2 Sango Ja Mianangana 24 - MUKANDA USANDU WA ZAMBI 1975

¹ Ha kuputuka kuyula Njoashe wapwile ni miaka shimbiali; wayulile makumi awana a miaka mu Yerusaleme. Jina lia naye Zibia wa ku Mbia-shipa.

² Njoashe walingile chipema kumeso ja Yehova matangwa eswe a sasendote Jehoiada.

³ Jehoiada yamumbachisa mapwo aali; yasema ana a malunga ni a mapwo.

⁴ Kulutwe Njoashe wapwile ni mbunge ya kululika zuwo lia Yehova.

⁵ Yakungulula asasendote ni A-Levi, yamba kuli ayo ngwenyi, Yénu ku yihunda ya Yunda nukatambule kuli A-Izalele eswe mbongo ja kululika zuwo lia Zambi yenu mwaka ha mwaka. Chili kuli yenu kupupwisa milimo yino. Alioze A-Levi kayipupwishile.

⁶ Kashika mwanangana yasanyika Jehoiada mwe mukwa lutwe, yamuhula ngwenyi, Kuchi te kwashinjikile A-Levi akatambule kuli A-Yunda ni A-Yerusaleme ni chikungulwila cha Izalele mbongo jize atongwele kuli Mose kavumbi ka Yehova ha mbalaka ya Shindakenyo?

⁷ Mumu ana ja yoze chingulungulu wa pwo Atalia te halumbula zuwo lia Zambi, ni yuma yeswe ya kutumbikila mu zuwo lia Yehova hayihana kuli Ambale.

⁸ Kashika mwanangana yasa shimbi, mba yatunga mushete ni kuutumbika haze lia chikolo cha zuwo lia Yehova.

⁹ Yatambika mutambi ndusu mu Yunda ni Yerusaleme akanehe kuli Yehova mbongo jize ja kutongola kuli Mose kavumbi ka Zambi hali A-Izalele mu puya.

¹⁰ Alemu eswe ni atu eswe yalikwiza, yaneha, yambila mu mushete ndo hamana.

¹¹ Muze A-Levi haneha mushete ku zuwo lia mwanangana, ha kumona mbongo hijoka, mba mukwa kusonyeka wa mwanangana ni mukwa manda wa sasendote yeza yazukula mushete mba yautwala kuma kwawo nawa. Chocho alingile tangwa ha tangwa ni kukunga mbongo ja kulumbama.

¹² Mwanangana ni Jehoiada yajihana kuli akwa milimo ya kululika zuwo lia Yehova, mba o yafweta apedreru ni akarpinteru akalulike zuwo lia Yehova, hamwe ni akwa milimo ya utale ni unengu akalulike zuwo lia Yehova.

¹³ Chocho akwa milimo yahondangana; yawahisa milimo kanawa; yalulika zuwo lia Zambi chize liapwile ni kulikolesa.

¹⁴ Muze hamana yaneha kuli mwanangana ni Jehoiada mbongo jize jasalile, mba yalinga najo yikwachilo ya zuwo lia Yehova, ye yikwachilo ya kuvumbika nayo, ni ya kulambula nayo, ni nguto ni yikwachilo ya oru ni ya prata. Tangwa ha tangwa alambwile milambu ya kulumba mu zuwo lia Yehova matangwa eswe a Jehoiada.

¹⁵ Alioze Jehoiada wakukwokele ha kwoka matangwa. Yafwa. Wapwile ni kulakaji lia miaka ni makumi atatu a miaka ha kufwa chenyi.

¹⁶ Yamufunda mu chihunda cha David hakachi ka mianangana, mumu te halinga chipema mu Izalele kuli Zambi ni ku zuwo lienyi.

¹⁷ Muze Jehoiada hafwa yikwiza alemu ja A-Yunda nikuwayila mwanangana. Mba mwanangana yapanjika kuli ayo.

¹⁸ O yehuka zuwo lia Yehova Zambi ya tulamba two; yalingila Ashera ni tuponya. Kashika yikwiza ufwatulo hali A-Yunda ni A-Yerusaleme mumu ha uno mulonga wo.

¹⁹ Yehova yatuma aprofeta kuli ayo akaakoke kuli iye nikwashindakenya, alioze kapanjikile.

²⁰ Spiritu ya Zambi yeza hali Zekaria mwana sasendote Jehoiada. Aye yamana helu lia atu nikwamba kuli ayo ngwenyi, Zambi kanambe ngwenyi, Kuchi te nunatangula maliji a Yehova? Kashika kunwahashile kuwaha. Iye hananwehuka mumu ni yenu hinunamwehuka.

²¹ Alioze amutwamine punga. Yamwasa mawe nikulita ni liji lia mwanangana, mu yize ya zuwo lia Yehova.

²² Chocho mwanangana Njoashe kewulukile utu wa Jehoiada tato ya Zekaria kuli iye, alioze yashihisa mwanenyi. Ha kufwa, Zekaria yamba ngwenyi, Yehova achitale, akachifwetese.

²³ Mba ha songo lia mwaka maswalale ja A-Seria yeza kulimika nenyi. Yeza ku Yunda ni Yerusaleme nikwonwona alemu ja atu hakachi ko nikutuma upite wo weswe kuli mwanangana ku Ndamaseku.

²⁴ Mumu tujita twa A-Seria yeza ni kambunga kakepe ka malunga, alioze Yehova yakunjika kuli ayo chihuji chinene mumu hanehuka Yehova Zambi ya tulamba two. Chocho yalinga upatwilo hali Njoashe.

²⁵ Muze o hamukatuka nikumuhichika ni mbandu jipi atu jenyi mwene yamutwama punga mumu ha manyinga ja ana ja sasendote Jehoiada. Yamushiha ha muhela wenyi, yafwa. Yamufunda mu chihunda cha David, alioze hi mu chifuka cha mianangana ko.

²⁶ Akwa kumutwama punga wano: Zabade mwana Shimeate Ka-Amone, ni Yehozabade mwana Shimirite Ka-Moape.

²⁷ Ha kutwala kuli anenyi ni yiteli yinene yasa hali iye, ni kululika cha zuwo lia Zambi hanayisoneka mu ulumbunwiso wa mukanda wa mianangana. Mba mwanenyi Amazia yamuswana mu wanangana.