2 Sango Ja Mianangana 6 - MUKANDA USANDU WA ZAMBI 1975

¹ Henaho yahanjika Solomone ngwenyi, Yehova wambile ngwenyi, Mungutwama mu milima pwi.

² Ami hinakutungila zuwo ukatwamemo, m uma mwe mwa kutwama ndo ku miaka ya mutolo.

³ Mba mwanangana yalumuka kuwahisa chikungulwila cheswe cha A-Izalele. Chikungulwila cheswe cha A-Izalele chamanyine ha molu.

⁴ Yamba ngwenyi, Yehova afumane, mwe Zambi ya Izalele, yoze wahanjikile ni kanwa lienyi kuli tata David, mwenawo hachimanununa ni moko jenyi musono, ngwenyi,

⁵ Chize ku tangwa lize nachijile atu jami ku chifuchi cha Engitu, chatongwele chihunda nichimwe hakachi ka minyachi yeswe ya Izalele ngutungeko zuwo, jina liami likatwameko. Chikwo nawa chatongwele lunga niumwe apwe mwanangana wa atu jami A-Izalele.

⁶ Alioze binatongola Yerusaleme hanga jina liami Ukapweko; binatongola David akayule atu jami A-Izalele.

⁷ Chapwile mu mbunge ya tata David kutunga zuwo ha jina lia Yehova, mwe Zambi ya Izalele.

⁸ Alioze Yehova yamba kuli tata David ngwenyi, Chipema te chapwile mu mbunge ye kutunga zuwo ha jina liami.

⁹ Hindu hi yena ko mutunga lie zuwo, alioze mwané, yoze makatuka ku mujimba we, iye matunga zuwo ha jina liami.

¹⁰ Yehova hanakolesa liji lize wahanjikile. Mumu hinasalakana mu chitwamo cha tata David nikutwama ha ngunja ya Izalele ngwe Yehova walakenyene, mba hinatunga zuwo ha jina lia Yehova, mwe Zambi ya Izalele.

¹¹ Mwenamo hinasa mushete, muze mwatwama usendo wa Yehova uze wakolesele ni A-Izalele.

¹² Yamana kulutwe lia chilumbilo cha Yehova kumeso ja chikungulwila cheswe cha A-Izalele, yazoza moko jenyi kwilu.

¹³ (Mumu Solomone te hatunga ndondelo ya unengu, kusuha chayo mbandu jitano, kutoha chayo mbandu jitano, Chizundamo chayo mbandu jitatu; hayisa muchima lia yize. Yamanaho, mba yaliumba ha makungunwa jenyi kumeso ja chikungulwila cheswe cha A-Izalele, nikuzoza moko jenyi kwilu.)

¹⁴ Ngwenyi, Yehova, Zambi ya Izalele, kukushi niumwe Zambi ngwe yena chipwe mwilu, chipwe hashi. Kuwakufunga usendo ni utu wa zango ni tuvumbi twe, waze akwenda kumeso je ni mbunge jo jeswe.

¹⁵ Hiwalinga ni tata David kavumbi ke chize hiwalakenya nenyi. Ewa, wahanjikile ni kanwa lie; hiwachilinga ni kwoko lie ngwe hichapwa musono.

¹⁶ Kashika, Yehova, Zambi ya Izalele, linga ni kavumbi ke tata David chize walakenyene nenyi ngwe, Kukuchi kukuhona umwe lunga kumeso jami kutwama ha ngunja ya Izalele, nyi kachi ané manyonga ha jila yo akende mu shimbi yami chizechene ngwe yena hiwenda kumeso jami.

¹⁷ Kashika Yehova, Zambi ya Izalele, ngunalembe, liji lie likalingiwe, lize wambile kuli kavumbi ke David.

¹⁸ Alioze pundu, Zambi matwama ni atu hano hashi nyi? Chipwe lilu ni lilu lia malilu kuliakutele. Mba zuwo lino hinakutungila kuchi?

¹⁹ Alioze panjika kama ku kulemba cha yami kavumbi ke, ni ku kuliumba chami, Yehova Zambi yami. Panjika ku muteto wa kulemba cha yami kavumbi ke.

²⁰ Meso je akalaule kutala ku zuwo lino mwalwa ni Ufuku, kwe kuma kuno hiwamba ngwe, Mungusako jina liami; ukapanjike ku kulemba chize kavumbi ke makalemba nikutalikisa kuma kuno.

²¹ Panjika ku kuliumba cha kavumbi ke ni ku kuliumba cha atu je A-Izalele muze malemba nikutalikisa kuno. Panjika mwilu amo watwama; ni ha kupanjika, utukonekene kama.

