Biblia Todo Logo
Bìoball air-loidhne

- Sanasan -

2 Sango Ja Mianangana 26 - MUKANDA USANDU WA ZAMBI 1975

1 A-Yunda eswe yatambula Uzia ni kumupwisa mwanangana kusalakana tato Amazia. Te kali ni kumi lia miaka ni miaka yisambano.

2 Aye yatungulula Elote ni kuchihilwisa kuli A-Yunda kulutwe lia kufwa cha tato.

3 Ha kuputuka kuyula, Uzia wapwile ni kumi lia miaka ni miaka yisambano. Wayulile makumi atano a miaka ni miaka yiali mu Yerusaleme. Jina lia naye Jekolia wa Yerusaleme.

4 Walingile chipema kumeso ja Yehova nikulita ni yeswe tato Amazia walingile.

5 Yalisela kufupa Zambi ha matangwa a Zekaria mukwa chinyingi ha usolwelo wa Zambi. Mba shimbu iye wafupile Yehova, Zambi wamuwahishile.

6 Yatuhuka nikwasa jita ni A-Filistea. Yapuzula chipanga-cha-mawe cha Ngata, ni cha Jabena, ni cha Ashedode. Yatunga yihunda mu chifuchi cha Ashedode ni hakachi ka A-Filistea.

7 Zambi wamukwashile kulimika ni A-Filistea, ni A-Arabia waze atwama mu Nguru-Mbale, ni A-Meunime.

8 A-Amone yaneha milambu kuli Uzia, ni jina lienyi liafumanyine ndo ku unjililo wa Engitu, mumu wapwile mukwa tachi kuhiana.

9 Chikwo nawa Uzia yatunga tuposhi mu Yerusaleme ku chikolo cha mbango, ni ku chikolo cha chikulo, ni ku konda ya chipanga-cha-mawe ni kwakolesa ha jita.

10 Yatunga tuposhi mu puya nawa, ni kufula tuyitende tunji twa meya mumu wapwile ni yimuna anji, mu yana ni mu yikulo. Wapwile nawa ni njimi ni akwa kululika miuva mu milundu ni mu minda ya mbuto, mumu wazangile chikolo kulima.

11 Chikwo nawa Uzia wapwile ni mbunga ya tujita a kutuhuka ku jita mu yihuji, nikulita ni kwalula cho alwile Jehiele mukwa kusonyeka, ni Maseia mwe chilolo kushi lia chiyulo cha Hanania umwe wa hakachi ka tupitau twa mwanangana.

12 Kwalula cha akwa lutwe a minyachi ya atato, eswe yitakame a hamu, chapwile tununu aali ni kulakaji asambano.

13 Kushi lia chiyulo cho kwapwile mbunga ya maswalale a kulongesa kanawa, kulakaji atatu a tununu ni tununu shimbiali ni kulakaji atano akwa kwasa jita ni ngolo jinji akakwase mwanangana kulimika ni akwa kole.

14 Uzia yalulika ha mbunga yeswe kepwe, ni makunga, ni ngalau, ni yikuto ya utale, ni mata a manana, ni mawe a kwasa.

15 Yatunga mu Yerusaleme makina ja kunyonga kuli akwa mana anji, akaase ha tuposhi ni ha yipanga akakonge no mivu ni mawe anene. Jina lienyi liafumanyine kusuku, mumu amukwashile chikolo ndo hatakama.

16 Alioze muze hatakama, mbunge yenyi yiyilifuza alinge uhenge, mba yavulumuna Yehova Zambi yenyi. Yanjila mu tembele ya Yehova akoche insensu ha chilumbilo cha insensu.

17 Azaria mwe sasendote yamukaula muchima hamuwika ni makumi nake a asasendote a Yehova, malunga a hamu.

18 O yahamika ni mwanangana Uzia ngwo, Hi milimo ya yena ko Uzia kwochela insensu kuli Yehova, alioze milimo ya asasendote ana ja Arone waze hanaasela ku milimo ya kwocha insensu. Tuhuka muma musandu, mumu hiwavulumuna. Chipwe Yehova Zambi kechi kukulemesa ha chuma chino.

19 Henaho Uzia yatenuka, te kali ni chikwachilo mu kwoko lienyi cha kwocha nacho insensu. Mba shimbu machitenuka ni asasendote mbumba yiyisoloka ha huma lienyi kumeso ja asasendote mu zuwo lia Yehova kwe ku chilumbilo cha insensu.

20 Sasendote mukwa lutwe Azaria ni asasendote eswe yamutala, kuma hapwa ni musongo wa mbumba ha huma lienyi. O yamushinjika atuhukeko fuji, ni mwene nawa yalipupwisa kutuhuka mumu Yehova hamulamba.

21 Mwanangana Uzia wapwile mukwa mbumba ndo ku tangwa lia kufwa chenyi. Yatwama mu zuwo lia ukawenyi mumu ha mbumba, mumu amutetele ku zuwo lia Yehova. Mwanenyi Yotame wapwile helu lia zuwo lia mwanangana nikuyula akwa chifuchi.

22 Yitanga yikwo ya Uzia, yitangu ni yasula, profeta Izaia mwana Amoze hanayisoneka.

23 Chocho Uzia yaya tulo, yaya kuli tulamba twenyi. Yamufunda hamwe ni tulamba twenyi mu munda wa kufunda wa mianangana mumu ngwo, Iye mukwa mbumba. Mwanenyi Yotame yamuswana mu wanangana.

Chokwe Bible © Bible Society in Angola, 1975.

Bible Society in Angola
Lean sinn:



Sanasan