2 Sango Ja Mianangana 7 - MUKANDA USANDU WA ZAMBI 1975

¹ Muze Solomone hamana kulemba kwahulumukine kahia mwilu nikulalisa mulambu wa kulumba ni yitapo; ni uhenya wa Yehova yiuzalisa zuwo.

² Asasendote kahashile kunjila mu zuwo lia Yehova mumu uhenya wa Yehova hiwazalisa zuwo lia Yehova.

³ A-Izalele eswe yamona kahia kahulumukine ni uhenya wa Yehova shimbu yiutula ha zuwo, mba yahetamina ni meso jo hashi he ha mawe, ni kuwayila ni kusakwila kuli Yehova ngwo, Mumu iye mupema, mumu utu wa zango lienyi wa mutolo.

⁴ Mba mwanangana ni atu eswe yalambula yitapo kumeso ja Yehova.

⁵ Mwanangana Solomone yalambula yitapo, makumi aali a tununu ni tununu aali a ngombe, ni kulakaji lia tununu ni makumi aali a tununu a mapanga. Chocho mwanangana ni atu eswe aselele ku usandu lie zuwo lia Zambi.

⁶ Ni asasendote amanyine nikulita ni uvumbiko wo; ni A-Levi nawa ni yisaji ya Yehova yize mwanangana David walingile ya kusakwila nayo kuli Yehova mumu utu wa zango lienyi wa mutolo, muze David wahalishile ni uvumbiko wo. Ni asasendote yahumuna yitavwi kumeso jo, ni A-Izalele eswe yamana ha molu jo.

⁷ Chikwo nawa Solomone yasela ku usandu yize ya ha muchima kulutwe lia zuwo lia Yehova, mumu kwenako yalambula milambu ya kulumba, ni maji a ku milambu ya sambukila. Mumu chilumbilo cha unengu chize Solomone halinga, milambu ya kulumba, ni mulambu wa wunga, ni maji kuyateleho.

⁸ Chocho Solomone matangwa aze walingile chiwanyino matangwa shimbiali ni A-Izalele eswe hamuwika, chikungulwila chinene, chize ku unjililo wa Hamate ndo ku lwiji wa Engitu.

⁹ Ha tangwa liamuchinake yasanyika chikungulwila chilemu; mumu afungile kusela ku usandu cha chilumbilo matangwa shimbiali ni chiwanyino matangwa shimbiali.

¹⁰ Mba ha tangwa makumi aali ni liamuchitatu lia kakweji wamuchishimbiali yatuma atu ku mazuwo jo ni uwahililo ni chiseke mu mbunge mumu ha utu Yehova halinga kuli David, ni kuli Solomone, ni kuli atu jenyi A-Izalele.

¹¹ Chocho Solomone yamanununa zuwo lia Yehova ni zuwo lia mwanangana. Yize yeswe yapwile mu mbunge ya Solomone kulinga mu zuwo lia Yehova ni mu zuwo lienyi mwene yayimanuna kanawa kanawa.

¹² Mba Yehova yasoloka kuli Solomone ha ufuku; yamba kuli iye ngwenyi, Hinevwa kulemba che, hinalitongwela chihela chino kuli yami mwene chikapwe chilambwilo.

¹³ Nyi munguyika mwilu hanga vula kanda anoka, hanji mungutuma makumbi akonwone chifuchi, hanji mungutuma chilungo hakachi ka atu jami,

¹⁴ nyi atu jami waze hinaaluka jina liami malikehesa, ni kulemba, ni kufupa meso jami, ni kukatuka ku ndako jo jipi, ami mwilu mungupanjika, mungukonekena mutonga wo, munguwuka chifuchi cho.

¹⁵ Kashika meso jami malaula ni matwi jami mupanjika ku maliji aze malemba mu zuwo lino.

¹⁶ Mumu haliapwila binatongola zuwo lino nikulisela ku usandu hanga jina liami Ukapweko ndo ku miaka. Ni meso jami ni mbunge yami muyikapwako matangwa eswe.

¹⁷ Mba ha kutwala kuli yena, nyi muwenda kumeso jami ngwe tatenu David wendele, nikulinga nikulita ni yeswe hinakwamba, ni kufunga shimbi jami ni yiyulo yami,

¹⁸ mba mungukolesa ngunja ya wanangana we nikulita ni usendo wami ni tatenu David ngwami, Kukuchi kukuhona lunga wa kuyula Izalele.

¹⁹ Alioze nyi munutewuluka nikwehuka maliji jami ni shimbi jami jino hinasa kumeso jenu nukaye nikulingila mazambi eka nikwawayila,

²⁰ mba mungwatukula ku chifuchi chami chino hinaahacho; ni zuwo lino hinasela ku usandu mumu ha jina liami mungulimbila kumeso jami, mungulipwisa chishima ni kashilikilo hakachi ka mavungu eswe.

²¹ Zuwo lino hilianangama chocho, ha kulipalika, atu eswe makomoka ni kwamba ngwo, Kuchi te Yehova halinga chocho ku chifuchi chino ni ku zuwo lino?

²² Mba makumbulula ngwo, Mumu ehukile Yehova Zambi ya tulamba two, yoze waachijile ku chifuchi cha Engitu. Akwachile ku mazambi akwo nikwawayila nikwalingila; kashika iye haakokela yipi yino yeswe.