2 Sango Ja Mianangana 3 - MUKANDA USANDU WA ZAMBI 1975

¹ Henaho Solomone yaputuka kutunga zuwo lia Yehova ku Yerusaleme ha mulundu wa Moria kuze Yehova wasolokele kuli tato David, ha chihela David halulika ha chizungwilo cha Ka-Yepushe Ornane.

² Yaputuka kutunga ha tangwa liamuchiali lia kakweji wamuchiali, ha mwaka wamuchiwana wa kuyula chenyi.

³ Fundamentu Solomone wasele ha kutunga zuwo lia Zambi yino: kusuha chalio, nikulita ni mbandu ja cheseko chitangu, makumi asambano a mbandu, ni kutoha chalio makumi aali a mbandu.

⁴ Usuhe wa senge lize liapwile kulutwe lia zuwo, nikulita ni kutoha cha zuwo, makumi aali a mbandu; Chizundamo chapwile cha kulakaji lia mbandu ni makumi aali a mbandu. Muchima yalamikaho oru yipema.

⁵ Chipatulo chinene yachifuka ni foro ya sedru ya kulamika nawa ni oru yipema. Yayiwahisa nawa ni kwesekaho mingaji ni malenge.

⁶ Yahenyesa zuwo ni mawe alemu ngwe diamante, ni oru yalio te ya ku Paravaime.

⁷ Yalamika chipatulo cheswe, ni mikambo, ni yikuli, ni parede, ni mapito ni oru. Ha parede yola akerupimi.

⁸ Yatunga nawa muma musandu mwahiana. Kusuha chamo makumi aali a mbandu nikulita ni utohe wa zuwo, ni kutoha chamo makumi aali a mbandu. Yafukako kweswe ni oru yipema ya pezu ya kulakaji asambano a *talentu.

⁹ Pezu ya mbambo jeswe yapwile ya makumi atano a shekele ja oru. Yafuka nawa yipatulo ya kwilu ni oru.

¹⁰ Muma musandu mwahiana yalinga akerupimi aali ngwe milimo ya tuponya, yalamikaho oru.

¹¹ Mapulwa ja akerupimi te makumi aali a mbandu ha usuhe. Pulwa limuwika lia kerupimi lia mbandu jitano yilikwata ku yishimi ya zuwo; ni pulwa likwo lia mbandu jitano yilikwata ku pulwa lia kerupimi mukwo.

¹² Ni pulwa lia kerupimi mukwo lia mbandu jitano yilikwata ku yishimi ya zuwo, ni pulwa likwo lia mbandu jitano yilikwata ku pulwa lia kerupimi mukwo.

¹³ Mapulwa ja wano akerupimi azazulukile makumi aali a mbandu. Kanamana te ha molu jo, meso jo kanatale ku zuwo.

¹⁴ Yalinga chikalakala cha hina lilauluka, ni lia ufungo, ni lichila, ni lia linyu lipema, ni kwesekaho akerupimi.

¹⁵ Yatunga nawa kulutwe lia zuwo manguji aali a makumi atatu a mbandu ni mbandu jitano ja usuhe, ni chipangula cha ha songo lia nguji ni nguji, te lia mbandu jitano.

¹⁶ Yalinga malenge ngwe mu uhanjikilo ni kwasa ha masongo a manguji. Yalinga nawa kulakaji lia romana nikujisa ha malenge.

¹⁷ Yamika manguji kulutwe lia tembele, limwe ha chindume ni likwo ha chimeso. Yaluka lize lia ku chindume ngwenyi, Jakini ni jina lia lize ha chimeso Mboaze.