2 Sango Ja Mianangana 25 - MUKANDA USANDU WA ZAMBI 1975

¹ Ha kuputuka kuyula Amazia wapwile ni makumi aali a miaka ni miaka yitano, mba wayulile makumi aali a miaka ni miaka livwa mu Yerusaleme. Jina lia naye Jehoadane wa ku Yerusaleme.

² Walingile chipema kumeso ja Yehova alioze hi ni mbunge yingunu ko.

³ Muze hakolesa wanangana kuli iye yashiha tuvumbi twenyi waze te ashihile tato mwanangana.

⁴ Kashihile ana jo, alioze yalinga nikulita ni chize chasonewene mu shimbi mu mukanda wa Mose, nikulita ni liji lia Yehova ngwo, Kanda ashiha yisemi mumu hali ana, chipwe kanda ashiha ana mumu hali yisemi. Ashihe mutu ni mutu ha mulonga wenyi mwene.

⁵ Chikwo nawa Amazia yakungulula A-Yunda, yaasela kushi lia tupitau twa tununu ni twa makulakaji nikulita ni minyachi ya atato, A-Yunda ni A-Mbenjamine eswe. Yaalula chize ku makumi aali a miaka; yawana kulakaji atatu a tununu a malunga a kusakula waze mahasa kuya ku jita nikukwata makunga ni kepwe.

⁶ Yafweta nawa kulakaji lia tununu yitakame a hamu a kuli A-Izalele ha ndando ya kulakaji lia *talentu ja prata.

⁷ Kwejile kuli iye umwe mutu wa Zambi nikwamba ngwenyi, Mwanangana kanda utayiza wano maswalale ja A-Izalele kuya hamwe ni yena, mumu Yehova katwamine ni A-Izalele, wano eswe A-Eframe.

⁸ Alioze nyi muoya, hihamuka, utakame ha jita, mumu Zambi makunungwina hashi kumeso ja akwa kole je mumu Zambi kali ni ndundo ja kukwasa ni ndundo ja kununguna.

⁹ Amazia yamba kuli mutu wa Zambi ngwenyi, Alioze kuchi mutulinga ha kulakaji lia *talentu hinahana kuli maswalale a Izalele. Mutu wa Zambi yakumbulula ngwenyi, Yehova kanahase kukwaha upite kuhiana uno.

¹⁰ Henaho Amazia yahandununa maswalale aze akatukile ku Eframe ahiluke ku mahio. Kashika evwile wuli wunji hali A-Yunda. Yaya ku mahio ni utenu usasu.

¹¹ Alioze Amazia yahamuka, yatwala atu jenyi, yaya ku Chikulo cha Mungwa, yashiha kumi lia tununu twa A-Sere.

¹² Kumi likwo lia tununu A-Yunda yambata amwono, yaatwala helu lia luliwe ni kwanyashina hashi, ni kwamakwona tuyipinji.

¹³ Alioze maswalale aze Amazia wahilwishile kunyima, kazangile aye nenyi ku jita, o yalamba yihunda ya Yunda chize ku Samaria ndo ku Mbete-Horone nikushiha tununu atatu ni kumbata upite wunji.

¹⁴ Muze Amazia heza ha kushiha A-Endome yaneha mazambi ja A-Sere ni kwamika akapwe mazambi jenyi, ni kuhetamina kumeso jo, ni kwaochela insensu.

¹⁵ Kashika utenu wa Yehova yiukasumukina hali Amazia. Yamutuma umwe profeta akambe kuli iye ngwenyi, Mazambi ja e mavungu kaapulwile ku moko je, mba kuchi te yena hiwaakaula?

¹⁶ Shimbu machihanjika nenyi, mwanangana yamba kuli iye ngwenyi, Te hitwakupwisa kaliamanga ka mwanangana? Holako! Nyi unazange akulambe? Kashika profeta yahola. Yamba ngwenyi, Ngunanyingika Zambi kanapale kukwonwona mumu hiwalinga chino, kusolo kupanjika ku chiyulo chami.

¹⁷ Mba Amazia mwanangana wa Yunda yapanjika kuli akwo, yatuma kuli Njoashe, mwana Jehoahaze, mwana Jehu, mwanangana wa Izalele ngwenyi, Tweya tulitale meso ni meso.

¹⁸ Alioze Njoashe mwanangana wa Izalele yatuma kuli Amazia mwanangana wa Yunda ngwenyi, Mukalale wa mu Lebano yiutuma kuli sedru ya mu Lebano ngwenyi, Hana mwané wa pwo kuli mwanami wa lunga amumbate. Alioze kwejile umwe ngongo wa mu Lebano yaliachila hashi mukalale.

¹⁹ Ena unambe ngwe, Hinalamba A-Endome, kashika mbunge ye hiyalifuza ukalivwimbe. Twama ku mahienu. Kuchi te mukalisupa ukalilemeke ukalimbuke, ni yena ni A-Yunda hamuwika?

²⁰ Alioze Amazia kasolo kwivwa, mumu chino chuma te cha kuli Zambi akaakunjike kuli akwa kole jo mumu hakaula mazambi a Endome.

²¹ Chocho Njoashe mwanangana wa Izalele yaya, mba iye ni Amazia mwanangana wa Yunda yalitala meso ni meso ku Mbete-Shemeshe wa Yunda.

²² A-Yunda yaakumba kuli A-Izalele, mba o yachinyina mutu mweswe ku zuwo lienyi.

²³ Njoashe mwanangana wa Izalele yakwata Amazia mwanangana wa Yunda, mwana Njoashe, mwana Jehoahaze ku Mbete-Shemeshe. Yamuneha ku Yerusaleme, mba yapuzula chipanga-cha-mawe cha Yerusaleme chize ku chikolo cha Eframe ndo ku chikolo cha ku mbango; kulakaji awana a mbandu.

²⁴ Yatambula oru yeswe ni prata yeswe ni yikwachilo yeswe ayiwanyine mu zuwo lia Zambi, ni Obede-Endome, ni upite wa mu zuwo lia mwanangana, ni funge nawa akapwe tombo, mba yaya ku Samaria.

²⁵ Amazia mwana Njoashe mwanangana wa Yunda Watwamine ni mwono kumi lia miaka ni miaka yitano kulutwe lia kufwa cha Njoashe mwana Jehoahaze mwanangana wa Izalele.

²⁶ Yitanga yikwo ya Amazia, yitangu ni yasula, hanayisoneka mu mukanda wa mianangana ja Yunda ni Izalele.

²⁷ Chize ku mwaka uze Amazia walitwaminyine kukaula Yehova, yamutwama punga mu Yerusaleme. Aye yachinyina ku Lakishi, alioze yatuma kuli iye ku Lakishi, yamushihilako.

²⁸ Yamusa hali tuvwalu, yamuneha ni kumufunda hamwe ni tulamba twenyi mu chihunda cha Yunda.