2 Sango Ja Mianangana 22 - MUKANDA USANDU WA ZAMBI 1975

¹ Akwa Yerusaleme asalakanyishine kasula-songo Ahazia mwanangana mu chitwamo cha tato, mumu mbunga ya waze ejile ni A-Arabia ku chilombo te hashiha makulwana eswe. Chocho Ahazia mwana Jorame mwanangana wa Yunda hapwa mwanangana.

² Ha kuputuka kuyula wapwile ni makumi awana a miaka ni miaka yiali. Wayulile mwaka umuwika mu Yerusaleme. Jina lia naye Atalia mwana Omiri.

³ Wendele nawa mu ndako ja munyachi wa Ahabe, mumu naye wamulongesele kulinga ungulungulu.

⁴ Walingile chipi kumeso ja Yehova chizechene ngwe munyachi wa Ahabe, mumu ha kufwa tato o apwile akwa kumulongesa, mba yamwonwona.

⁵ Aye yatayiza longeso lio ha kuya hamwe ni Jorame mwana Ahabe mwanangana wa Izalele akase jita ni Hazaele mwanangana wa A-Seria ku Ramote-Ngiliate. Kuze A-Seria yalemeka Jorame.

⁶ Yaya ku Yezerele akamuwukileko mbandu jenyi jize amutwile ku Rama ha kwasa jita ni Hazaele mwanangana wa A-Seria. Mba Azaria mwana Jorame, mwanangana wa Yunda yaya kutala Jorame mwana Ahabe mu Yezerele mumu ha kuyiza chenyi.

⁷ Kashika kwonwona cha Ahazia chakatukile kuli Zambi ha kuya kuli Jorame, mumu ha kuhetako yaya ni Jorame akase jita ni Jehu mwana Nimishi, yoze Yehova hanamuwayisa akasutule munyachi wa Ahabe.

⁸ Mba shimbu Jehu machilinga upatwilo hali akwa munyachi wa Ahabe, yawana alemu ja Yunda ni ehwa ja Ahazia, kanalingila Ahazia, mba yaashiha.

⁹ Yafupa Ahazia, yamukwata (te kanaswame ku Samaria), yamuneha kuli Jehu, yamushiha. Yamufunda mumu ngwo, Iye mwana Yehosofate yoze wafupile Yehova ni mbunge yenyi yeswe. Mu munyachi wa Ahazia kapwile nawa niumwe ni tachi ja kuyula wanangana.

¹⁰ Achi muze Atalia naye ya Ahazia hamona mwanenyi hafwa, yakatuka, yonwona ana eswe a wanangana a ku munyachi wa Yunda.

¹¹ Alioze Yehosabeta mwana wa mwanangana, wa pwo, yatambula Njoashe mwana Ahazia, yamwombola hakachi ka ana ja mwanangana aze ashihile, yamusweka hamwe ni ndeji yenyi mu chipatulo cha kupomba. Chocho Yehosabeta mwana wa mwanangana Jorame (ngwami, hapwa ndumbwa Ahazia) pwo lia sasendote Jehoiada, yamuswekela kuli Atalia aye kahashile kumushiha.

¹² Njoashe wapwile hamuwika no wa kusweka mu zuwo lia Zambi miaka yisambano, shimbu Atalia machiyula chifuchi.