²² Nyi mutu mavulumuna mwenyembo wenyi, mba mamwaha shingo akalishinge, neye meza ni kulishinga kumeso ja chilumbilo che mu zuwo lino,

²³ hipanjika yena mwilu ukalinge, ukapatwile tuvumbi twe, ukafwetese chivulumunyi nikuholola ndako jenyi ha mutwe wenyi. Mba sambisa mukwa ululi ukamwehe nikulita ni ululi wenyi.

²⁴ Nyi atu je A-Izalele maalamba kuli akwa kole jo mumu hakuvulumuna; mba mutewuluka, ni kutayiza jina lie, ni kulemba, ni kuliumba kumeso je mu zuwo lino,

²⁵ upanjike yena mwilu ukakonekene mutonga wa atu je A-Izalele, ukaanehe nawa mu chifuchi chino wachihanyine kuli ayo ni kuli tulamba two.

²⁶ Muze lilu liapwa lia kuyika, kukushi vula, mumu hakuvulumuna, nyi malemba nikutalikisa kuma kuno, ni kutayiza jina lie, ni kuhichika mutonga wo muze mukaalamba,

²⁷ hipanjika yena mwilu ukakonekene mutonga wa tuvumbi twe, ni wa atu je A-Izalele, muze mukaalongesa jila yipema yize chaatamba kwendelamo; utume vula ha chifuchi che chize hiwahana chikapwe chihinga cha atu je.

²⁸ Nyi kachi mukukapwa mu chifuchi hanji kapunga, hanji chilungo, hanji yimbwo ngo, hanji makonya, hanji makumbi, hanji yambi; nyi kachi akwa kole jo maaseleka mu chifuchi cha yihunda yo; musongo weswawo, kuyiza cheswacho muchiakwata,

²⁹ mba kulemba cheswacho cha mutu umwe, hanji cha atu je eswe A-Izalele, mutu mweswe ha kunyingika chilungo chenyi ni chinyengo chenyi, te cheswacho maliumba nikuzoza moko jenyi ku zuwo lino,

³⁰ hipanjika yena mwilu watwama ukaakonekene, ni kuhana kuli mutu mweswe nikulita ni ndako jenyi jeswe, mbunge yenyi unanyingika; (mumu yena wika ukawe unanyingika mbunge ja ana ja atu eswe)

³¹ hanga akakuvwile woma, ni kwenda mu majila je matangwa eswe matwama mu chifuchi wachihanyine kuli tulamba twetu.

³² Ha kutwala kuli chilambala nawa, hi Ka-Izalele ko, muze makatuka ku chifuchi kusuku mumu ha jina lie linene, ni kwoko lie lia ndundo, ni kwoko lie lia kwolola; muze meza akalembe nikutalikisa ku zuwo lino,

³³ hipanjika yena mwilu amo watwama, ukalinge nikulita ni chize chilambala anakulembela, hanga mavungu eswe a hashi anyingike jina lie, akakuvwile woma ngwe atu je A-Izalele akukuvwilawo, akanyingike zuwo lino hinatunga hanaliluku jina lie.

³⁴ Nyi kachi atu je maya ku jita ni akwa kole jo, jila yeswayo mukaatuma, no malemba kuli yena nikutalikisa ku limbo lino hiwatongola, ni ku zuwo hinatunga ha jina lie,

³⁵ hipanjika yena mwilu ku kulemba cho ni ku kuliumba cho ukakolese chikuma cho.

³⁶ Nyi makuvulumuna (mumu kukushi mutu yoze kavulumwine) ni yena mukatenuka no ni kwakunjika kuli akwa kole jo akaatwale funge ku chifuchi chikwo chipwe kusuku, chipwe hakamwihi,

³⁷ chipwe chocho, nyi manyonga mu chifuchi kuze haatwala funge, akatewuluke, akaliumbe mu chifuchi cha ufunge wo ngwo, Hitwavulumuna, hitwalinga ni kupiya, hitwalinga ungulungulu;

³⁸ nyi mahiluka kuli yena ni mbunge jo jeswe, ni mwono wo weswe, mu chifuchi cha ufunge wo kuze haatwala funge, akalembe nikutalikisa ku chifuchi cho chize wahanyine kuli tulamba two, ni ku limbo lize hiwatongola, ni ku zuwo lino hinatunga ha jina lie,

³⁹ hipanjika yena mwilu amo watwama, ku kulemba cho ni ku kuliumba cho ukakolese chikuma cho ni kukonekena atu je hakuvulumuna.

⁴⁰ Zambi yami, ngunaliumbu, meso je alaule, matwi je apanjike ku kulemba chize muchikapwa kuma kuno.

⁴¹ Kashika, Yehova Zambi, njila muma mwe mwa uhwimino, yena ni mushete wa tachi je. Yehova Zambi, asasendote je azale mazalo a ulamwino, asandu je awahilile mu utu.

⁴² Yehova Zambi, kanda utewulula meso ja yoze hiwamuwayisa! Iwuluka utu wa zango wa kavumbi ke David.