2 Sango Ja Mianangana 4 - MUKANDA USANDU WA ZAMBI 1975

¹ Yalinga nawa chilumbilo cha unengu; ha kusuha makumi aali a mbandu, ha kutoha makumi aali a mbandu, ni chizunda mo kumi lia mbandu.

² Yalinga lutanke lwa kuzuzulula lwa kumi lia mbandu chize ku mukomo ndo ku mukomo. Lwapwile lwa chikelula; Chizundamo chalwo cha mbandu jitano. Ha kujingilika cheseko chalwo makumi atatu a mbandu.

³ Kushi lialwo kwapwile ngwe kulifwa cha ngombe a kujingilikako ha kumi lia mbandu jinguluke kweswe. E ngombe apwile mu mikala yiali a kuzuzulula hamuwika nalwo.

⁴ Yilutwama ha kumi lia ngombe ni ngombe aali, atatu atalile ku Norte, atatu atalile ku Chitokelo, atatu atalile ku Sule, ni atatu atalile ku Chivumbuko. Asele lutanke hali ayo helu; michila yo yeswe yatala muchima.

⁵ Ndama yalwo ya mbanda-kwoko, ni mukomo walwo yaulinga ngwe mukomo wa ndeho, ngwe chitemo cha lirio. Lwakwachile tununu atatu a *mbate.

⁶ Yalinga nawa kumi lia yimbasia. Yasa yitano ku chindume ni yitano ku chimeso akakoselemo. Yuma yeswe ya milambu ya kulumba ayikoselelemo ahoze asasendote asanyinyine mu lutanke.

⁷ Yalinga kumi lia yikwachilo ya ndeya ya oru nikulita ni shimbi yayo. Yayisa mu tembele, yitano ku chindume, yitano ku chimeso.

⁸ Yalinga nawa kumi lia mesa. Yajisa mu tembele, jitano ku chindume, jitano ku chimeso. Yalinga nawa kulakaji lia mbasia ja oru.

⁹ Chikwo nawa yalinga yize ya asasendote, ni yize yinene, ni mapito a yize, yalamika unengu ha mapito.

¹⁰ Yasa lutanke ku sali lia chindume ku Chivumbuko kwakutala ku Sule.

¹¹ Hurame yalinga ndeho, ni mapá, ni mbasia. Chocho Hurame yamanyisa milimo yize alingilile mwanangana Solomone mu zuwo lia Zambi:

¹² manguji aali, ni mawundu a yipangula yiali ya ha masongo a manguji, ni manda aali a kuseleka a kufuka mawundu aali a yipangula ya ha masongo a manguji,

¹³ ni kulakaji awana a romana ha manda aali (te mikala yiali ya romana ha wanda umwe) kufuka mawundu aali a yipangula ya ha masongo a manguji.

¹⁴ Yalinga nawa yimanyino ni yimbasia ya kusa ha yimanyino;

¹⁵ ni lutanke lumuwika ni ngombe kushi lialwo kumi ni aali,

¹⁶ ni ndeho nawa, ni mapá, ni nguto ja misako, ni yikwachilo yako yeswe ya unengu wa kulejima, mwe Hurame-Avive yayilinga hali mwanangana Solomone ya mu zuwo lia Yehova.

¹⁷ Ha chikulo cha Yordau mwe mwanangana yayizuzulula mu mavu a uma hakachi ka Sukote ni Zereda.

¹⁸ Chocho Solomone yalinga yikwachilo yino yeswe ya kulumbama, mumu kahashile kwalula pezu ya unengu.

¹⁹ Solomone yalinga yikwachilo yeswe ya mu zuwo lia Zambi, ni chilumbilo cha oru nawa ni mesa ja kusa mbolo ja kutumbieka;

²⁰ ni yikwachilo ya ndeya ni ndeya jaho ja oru yipema jitemuke nikulita ni shimbi kumeso ja uhanjikilo,

²¹ ni yitemo, ni ndeya, ni mana ja ndeya, yeswe ya oru—ye oru yipema,

²² ni mana, ni mbasia, ni nguto, ni yikombelo, yeswe ya oru yipema; ni ha kunjila mu zuwo, mapito a muchima jalio ja muma musandu mwahiana, ni mapito a zuwo lia tembele apwile a oru.