2 Sango Ja Mianangana 34 - MUKANDA USANDU WA ZAMBI 1975

¹ Ha kuputuka kuyula Josia wapwile ni miaka nake, mba wayulile makumi atatu a miaka ni mwaka umuwika mu Yerusaleme.

² Walingile chipema kumeso ja Yehova nikwenda mu majila ja kalamba kenyi David. Kapiangukile chipwe ku chindume chipwe ku chimeso.

³ Mumu ha mwaka wamuchinake wa kuyula chenyi shimbu achili mukweze waputukile kufupa mwe Zambi ya kalamba kenyi David, mba ha mwaka kumi ni wamuchiali waputukile kupemesa Yunda ni Yerusaleme ku yuma ya manangamo, ni Ashera ni tuponya twa kwola ni twa kuzuzulula.

⁴ Yapuzula yilumbilo ya Ambale kumeso jenyi, ni yilumbilo ya insensu yize yapwile helu liayo chikolo yaateta. Ni Ashera ni tuponya twa kwola ni twa kuzuzulula yamakuna ni kufwenyona wungawunga, mba yaumwanga ha mafuka ja waze apwile nikwashihila yitapo.

⁵ Yifwaha ya asasendote yayochela ha yilumbilo yo, nikupemesa Yunda ni Yerusaleme.

⁶ Yalinga chocho nawa mu yihunda ya Manase, ni Eframe, ni Simeone, ni ndo ku Napatali mu yikulu yo ya kujingilika.

⁷ Yapuzula yilumbilo; yafwenyona wungawunga Ashera ni tuponya twa kwola; yatetateta yilumbilo yeswe ya insensu ndusu chifuchi cheswe cha Izalele, mba yahiluka ku Yerusaleme.

⁸ Ha mwaka kumi ni wamuchinake wa kuyula chenyi muze hapemesa chifuchi, ni lie zuwo, yatuma Shafane mwana Azalia, ni Maseia mukwa kuyula chihunda, ni Joa mwana Joahaze, mukwa kusonyeka, akalulike zuwo lia Yehova Zambi yenyi.

⁹ O yeza kuli sasendote mukwa lutwe Hilekia; yamwaha mbongo jize te haneha mu zuwo lia Zambi, jize A-Levi akwa kufunga mapito hatambula kuli A-Manase ni A-Eframe ni kuli waze asalile a kuli A-Izalele, ni kuli A-Yunda ni A-Mbenjamine eswe, ni kuli akwa Yerusaleme.

¹⁰ Yajihana kuli akwa milimo aze te analayila zuwo lia Yehova. Ni akwa milimo waze alingile mu zuwo lia Yehova yajihana akalulike ni kutungulula lie zuwo,

¹¹ kuli akarpinteru ni akwa kutunga yajihana akalande mawe a kusonga, ni mitondo ha manungino, ni ha mikambo mu mazuwo aze mianangana ja A-Yunda hanenyeka.

¹² Akwa milimo ahondanganyine ni mbunge. Tulayi twa milimo, akwa kuyisenyesa kulutwe Jahate ni Obadia, A-Levi a ku munyachi wa Merari; ni Zekaria ni Meshulame a ku munyachi wa A-Kohate; ni A-Levi akwo, eswe njimba a yisaji ya miaso.

¹³ Alayilile nawa akwa yiteli, nikwendesa milimo yeswe yeka ni yeka. Akwa kusonyeka, ni tupita, ni akwa mapito, eswe apwile a kuli A-Levi.

¹⁴ Ha kuchiza mbongo jize anehene ku zuwo lia Yehova, sasendote Hilekia yawana mukanda wa shimbi ja Yehova ahanyine kuli Mose.

¹⁵ Hilekia yamba kuli Shafane mukwa kusonyeka ngwenyi, Hinawana mukanda wa shimbi mu zuwo lia Yehova. Hilekia yahana mukanda kuli Shafane.

¹⁶ Shafane yatwala mukanda kuli mwanangana. Yamunehena liji nawa ngwenyi, Tuvumbi twenu kanalingi milimo yeswe nwaatumine.

¹⁷ Te hanachiza mbongo jeswe awanyine mu zuwo lia Yehova ni kujihana kuli tulayi ni kuli akwa milimo.

