2 Sango Ja Mianangana 29 - MUKANDA USANDU WA ZAMBI 1975

¹ Ha kuputuka kuyula Hezekia wapwile ni makumi aali a miaka ni miaka yitano. Wayulile makumi aali a miaka ni miaka livwa mu Yerusaleme. Jina lia naye Abija mwana Zekaria.

² Walingile chipema kumeso ja Yehova nikulita ni yitanga yeswe ya kalamba kenyi David.

³ Ha mwaka utangu wa kuyula chenyi, ha kakweji mutangu, yazulula mapito a zuwo lia Yehova ni kwalulika.

⁴ Yasanyika asasendote ni A-Levi, yaakungulula ha lwaza ku Chivumbuko.

⁵ Yamba kuli ayo ngwenyi, Ngwivwenu, enu A-Levi. Liselenu ku usandu yenwene, nukasele ku usandu zuwo lia Yehova, Zambi ya tulamba twenu, ni kutuhwisa yiswaswa yeswe muma musandu.

⁶ Mumu atata avulumwine, nikulinga chipi kumeso ja Yehova Zambi yetu. Hanamwehuka; hanatewulula meso jo ku zuwo lia Yehova nikumumba nyima.

⁷ Chikwo nawa hanajila mapito a senge, nikujima ndeya. Kochele insensu; kalambwile milambu ya kulumba muma musandu kuli mwe Zambi ya Izalele.

⁸ Kashika ufwatulo wa Yehova wapwile hali A-Yunda ni A-Yerusaleme. Waakunjikile akaambilembile sali ni sali, akapwe chikomokeso, atu eswe aayunge chize nunamono ni meso jenu.

⁹ Kashika atata hanafu ni katana, ni ana jetu a malunga ni a mapwo ni mapwo jetu hanayi mu ufunge.

¹⁰ Mbunge yami yinazange kukolesa usendo ni Yehova, Zambi ya Izalele, akatewulule utenu wenyi usasu kuli yetu.

¹¹ Ana jami, kanda nulengulula chuma chino, mumu Yehova hananutongola nukamane kumeso jenyi ni kumuvumbika, nukapwe tuvumbi twenyi, ni kwocha insensu.

¹² Henaho A-Levi yakatuka, Mahate mwana Amasai, ni Joele mwana Azaria, a kuli A-Kohate; ni Kishi mwana Abadi, ni Azaria mwana Jehalelele a kuli A-Merari; ni Joa mwana Zima, ni Endene mwana Joa a kuli A-Ngeshone;

¹³ ni Shimiri ni Jeuele, ana ja Elizafane; ni Zekaria ni Matania, ana ja Asafwe;

¹⁴ ni Jehuele ni Shimei, ana ja Hemane; ni Shemaia ni Uziele, ana ja Yedutune.

¹⁵ O yakungulula usoko wo nikulisela ku usandu, ni kunjila nikulita ni liji lia mwanangana kuli Yehova akapemese zuwo lia Yehova.

¹⁶ Asasendote yanjila mu yipatulo ya muchima lia zuwo lia Yehova kulipemesa. Luchisa yoze mweswe awanyine mu tembele ya Yehova, yamuneha ku yize ya zuwo lia Yehova. Mba A-Levi yamwanda, yamumbata haze ku chitwetwe Kendrone.

¹⁷ Ha tangwa litangu lia kakweji mutangu yaputuka kusela yuma ku usandu, mba ha tangwa liamuchinake yaheta ku senge lia Yehova. Yasela zuwo lia Yehova ku usandu ha matangwa nake, mba ha tangwa kumi ni liamuchisambano lia kakweji mutangu yamana.

¹⁸ Yaya kuli mwanangana Hezekia mu zuwo lienyi ngwo, Hitwapemesa zuwo lieswe lia Yehova, ni chilumbilo cha milambu ya kulumba, ni yikwachilo yacho yeswe, ni mesa ya mbolo ya kutumbieka, ni yikwachilo yayo yeswe.

¹⁹ Chikwo nawa yikwachilo yeswe mwanangana Ahaze ha miaka yenyi ya kuyula ambilile muze wavulumwine, hitwalulika ni kusela ku usandu. Yeswe yili kulutwe lia chilumbilo cha Yehova.

