chuma chino nakwivwa lamba, nguli mu malenge ngwe mukwa kulinga yipi; alioze liji lia Zambi kuliakashiwile.

¹⁰ Ha chikuma chino nakunyongonona mu yuma yeswe, mumu hali waze hanaatongola, hanga akazuke ulamwino uze uli muli Kristu Yesu, hamwe ni uhenya wa mutolo.

¹¹ Liji lino liamwenemwene ngwo, Mumu kachi twafwile hamwe nenyi, kachi mutukapwa ni mwono hamwe nenyi.

¹² Kachi mutunyongonona mu lamba kachi mutukayula hamwe nenyi nawa: kachi mutulikala iye, kachi iye nawa makalikala yetu.

¹³ Kachi yetu hi tuli amwenemwene ko, iye katwama wamwenemwene; mumu kahashile kulikala mwene.

¹⁴ Ewuhvise yino yuma ni kwaaha koki kumeso ja Mwene ngwe kanda akahangujola ha maliji, chize kuchishi kufumbuka nichimwe, kuchakulimbwisa waze akwivwa.

¹⁵ Lipupwise kulitumbikila ngwe umwe hanamusela Shindakenyo yipema kuli Zambi, mukwa milimo yoze keshi nacho nichimwe cha kumuvwisa sonyi, kanapatula kanawa mu liji lia umwenemwene.

¹⁶ Alioze China kumbambula chamokomoko cha ujiluke: mumu kumakasenya kulutwe ku utanganyanyi Wahiana.

¹⁷ Ni liji lio kumulikambungumuka ngwe mbongola: a kuli ayo kanapu Hemene ni Fwiletu.

¹⁸ Ano ha kutwala ku umwenemwene hanapiasuka, ngwo, Uhindukilo hiwapalika kulu, kanalimbwisa Ufulielo wa amwe.

¹⁹ Hindu fundamentu yingunu ya Zambi kuyakola, yikwete Chijikilo chino ngwo, Mwene kananyingika ninyenyi; chikwo ngwo, Mweswe mavuloka jina lia Mwene akakatuke ku uhenge.

²⁰ Achi, mu zuwo linene muyili yikwachilo, hi ya oru ni ya prata wika ko, alioze muyili nawa ya mutondo, ni ya uma; yimwe ku ulemu, ni yikwo ku ulelu.

²¹ Kashika kachi mutu malipemesa ku yino, kachi makapwa chikwachilo ku ulemu, musandu, wa kutela uvumbiko wa mwata, wa kululika ha yitanga yeswe yipema.

²² Alioze China usolo wa ukweze, ukakaule ululi, ni Ufulielo, ni zango, ni sambukila, hamwe ni waze akutambika hali Mwene ni mbunge yipema.

²³ Alioze lituna yihula ya uhepuke ni yize kuyishi kulumbunuka, se unanyingika ngwe kuyakuneha ndombo.

²⁴ Kuchatambile ndungo ya Mwene kuneha ndombo, alioze akapwe chimbovu kuli eswe, mukwa kujama ha kulongesa; chihumikiji;

²⁵ ni Spiritu ya kushimbika, afumbe waze akulimika; kachi hanji Zambi makaaha kulikonyeka, akahete ku yinyingi ya umwenemwene.

²⁶ Akalaule, akachine ku kambwila lia Ndiapu, (waze hanakwachika kuli iye mukulinga upale wenyi).