¹⁸ Ni Shafane mukwa kusonyeka yambulwila mwanangana ngwenyi, Sasendote Hilekia hangwaha mukanda, mba Shafane yautanga kuli mwanangana.

¹⁹ Ha kwivwa maliji a shimbi mwanangana yasonya mazalo jenyi.

²⁰ Mwanangana yatuma Hilekia, ni Ahikame, mwana Shafane, ni Abadone mwana Mika, ni Shafane mukwa kusonyeka, ni Asaia kaselo ka mwanangana ngwenyi,

²¹ Yénu nuhule kuli Yehova hali yami ni hali waze anasala ja A-Izalele ni A-Yunda ha kutwala ku maliji a mukanda uno hinwawana; mumu ufwatulo wa Yehova wunji chikolo unazukuka hali yetu mumu atata kafungile liji lia Yehova kulinga nikulita ni yeswe yinasonewa mu mukanda uno.

²² Chocho Hilekia ni waze mwanangana hatuma yaya kuli profeta wa pwo Huleda, pwo lia Shalume mwana Tikiva, mwana Hashara, mukwa kufunga mazalo (aye Watwamine mu Yerusaleme mu chihanda chamuchiali), yahanjika nenyi pande jino.

²³ Aye yamba kuli ayo ngwenyi, Yehova, Zambi ya Izalele, kanambe ngwenyi, Ambulwilenu lunga yoze wanutumine kuli yami ngwenu,

²⁴ Yehova kanambe ngwenyi, Mungukoka chipi ha chifuchi chino ni hali atu jamo, chipwe mashingo eswe anasonewa mu mukanda hatanga kuli mwanangana wa Yunda.

²⁵ Mumu hanangwehuka; hanochela insensu mazambi akwo akangwihie ku utenu ni yitanga yeswe ya moko jo. Kashika ufwatulo wami unazukuka ha chifuchi chino, mba kuuchi kahola.

²⁶ Alioze kuli mwanangana wa Yunda yoze wanutumanga kuhula kuli Yehova, munwamba kuli iye ngwenu, Yehova, Zambi ya Izalele, kanambe ngwenyi, Ha kutwala ku maliji hiwevwa,

²⁷ mumu mbunge ye yapwile yovu, ni yena walilelesele kumeso ja Zambi ha kwivwa maliji jenyi a kulimika ni chifuchi chino ni atu jamo, hiwalilelesa kumeso jami, hiwasonya mazalo je nikulila kumeso jami, ni yami hinakupanjika, chocho kanambe Yehova.

²⁸ Kashika mungukutwala kuli tulamba twe, kumuoya ku fuka lie ni sambukila, ni meso je kechi kamona chipi chize cheswe munguneha ha chifuchi chino ni hali atu jamo. Mba yaneha liji lino kuli mwanangana.

²⁹ Henaho mwanangana yatuma kukungulula makulwana eswe a Yunda ni Yerusaleme.

³⁰ Mwanangana yakanduka ku zuwo lia Yehova hamwe ni malunga eswe a Yunda ni akwa Yerusaleme, ni asasendote, ni A-Levi, ni atu eswe anene ni akepe. Yatanga mu matwi jo maliji eswe a mukanda wa usendo awanyine mu zuwo lia Yehova.

³¹ Mwanangana yamana homa henyi; yakolesa usendo kumeso ja Yehova akaule Yehova, kufunga maliji jenyi, ni Shindakenyo jenyi, ni yiyulo yenyi, ni mbunge yenyi yeswe ni mwono wenyi weswe, akalinge maliji a usendo a kusoneka mu mukanda uno.

³² Eswe aawanyine mu Yerusaleme ni mu Mbenjamine yaashinjika aukolese. Ni akwa Yerusaleme yalinga nikulita ni usendo wa Zambi, Zambi ya tulamba two.

³³ Mba Josia yachiza yizelwokeso mu yifuchi yeswe yapwile ya A-Izalele. Yashinjika eswe a mu Izalele kulingila Yehova Zambi yo. Matangwa jenyi eswe kalitwaminyine kukaula Yehova Zambi ya tulamba two.