2 Sango Ja Mianangana 30 - MUKANDA USANDU WA ZAMBI 1975

¹ Hezekia yatuma kuli A-Izalele eswe ni A-Yunda ni kusoneka mikanda nawa kuli A-Eframe ni A-Manase eze ku zuwo lia Yehova ku Yerusaleme, mukufunga Chizomboka kuli Yehova Zambi ya Izalele.

² Mumu mwanangana te hakwata chiyulo ni alemu jenyi ni chikungulwila cheswe mu Yerusaleme akalie Chizomboka ha kakweji wamuchiali.

³ Mumu kahashile kuchifunga ha kakweji wacho, mumu asasendote anji kanda alisela ku usandu, ni e atu kanda achikunguluka ku Yerusaleme.

⁴ Chuma chapemene kumeso ja mwanangana ni chikungulwila cheswe.

⁵ Kashika yakolesa shimbi kusanyika mutambi ndusu mu Izalele mweswe chize ku Mbia-shipa ndo ku Ndane, akeze ku Yerusaleme kufunga Chizomboka cha Yehova Zambi ya Izalele, mumu te kachifungile atu anji nikulita ni je sona.

⁶ Kashika mikeji yaya ni mikanda ya mwanangana ni alemu jenyi, ndusu Izalele ni Yunda mweswe. Yatwala liji lia mwanangana ngwenyi, Enu A-Izalele hilukenu kuli Yehova, Zambi ya Apalahama, ni Izake, ni Izalele, hanga iye nawa akahiluke kuli yenu nwasala nwapuluka ku kwoko lia mianangana ja Asuria.

⁷ Kanda nulifwa ni tulamba twenu ni usoko wenu waze avulumwine Yehova, Zambi ya tulamba two, ndo waakunjikile ku kwonwona, ngwe nunamono.

⁸ Kanda nukwata pami haliapwila ngwe tulamba twenu; liechenu kuli Yehova. Njilenu mu zuwo lienyi lisandu lize hasela ku usandu wa mutolo, nukalingile Yehova Zambi yenu, hanga utenu wenyi usasu unukatuke.

⁹ Mumu nyi munuhiluka kuli Yehova usoko wenu ni ana jenu nwavwila keke kuli waze kali no mu ufunge, mba meza nawa ku chifuchi chino. Mumu Yehova Zambi yenu mukwa vumbi ni keke. Kechi kutewulula meso jenyi kuli yenu nyi munuhiluka kuli iye.

¹⁰ Chocho mikeji yapalika chihunda ni chihunda ndusu chifuchi cha Eframe ni Manase ndo ku Zapulone, alioze yaaseha nikwalenya nikwachimbunguna.

¹¹ Hindu amwe a kuli A-Ashe ni A-Manase ni A-Zapulone yalikehesa, yeza ku Yerusaleme.

¹² Ni mu Yunda nawa Zambi yaaha mbunge yimuwika akalinge nikulita ni liji lia mwanangana ni alemu, ku liji lia Yehova.

¹³ Atu anji yakungulukila ku Yerusaleme akalie chiwanyino cha mbolo kuyishi futunwiso ha kakweji wamuchiali; mbunga yinene chikolo.

¹⁴ O yakatuka, yachiza yilumbilo yize yapwile mu Yerusaleme, ni yilumbilo yeswe ya insensu yayichiza ni kuyimbila mu chitwetwe Kendrone.

¹⁵ Mba yashiha chitapo cha Chizomboka ha tangwa kumi ni liamuchiwana lia kakweji wamuchiali, asasendote ni A-Levi yevwa sonyi, yalisela ku usandu, yaneha milambu ya kulumba mu zuwo lia Yehova.

¹⁶ Yamanyina muma mwo nikulita ni ngango jo nikulita ni shimbi ja Mose mwe mutu wa Zambi. Asasendote yasapwila e manyinga aze atambwile ku kwoko lia A-Levi.

¹⁷ Mumu mwapwile anji mu chikungulwila kaliselele ku usandu; kashika A-Levi apwile ni milimo ya kushiha yitapo ya Chizomboka ya waze kapemene, akaasele asandu kuli Yehova.

¹⁸ Mumu mbunga yinene ya atu, anji a kuli A-Eframe, ni A-Manase, ni A-Isaka, ni A-Zapulone kalipemesene, hindu alile, alioze kalile nikulita ni yisoneko. Mumu Hezekia hanaalembela ngwenyi, Yehova mupema aakonekene eswe

¹⁹ waze masela mbunge jo kufupa Zambi Yehova, mwe Zambi ya tulamba two, chipwe kalingile nikulita ni shimbi ja zuwo lisandu ja kulipemesa.

²⁰ Mba Yehova yevwa kulemba cha Hezekia; yawuka e atu.

²¹ A-Izalele waze akungulukilile ku Yerusaleme afungile chiwanyino cha mbolo kuyishi futunwiso matangwa shimbiali ni uwahililo unene; ni A-Levi ni asasendote ahalishile Yehova tangwa ha tangwa, nikwimba yisaji ya ngolo kuli Yehova.

²² Ni Hezekia yahanjika ni kulembejeka A-Levi eswe waze alongolokele ni uvumbiko wa Yehova. Chocho alile ndusu chiwanyino cha matangwa shimbiali, nikulambula yitapo ya milambu ya sambukila, nikushikisa kuli Yehova, Zambi ya tulamba two.

²³ Akwa chikungulwila eswe alitesele afunge matangwa akwo shimbiali, mba yafunga matangwa akwo shimbiali ni uwahililo.

²⁴ Mumu Hezekia mwanangana wa Yunda yahana kuli akwa chikungulwila kanunu ka kuji a ngombe, ni tununu shimbiali a mapanga aalambule. Ni alemu yahana kuli akwa chikungulwila kanunu ka kuji a ngombe ni kumi lia tununu twa mapanga, ni asasendote anji aliselele ku usandu.

²⁵ Ni chikungulwila cheswe cha A-Yunda hamwe ni asasendote ni A-Levi ni akwa chikungulwila eswe waze akatukile ku chifuchi cha Izalele, ni yilambala waze akatukile mu Izalele, ni waze te atwamine mu Yunda, eswe yawahilila.

²⁶ Chocho kwapwile uwahililo unene mu Yerusaleme, mumu chize ku miaka ya Solomone mwana David mwanangana wa Izalele kukwapwile chuma cha kulita ni chino nilimwe tangwa.

²⁷ Henaho asasendote A-Levi yakatuka, yawahisa e atu; mba liji lio yalivwa, ni kulemba cho yichiheta mwilu musandu muze mwatwama Zambi.