2 Sango Ja Mianangana 32 - MUKANDA USANDU WA ZAMBI 19751 Kulutwe lia yino yuma ni yitanga yino ya umwenemwene yikwiza Senakeribe mwanangana wa A-Asuria. Yanjila mu Yunda, yasa yilombo yenyi ku yihunda ya yipanga-ya-mawe ngwenyi, Munguyizuka yami. 2 Mba muze Hezekia hamona kwiza cha Senakeribe, ni mbunge yenyi ya kwasa jita ni A-Yerusaleme, 3 yatwama punga ni alemu jenyi ni akwa ndundo jenyi akajike mafuji a meya waze ali haze lia chihunda, mba o yamukwasa. 4 Chocho atu anji yakunguluka. Yajika mafuji a meya eswe, ni lwiji yoze wapalika hakachi ka chifuchi ngwo, Muze mianangana ja Asuria meza kechi kuwana meya anji. 5 Mba yahamuka, yatunga nawa chipanga-cha-mawe chize chinapuzuka. Yachisuhisa nawa ndo ku tuposhi, ni chipanga-cha-mawe chikwo cha haze. Yakolesa Milo mu chihunda cha David ni kufula yitwa ni kepwe ya kulumbama. 6 Yatongola tupitau twa jita helu lia atu. Yaakungulwila kuli iye mu lwaza ku chikolo cha chihunda nikwalembejeka ngwenyi, 7 Takamenu ni hamu, kanda nwivwa woma hanji mwongo wa mwanangana wa Asuria chipwe wa mbunga yize ali nayo: mumu yetu tuli ni umwe munene Wahiana, iye keshi nenyi. 8 Iye kali ni kwoko lia musunya, alioze yetu tuli ni Yehova Zambi yetu kutukwasa ni kutwashila jita. Ni e atu ajikijilile ha maliji a Hezekia mwanangana wa Yunda. 9 Kulutwe Senakeribe mwanangana wa Asuria (iye te kulutwe Ha Lakishi ali, ni maswalale jenyi eswe) yatuma tuvumbi twenyi ku Yerusaleme kuli Hezekia mwanangana wa Yunda ni A-Yunda eswe a mu Yerusaleme ngwenyi, 10 Senakeribe mwanangana wa Asuria kanambe ngwenyi, Hahi nunafuliela mba nunalikoleza mu chihunda cha Yerusaleme cha kuseleka? 11 Hezekia kananulembejeka akanutwale ku kufwa cha zala ni pwila ha kwamba ngwenyi, Yehova Zambi yetu kumatupulula ku kwoko lia mwanangana wa Asuria. 12 Yono Hezekia te kachijile manangamo jenyi ni yilumbilo yenyi, ni kwamba kuli A-Yunda ni A-Yerusaleme ngwenyi, Munuwayila ku chilumbilo chimuwika, ni lienalio munwochela insensu? 13 Te kunwanyingikine chize yami ni atata hitwalinga kuli atu eswe a yifuchi? Mazambi a mavungu a yifuchi te hahasa kupulula chifuchi cho mu kwoko liami nyi? 14 Hakachi ka mavungu aze atata akuwishile, mwe zambi muka hakachi ka mazambi eswe wahashile kupulula atu jenyi ku kwoko liami? Nyi chocho mba Zambi yenu mahasa kunupulula ku kwoko liami? 15 Kashika kanda nutayiza Hezekia kunwonga chocho, hanji kunukununa. Kanda numutá mumu niumwe zambi wa mavungu eswe ni mawanangana eswe hahasa kupulula atu jenyi ku kwoko liami, chipwe ku moko ja atata. Nyi o kahashile, mba Zambi yenu mahasa kunupulula ku kwoko liami? 16 Tuvumbi twenyi yaweza nawa kuhanjika cha kulimika ni Yehova Zambi ni kavumbi kenyi Hezekia. 