2 Sango Ja Mianangana 27 - MUKANDA USANDU WA ZAMBI 1975

¹ Ha kuputuka kuyula Yotame wapwile ni makumi aali a miaka ni miaka yitano, mba wayulile kumi lia miaka ni miaka yisambano mu Yerusaleme. Jina lia naye Jerusha mwana Zadoke.

² Walingile chipema kumeso ja Yehova nikulita ni chize cheswe tato Uzia walingile; alioze kanjilile mu tembele ya Yehova. E atu alingile uhenge.

³ Aye yatunga chikolo cha ku tunda mu zuwo lia Yehova. Yatunga nawa chinji ha chipanga-cha-mawe cha Ofele.

⁴ Chikwo nawa yatunga yihunda mu chifuchi cha Yunda ku milundu, ni mu usaki yatunga mbonge ni tuposhi.

⁵ Yasa jita nawa ni mwanangana wa A-Amone, yamukumba. Mwaka uze wene A-Amone yamwaha mulambu wa kulakaji lia *talentu ja prata, ni kumi lia tununu twa njongo ja tiliku, ni kumi lia tununu twa sevada. Chocho A-Amone yamwaha ha mwaka wamuchiali ni ha wamuchitatu nawa.

⁶ Chocho Yotame wapwile wa ndundo, mumu walulikile ndako jenyi kumeso ja Yehova Zambi yenyi.

⁷ Yitanga yikwo ya Yotame, ni jita yenyi yeswe, ni ndako jenyi hanayisoneka mu mukanda wa mianangana ja Izalele ni Yunda.

⁸ Ha kuputuka kuyula wapwile ni makumi aali a miaka ni miaka yitano mba wayulile kumi lia miaka ni miaka yisambano mu Yerusaleme.

⁹ Yotame yaya tulo, yaya kuli tulamba twenyi, mba yamufunda mu chihunda cha David. Mwanenyi Ahaze yamuswana mu wanangana.