2 Sango Ja Mianangana 36 - MUKANDA USANDU WA ZAMBI 1975

¹ Henaho atu a chifuchi yanda Jehoahaze mwana Josia, yamuswanyisa wanangana wa tato mu Yerusaleme.

² Ha kuputuka kuyula Jehoahaze wapwile ni makumi aali a miaka ni miaka yitatu. Wayulile tukweji atatu mu Yerusaleme.

³ Mwanangana wa Engitu yamuchiza ku wanangana ku Yerusaleme. Ha chifuchi yasela lijimu lia kulakaji lia *talentu ja prata ni *talentu yimuwika ya oru.

⁴ Mwanangana wa Engitu wapwishile mwanakwo Eliakimi mwanangana wa Yunda ni Yerusaleme. Yamwaha jina lieka ngwenyi, Jehoakime. Mba Neko yakwata yayo Jehoahaze, yamutwala ku Engitu.

⁵ Ha kuputuka kuyula Jehoakime wapwile ni makumi aali a miaka ni miaka yitano; mba wayulile kumi lia miaka ni mwaka umuwika mu Yerusaleme. Walingile chipi kumeso ja Yehova Zambi yenyi.

⁶ Nabukanezore mwanangana wa Babilonia yeza kulimika nenyi. Yamukashila mu kúli akamutwale ku Babilonia.

⁷ Nabukanezore yambata ku Babilonia nawa yimwe ya yikwachilo ya mu zuwo lia Yehova, yayisa mu tembele yenyi ku Babilonia.

⁸ Yitanga yikwo ya Jehoakime ni yizelwokeso yenyi yize alingile, ni chize awanyine muli iye hanayisoneka mu mukanda wa mianangana ja Izalele ni Yunda. Mba mwanenyi Jehoachine yamuswana mu wanangana.

⁹ Ha kuputuka kuyula Jehoachine wapwile ni miaka nake. Wayulile tukweji atatu ni kumi lia matangwa mu Yerusaleme. Yalinga chipi kumeso ja Yehova.

¹⁰ Ha kwalumuka cha mwaka mwanangana Nabukanezore yatuma, yamutwala ku Babilonia, hamuwika ni yikwachilo yipema ya zuwo lia Yehova. Yapwisa yayo Zedekia mwanangana wa Yunda ni Yerusaleme.

¹¹ Ha kuputuka kuyula Zedekia wapwile ni makumi aali a miaka ni mwaka umuwika. Wayulile mu Yerusaleme kumi lia miaka ni mwaka umuwika.

¹² Walingile chipi kumeso ja Yehova Zambi yenyi; kalilelesele kumeso ja profeta Jeremia nikuhanjika ya ku kanwa lia Yehova.

¹³ Aye nawa yakatukila Nabukanezore; te hanamushingisa ni jina lia Zambi. Alioze yakwata pami nikukalisa mbunge yenyi kanda yitala kuli Yehova, Zambi ya Izalele.

¹⁴ Chikwo nawa asasendote akwa lutwe eswe, ni e atu avulumwine chikolo nikulita ni yizelwokeso yeswe ya mavungu. Yachisa zuwo lia Yehova lize iye te hasela ku usandu mu Yerusaleme.

¹⁵ Yehova Zambi ya tulamba two yaatuma tunganda twenyi, che kulimeneka ni kutumatuma mumu keke ya atu jenyi ni zuwo lienyi.

¹⁶ Alioze alenyene tunganda twa Zambi; yalelesa maliji jenyi; ni kuchimbunguna aprofeta jenyi ndo ufwatulo wa Yehova wavundukile kulimika ni atu jenyi, mumu chize malinga kwakwasa chakuhi nawa.

¹⁷ Kashika yatuma hali ayo mwanangana wa Kaletea. Aye yashiha akweze jo ni katana mwe mu zuwo lio lisandu. Kevwilile keke mukweze, chipwe mwana-pwo, chipwe kashinakaji chipwe kalamba. Yaakunjika eswe mu moko jenyi.

¹⁸ Ni yikwachilo yeswe ya mu zuwo lia Zambi, yinene ni yikepe, ni upite wa mu zuwo lia Yehova, ni upite wa mwanangana ni alemu jenyi—ayo yeswe yayimbata ku Babilonia.

¹⁹ Yocha zuwo lia Zambi; yapuzula chipanga-cha-mawe cha Yerusaleme nikwocha palasiu jamo jeswe ni kahia ni kwenyeka yikashi yamo yeswe yipema.

²⁰ Waze kafwile ni katana yaambata ku Babilonia. Apwile ndungo kuli iye ni ana jenyi ndo ku chiyulo cha wanangana wa Persia,

²¹ akamanunune liji lia Yehova ku kanwa lia Jeremia, ndo chifuchi hichahwima masambata jacho, mumu shimbu chatwamine cha hululu chahwimine Sambata, akamanunune makumi shimbiali a miaka.

²² Ha mwaka utangu wa Siru mwanangana wa Persia, hanga liji lia Yehova ku kanwa lia Jeremia likamanunuke, Yehova yasangumuna mbunge ya Siru mwanangana wa Persia akasanyike mutambi ndusu mu wanangana wenyi weswe. Yausoneka nawa ngwenyi,

²³ Siru mwanangana wa Persia ngwenyi, Yehova Zambi ya mwilu hangwaha mawanangana eswe a hashi. Mba iye hangwaha shimbi kumutungila zuwo mu Yerusaleme mu chifuchi cha Yunda. Mweswawo uliko hakachi ka yenu eswe atu jenyi, aye akanduke, ni Yehova Zambi yenyi apwe hamwe nenyi.