²⁰ Aho Hezekia yalimeneka, yakungulula alemu a chihunda, yakanduka ku zuwo lia Yehova.

²¹ Yaneha kuji a ngombe shimbiali, ni kuji a mapanga shimbiali, ni ana-mapanga shimbiali, ni kuji a pembe shimbiali akapwe mulambu wa shili ha chifuchi ni ha zuwo lisandu ni hali A-Yunda. Yatuma asasendote ana ja Arone aalambule ha chilumbilo cha Yehova.

²² Chocho yashiha kuji a ngombe mba asasendote yatambula manyinga nikwasapwila ha chilumbilo. Yashiha kuji a mapanga nikusapwila manyinga ha chilumbilo. Yashiha ana-mapanga nawa nikusapwila manyinga ha chilumbilo.

²³ Mba yakundamisa kuji a pembe ha mulambu wa shili kumeso ja mwanangana ni akwa chikungulwila, no yasa moko jo hali ayo.

²⁴ Mba asasendote yaashiha, yapwisa manyinga jo mulambu ha shili ha chilumbilo akafuke A-Izalele eswe, mumu mwanangana yatuma ngwenyi, Mulambu wa kulumba ni mulambu ha shili yikapwe hali A-Izalele eswe.

²⁵ Yasa A-Levi mu zuwo lia Yehova ni sembalu, ni yisaji ya kusa, ni tulialia nikulita ni shimbi ja David ni ja Ngate mukwa kumona wa mwanangana, ni profeta Natane; mumu shimbi yapwile ya Yehova kuli aprofeta jenyi.

²⁶ A-Levi yamana ni yisaji ya David, ni asasendote ni yitavwi.

²⁷ Mba Hezekia yatuma atambule mulambu wa kulumba ha chilumbilo. Ha kuputuka mulambu wa kulumba mba mwaso wa Yehova yiuputuka nawa, ni yitavwi hamuwika ni yisaji ya David mwanangana wa Izalele nawa.

²⁸ Ni akwa chikungulwila eswe yawayila, ni njimba yemba, ni akwa yitavwi yahumuna. Chino cheswe yichiya ndusu ndo mulambu wa kulumba hiwahwa.

²⁹ Muze hamana kulambula, mwanangana ni waze eswe aliko hamwe nenyi yahetama nikuwayila.

³⁰ Chikwo nawa mwanangana Hezekia ni alemu yatuma A-Levi embile uhaliso Yehova ni maliji a David, ni a Asafwe mukwa kumona. Yemba uhaliso ni kulikwiza mba yahetamisa mitwe yo nikuwayila.

³¹ Hezekia yakumbulula ngwenyi, Se hinwalisela asandu kuli Yehova hikundamenu nukanehe yitapo ni milambu ya kusakwila mu zuwo lia Yehova. Chikungulwila chanehene yitapo ni milambu ya kusakwila, ni waze apwile ni mbunge anehene milambu ya kulumba.

³² Kwalula cha milambu ya kulumba chikungulwila chanehene chapwile makumi shimbiali a kuji a ngombe, ni kulakaji lia kuji a mapanga, ni kulakaji aali a ana-mapanga. Wano eswe apwile mulambu wa kulumba kuli Yehova.

³³ Yuma ya kutumbikila yapwile kulakaji asambano a ngombe ni tununu atatu a mapanga.

³⁴ Alioze asasendote apwile akehe naye, kahashile kuzuwa milambu yeswe ya kulumba. Kashika usoko wo A-Levi yaakwasa, ndo milimo hiyahwa, ni ndo asasendote halisela ku usandu, mumu A-Levi te apwile angunu mu mbunge kuhiana asasendote ha kulisela ku usandu.

³⁵ Chikwo nawa milambu ya kulumba yapwile ya kulumbama, hamwe ni maji a milambu ya sambukila, ni milambu ya kunwa ha mulambu weswe wa kulumba. Chocho uvumbiko wa zuwo lia Yehova yaululika.

³⁶ Ni Hezekia yawahilila, ni atu eswe, mumu ha yuma yize Zambi walulikile hali e atu. Mumu chapwile chuma cha susumuku.