2 Sango Ja Mianangana 23 - MUKANDA USANDU WA ZAMBI 1975

¹ Ha mwaka wamuchishimbiali Jehoiada yatakama, yatambula tupitau twa makulakaji, Azaria mwana Jerohame, ni Ishemali mwana Jehohana, ni Azaria mwana Opete, ni Maseia mwana Adaia, ni Elishafate mwana Zikiri, yakolesa no usendo.

² O yajinga mu Yunda ni kukungulula A-Levi apwile mu yihunda yeswe ya Yunda, ni akwa lutwe mu minyachi ya atato a Izalele. Eswe yeza ku Yerusaleme.

³ Akwa chikungulwila eswe akolesele usendo ni mwanangana mu zuwo lia Zambi. Jehoiada yamba kuli ayo ngwenyi, Talenu, mwana wa mwanangana kumayula nikulita ni chize Yehova wambile ha kutwala kuli ana ja David.

⁴ Chuma munulinga chino: chihanda chamuchitatu cha yenu nwakunjilanjila ha Sambata, asasendote ni A-Levi, munupwa akwa mapito.

⁵ Chihanda chikwo chamuchitatu munupwa ku zuwo lia mwanangana, mba chihanda chikwo chamuchitatu munupwa ku chikolo cha fundamentu; ni e atu eswe mapwa mu maze a zuwo lia Yehova.

⁶ Alioze niumwe kanda anjila mu zuwo lia Yehova, shina asasendote wika, ni akwa kuvumbika hakachi ka A-Levi. O manjila mumu hapwa asandu, alioze e atu eswe matunga ulayilo wa Yehova.

⁷ A-Levi majingilika mwanangana sali ni sali mutu mweswe ni yitwa yenyi mu kwoko, mba mweswawo manjila mu zuwo akamushihe lume. Enu munupwa hamwe ni mwanangana ha kunjila chenyi ni ha kutuhuka chenyi.

⁸ Chocho A-Levi ni A-Yunda eswe yalinga nikulita ni shimbi ya sasendote Jehoiada. Mutu mweswe yanda atu jenyi waze manjila ha Sambata ni waze matuhuka ha Sambata, mumu sasendote Jehoiada kakotwele ngango ja tuvumbi.

⁹ Sasendote Jehoiada yahana kuli tupitau twa makulakaji makunga ni kepwe ni kepwe jinene jize japwile ja mwanangana David, jatwama mu zuwo lia Zambi.

¹⁰ Yalonga atu eswe chize ku sali lia zuwo lia chindume ndo ku sali lia chimeso, kulisesesa ni chilumbilo ni zuwo, kweswe kwa kujingilika mwanangana, mutu mweswe ni yitwa yenyi mu kwoko.

¹¹ Henaho yatuhwisa mwana wa mwanangana; yamusa chipangula; yamwaha ye Shindakenyo; yamupwisa mwanangana. Jehoiada ni ana jenyi yamuzujila e maji, mba yamba ngwo, Vulie mwanangana!

¹² Muze Atalia hevwa zungo lia atu kuzomboka ni kuhalisa mwanangana, yeza kuli e atu mu zuwo lia Yehova.

¹³ Yatala, kumanyi mwanangana kanamana ku nguji lienyi ku unjililo, ni tupitau ni akwa yitavwi sali ni sali hamwe ni mwanangana. Atu eswe a chifuchi kanalikwiza nikuhumuna yitavwi, ni njimba kanembi yisaji ya mimbo nikusongwela uhaliso. Mba Atalia yasonya mazalo jenyi; yakalumuka ngwenyi, Utwahe! Utwahe!

¹⁴ Sasendote Jehoiada yatuma tupitau twa makulakaji, waze haasela hali tujita, yamba kuli ayo ngwenyi, Muchizenu haze lia ngango, mba mweswawo mamukaula amushihe ni katana. Mumu sasendote te hamba ngwenyi, Kanda numushihila mu zuwo lia Yehova.

¹⁵ Chocho yamusela jila; aye yaya ku unjililo wa chikolo cha tuvwalu cha zuwo lia mwanangana. Kwenako amushihilile.

¹⁶ Jehoiada yakolesa usendo hakachi ka iye, ni e atu eswe, ni mwanangana, apwe e atu a Yehova.

¹⁷ Atu eswe yaya ku zuwo lia Mbale, yalipuzula. Yapalwola yipalupalu yilumbilo venyi ni tuponya twenyi, ni kushiha Matane sasendote ya Mbale kulutwe lia yilumbilo.

¹⁸ Mba Jehoiada yasela milimo ya zuwo lia Yehova kushi lia chiyulo cha asasendote A-Levi waze David te hapangila mu zuwo lia Yehova, akalambule milambu ya kulumba ya Yehova nikulita ni chize hasoneka mu shimbi ya Mose. Achilingile ni kulikwiza ni kwimba nikulita ni chiyulo cha David.

¹⁹ Yasela nawa akwa kufunga ku yikolo ya zuwo lia Yehova, akakwike kunjila mweswawo halichisa ni chimwe chuma.

²⁰ Yanda tupitau twa makulakaji, ni akwa lutwe, ni akwa kuyula atu, ni atu eswe a chifuchi, mba yachiza mwanangana ku zuwo lia Yehova, yanjilila ku chikolo cha ku tunda ndo ku zuwo lia mwanangana. Mba yatwamisa mwanangana ha ngunja ya mianangana.

²¹ Chocho atu eswe a chifuchi awahililile, ni chihunda chahwimine. Atalia te hamushiha ni katana.