17 Yasoneka nawa mikanda ya kuchoka Yehova Zambi ya Izalele ni kulimika nenyi ngwenyi, Chizechene ngwe mazambi a mavungu a yifuchi kapulwile atu jo ku kwoko liami, ni mwe Zambi ya Hezekia kechi kupulula atu jenyi ku kwoko liami. 18 Mba yakololoka mu limi lia A-Yunda kuli akwa Yerusaleme aze apwile ha chipanga-cha-mawe kwakolesa mwongo ni kwapinjisa hanga atambule chihunda. 19 Yahanjika ha kutwala kuli Zambi ya Yerusaleme ngwe chimuwika apwa ni mazambi a mavungu a hashi, a kulinga ni moko ja atu. 20 Mba mwanangana Hezekia ni profeta Izaia mwana Amoze yalemba ni kuteta kwilu mumu ha chuma chino. 21 Mba Yehova yatuma mungelo akapatule yitakame akwa hamu eswe, ni tusongo, ni tupitau mu chilombo cha mwanangana wa Asuria. Chocho yahiluka ni sonyi ku chifuchi chenyi. Mba ha kuheta ku zuwo lia zambi yenyi, waze asemukine ku mujimba wenyi mwene yamushihilako ni katana. 22 Chocho Yehova yalamwina Hezekia ni akwa Yerusaleme ku kwoko lia Senakeribe mwanangana wa Asuria, ni ku moko ja eswe ni kwafunga sali ni sali. 23 Anji anehene milambu kuli Yehova mu Yerusaleme, ni yuma ya ndando yikalu kuli Hezekia mwanangana wa Yunda; kashika chize ku matangwa aze iye watunjile kumeso ja mavungu eswe. 24 Ha matangwa aze Hezekia yayiza musongo wa kufwa. Yalemba kuli Yehova, mba yamukumbulula, yamwaha chilayi. 25 Alioze Hezekia kakundulwile kuli Zambi nawa nikulita ni chipema chize hamulinga. Mbunge yenyi yiyilifuza, kashika ufwatulo wejile hali iye ni ha Yunda ni Yerusaleme. 26 Alioze Hezekia yalikehesa mumu ha kulengumuka cha mbunge yenyi, iye ni akwa Yerusaleme hamwe, kashika ufwatulo wa Yehova kuwejile hali ayo ha matangwa a Hezekia. 27 Hezekia wapwile ni upite ni ulemu wa kulumbama. Yalitungila mazuwo a kutulikila prata, ni oru, ni mawe alemu ngwe diamante, ni tumbuto twa lupembo mupema, ni kepwe, ni milali yeka ni yeka ya yikashi yipema; 28 ni mazuwo a kuswekela mbuto, ni vinyu, ni maji; ni mazuwo a yimuna eka ni eka, ni malimba ja mapanga ni pembe. 29 Watungilile yihunda, wapichile nawa matanga a pembe, ni mapanga, ni ngombe a kulumbama mumu te Zambi hamwaha yikumba yinji. 30 Mwe Hezekia yono nawa washichile fuji lia ku tunda lia meya a Ngehone, yaaneha pundu ku chihunda cha David ha sali lia ku Chitokelo. Mba Hezekia wawahile mu yitanga yenyi yeswe. 31 Alioze ha chikuma cha mikeji a kuli alemu a Babilonia waze atumine kuhula ha yipupu yize alingile mu chifuchi, Zambi yamwecha akamweseke akanyingike yize yeswe ya mu mbunge yenyi. 32 Yitanga yikwo ya Hezekia ni yilinga yenyi yipema, hanayisoneka mu usolwelo wa profeta Izaia mwana Amoze mu mukanda wa mianangana ja Yunda ni Izalele. 33 Mba Hezekia yaya tulo, yaya kuli tulamba twenyi. Yamufunda mu ukandukilo wa mafuka ja ana ja David. A-Yunda eswe ni A-Yerusaleme eswe yamulemesa ha kufwa chenyi, ni mwanenyi Manase yamuswana mu wanangana. |
Chokwe Bible © Bible Society in Angola, 1975.
Bible Society in Angola