2 Sango Ja Mianangana 5 - MUKANDA USANDU WA ZAMBI 1975

¹ Chocho milimo yeswe ya Solomone mu zuwo lia Yehova yayimana. Mba Solomone yaneha vuma yize tato David hatumbikila; ni prata, ni oru, ni yikwachilo yeswe, yayisa mu upite wa zuwo lia Zambi.

² Mba Solomone yakungulula makulwana a Izalele, ni akwa lutwe eswe a minyachi, ni alemu a mazuwo ja atato a A-Izalele ku Yerusaleme, akasake mushete wa usendo wa Yehova ku limbo lia David, ngwami, Zaione.

³ Mba malunga eswe a Izalele yakungulukila kuli mwanangana ha matangwa a chiwanyino ha kakweji wamuchishimbiali wa mwaka.

⁴ Makulwana a Izalele yeza eswe, mba A-Levi yazundula mushete.

⁵ Yaneha mushete, ni mbalaka ya chikungulwila, ni yikwachilo yeswe yisandu ya mu mbalaka, ayo yeswe asasendote A-Levi yayineha.

⁶ Mwanangana Solomone ni chikungulwila cheswe cha Izalele waze hakungulukila kuli iye, te kanamana hamwe nenyi kumeso ja mushete nikushiha mapanga ni ngombe kechi kuhasa kwaalula mumu oka naye.

⁷ Mba asasendote yaneha mushete wa usendo wa Yehova kuma kwawo mu uhanjikilo wa zuwo, mwe muma musandu mwahiana, mushi lia mapulwa ja akerupimi.

⁸ Mumu akerupimi te kanolola mapulwa jo helu lia chitwamo cha mushete ni kufuka mushete ni mikambo yawo helu.

⁹ Mikambo yasuha, chocho masongo jayo amonekene ku mushete kulutwe lia uhanjikilo. Alioze kayimwene haze. Kwenako yatwama ndo musono.

¹⁰ Kumwapwile nichimwe mu mushete shina mawe aali aze Mose waselemo ku Horepe muze Yehova yakolesa usendo ni A-Izalele ha kukatuka ku Engitu.

¹¹ Mba muze asasendote atuhukile muma musandu (mumu asasendote eswe waze apwileko halipemesa, alioze kalingile nikulita ni ngango jo;

¹² chikwo nawa njimba ja A-Levi eswe, Asafwe ni Hemane ni Yedutune ni ana jo ni usoko wo, kanazala linyu lipema, ni kukwata sembalu ni yisaji ya kusa ni tulialia, kanamana ku sali lia chilumbilo lia ku Chivumbuko hamuwika ni kulakaji lia asasendote ni makumi aali a asasendote nikuhumuna yitavwi);

¹³ mba muze akwa yitavwi ni njimba apwile ngwe mutu umuwika nikuhana liji limuwika lia kuhalisa ni kusakwila Yehova, ni muze liji lio liahiohiele hamwe ni yitavwi, ni sembalu, ni yisaji nikuhalisa Yehova, ngwo, Mumu iye mupema, mumu utu wa zango lienyi wa mutolo: henaho zuwo lieswe, lie zuwo lia Yehova liazalile ni lelwa.

¹⁴ Kashika asasendote kahashile kumana nikuvumbika, mumu ha lelwa; mumu uhenya wa Yehova wazalishile zuwo lia Zambi.