2 Sango Ja Mianangana 9 - MUKANDA USANDU WA ZAMBI 1975

¹ Muze mwanangana wa pwo wa ku Shipa yevwa lufuma wa Solomone yeza ku Yerusaleme akeseke Solomone ni yihula yikalu. Yeza ni atu anji chikolo, ni tumelu a kumbata tumbuto twa lupembo mupema, ni oru yinji chikolo, ni mawe alemu ngwe diamante. Ha kuheta kuli Solomone yalishimwinya nenyi ha yuma yize yeswe yapwile mu mbunge yenyi.

² Solomone yamulumbunwina yihula yenyi yeswe. Nichimwe chuma chaswaminyine Solomone chize kahashile kumulumbunwinacho.

³ Mba muze mwanangana wa pwo wa ku Shipa hamona mana a Solomone ni zuwo lize hatunga,

⁴ ni kulia cha ha mesa yenyi, ni kutwama cha ngamba jenyi, ni kuvumbika cha tuvumbi twenyi, ni mazalo jo, ni akwa kumumbachila musenge ni mazalo jo, ni chize akandukile ku zuwo lia Yehova, yevwa ni mu moko kéké lume.

⁵ Yamba kuli mwanangana ngwenyi, Lufuma nevwile mu chifuchi chami wa kutwala ku yitanga ye ni mana je, kumanyi wamwenemwene.

⁶ Alioze chafulielele maliji jo ndo nejile, mba meso jami hachimona. Hindu chipwe chihanda cha ha muchima cha mana je kangulwezelecho. Ena kuwahiana lufuma yoze nevwile.

⁷ Kawaha malunga je, kawaha wano tuvumbi twe akumana kumeso je matangwa eswe nikwivwa mana je.

⁸ Yehova Zambi ye akafumane yoze wevwile kuwaha ni yena, wakusele ha ngunja yenyi ukapwe mwanangana wa Yehova Zambi ye. Zambi ye wazangile A-Izalele; wafupile kwakolesa ndo ku miaka ya mutolo, kashika wakupwishile mwanangana wo ukapatwile ni ululi.

⁹ Yahana kuli mwanangana kulakaji ni makumi aali a *talentu ja oru, ni tumbuto twa lupembo mupema twa kulumbama, ni mawe alemu ngwe diamante. Kukwapwile nawa tumbuto tukwo ngwe tuze mwanangana wa Shipa wahanyine kuli mwanangana Solomone.

¹⁰ Ngamba ja Hurame nawa hamwe ni ngamba ja Solomone, waze anehene oru ku Ofiri, anehene mitondo ya mialumuke ni mawe alemu ngwe diamante.

¹¹ Ku mitondo ya mialumuke mwanangana yalinga ukandukilo wa mu zuwo lia Yehova ni mu zuwo lia mwanangana, ni tulialia ni yisaji ya kusa hali njimba. Te kanda achimona yisaji ngwe yize nilimwe tangwa mu Yunda.

¹² Mwanangana Solomone yahana kuli mwanangana wa pwo wa Shipa cheswe azangile; cheswacho echile helu lia yize iye haneha kuli mwanangana Solomone. Chocho yalumuka, yaya ku chifuchi chenyi hamwe ni atu jenyi.

¹³ Pezu ya oru yize yejile kuli Solomone ha mwaka umuwika kulakaji asambano ni makumi asambano a *talentu ni talentu jisambano,

¹⁴ kuweza ku oru yize anehene kuli akwa kusumbakenya ni akwa kusepa. Mianangana eswe ja Arabia ni akwa kuyula yifuchi yaneha oru ni prata kuli Solomone.

¹⁵ Mwanangana Solomone yalinga kulakaji aali a kepwe jinene ja oru ya kutatula. Lukepwe umuwika wapwile ni kulakaji asambano a shekele ja oru ya kutatula.

¹⁶ Yalinga nawa kulakaji atatu a kepwe ja oru ya kutatula. Lukepwe umuwika wapwile ni kulakaji atatu a shekele ja oru ya kutatula. Mba mwanangana yajisa mu zuwo lia usaki wa Lebano.

¹⁷ Chikwo nawa mwanangana yalinga ngunja yinene ya mazo a njamba, yalamikaho oru yipema.

¹⁸ Kwapwile unyinyino wa ngano jisambano kuheta ku ngunja ni chitwamo cha oru cha yiliato, te ya kununga ku ngunja. Kwapwile ngwe tumanguji sali ni sali kwe ku chitwamo, ni ndumba aali a kwola a kumana sali ni sali ku tumanguji.

¹⁹ Ku ngano jisambano ja unyinyino sali ni sali kwamanyine ndumba a kwola kumi ni aali. Kanda achilinga chuma cha kulifwa mu chifuchi nichimwe.

²⁰ Misenge yeswe ya mwanangana Solomone ya kunwinamo yapwile ya oru, ni yikwachilo yeswe ya zuwo lia usaki wa Lebano yapwile ya oru yipema. Ha matangwa a Solomone kalemesene prata nawa.

²¹ Mumu mwanangana wapwile ni mato a kuya ku Tashi hamwe ni ngamba ja Hurame. Kamuwika ha miaka yitatu, kamuwika ha miaka yitatu kwejile mato a ku Tashi nikuneha oru, ni prata, ni mazo a njamba, ni mahundu, ni pavao.

²² Chocho mwanangana Solomone wahianyine mianangana eswe a hashi ni upite ni mana.

²³ Ni mianangana eswe a hashi afupile kuheta kuli Solomone akevwe mana jenyi aze Zambi wasele mu mbunge yenyi.

²⁴ Mutu ni mutu wanehene mulambu wenyi; yikwachilo ya prata, ni yikwachilo ya oru, ni mazalo, ni mazalo a utale, ni tumbuto twa lupembo mupema, ni tuvwalu, ni mula—ya kwasela mwaka ha mwaka.

²⁵ Solomone wapwile ni tununu awana a yipatulo ya tuvwalu ni matemba, ni kumi lia tununu ni tununu aali a akwa tuvwalu, a kusela ku yihunda ya matemba ni mu Yerusaleme hamwe ni mwanangana.

²⁶ Aye wayulile helu lia mianangana eswe chize ku Lwiji ndo ku chifuchi cha A-Filistea ni ku njiza ya Engitu.

²⁷ Mwanangana wapwishile prata ngwe mawe mu Yerusaleme, ni mitondo ya sedru wayipwishile ngwe misuwa ya ha yikulo mumu ha kwoka.

²⁸ Yanehena Solomone tuvwalu a ku Engitu ni ku yifuchi yeswe.

²⁹ Mba yitanga yikwo ya Solomone, yitangu ni yasula, hanayisoneka mu sango ja profeta Natane, ni mu mukanda wa uprofeto wa Ahija Ka-Shilone, ni mu usolwelo wa mukwa kumona Ido, uze wakutwala kuli Jeroboame mwana Nebate.

³⁰ Solomone wayulile mu Yerusaleme helu lia A-Izalele eswe makumi awana a miaka.

³¹ Mba Solomone yaya tulo; yaya kuli tulamba twenyi. Yamufunda mu chihunda cha tato David mba mwanenyi Rehoboame yamuswana mu wanangana.