2 Sango Ja Mianangana 21 - MUKANDA USANDU WA ZAMBI 1975

¹ Yehosofate yaya tulo, yaya kuli tulamba twenyi. Yamufunda mu chihunda cha David hamwe ni tulamba twenyi, mba mwanenyi Jorame yamuswana mu wanangana.

² Aye wapwile ni anakwo, ana ja Yehosofate; Azaria, ni Jehiele, ni Zekaria, ni Azaria, ni Mikele, ni Shefatia. Wano eswe te ana ja Yehosofate mwanangana wa Izalele.

³ Tato yaaha yawana yinene ya prata, ni oru, ni yuma ya ndando yinene, hamwe ni yihunda ya kukolesa mu Yunda, alioze yahana wanangana kuli Jorame mumu iye mwanenyi mutangu.

⁴ Alioze muze Jorame hatwama ha ngunja ya tato nikujikiza, yashiha anakwo eswe ni katana, ni akwo nawa hakachi ka alemu a Izalele.

⁵ Ha kuputuka kuyula Jorame wapwile ni makumi atatu a miaka ni miaka yiali mba wayulile miaka nake mu Yerusaleme.

⁶ Wendele mu ndako ja mianangana ja Izalele, ngwe munyachi wa Ahabe, mumu te hambata mwana wa Ahabe. Walingile chipi kumeso ja Yehova.

⁷ Hindu Yehova kazangile kwonwona munyachi wa David mumu ha usendo uze wakolesele ni David nikulakenya kumwaha ndeya, ni kuli ana jenyi matangwa eswe.

⁸ Ha matangwa jenyi A-Endome yakatukila A-Yunda nikulitongwela mwanangana wa ayo ene.

⁹ Henaho Jorame yazauka hamwe ni tupitau twenyi ni matemba jenyi a jita eswe. Yakatuka ha ufuku, yalamba A-Endome waze amujingilikile, hamwe ni tupitau twa matemba.

¹⁰ Kashika A-Endome yakatuka kushi lia chiyulo cha A-Yunda ndo musono. Henaho A-Libna o nawa yakatuka ku chiyulo chenyi, mumu te hanehuka Yehova, Zambi ya tulamba twenyi.

¹¹ Chikwo nawa yatunga manangamo mu milundu ya Yunda; yakoka A-Yerusaleme ku ukoi; yatwala A-Yunda akapianguke.

¹² Kwejile kuli iye mukanda wa kusoneka kuli profeta Eliya ngwo, Yehova, Zambi ya kalamba ke David kanambe ngwenyi, Mumu kuwendele mu ndako ja tatenu Yehosofate, chipwe mu ndako ja Asa mwanangana wa Yunda,

¹³ alioze hiwenda mu ndako ja mianangana ja Izalele, hiwakoka A-Yunda ni A-Yerusaleme akaye ku ukoi ngwe munyachi wa Ahabe; hiwashiha anakwenu a munyachi wa tatenu waze akuhianyine kupema;

¹⁴ kashika Yehova kumalamba ni musongo umwe upi atu je, ni ana je, ni mapwo je ni yize yeswe uli nayo.

¹⁵ Kumuopwa ni kuyiza chinji mukunda wa musongo wa mu mijingwa ye, ndo mijingwa ye muyikutuhuka mumu ha musongo tangwa ha tangwa.

¹⁶ Mba Yehova yavundula mbunge ja A-Filistea akalimike ni Jorame, ni A-Arabia nawa waze alihata ni A-Etiopia.

¹⁷ O yeza ni jita hali A-Yunda nikunjilamo nikumbata upite weswe wa mu zuwo lia mwanangana, ni ana jenyi a malunga nawa, ni mapwo jenyi. Kashika niumwe mwana wamusalile wakuhi shina mwe kasula-songo Jehoahaze.

¹⁸ Mba helu lia yino yeswe Yehova yamulamba ni musongo umwe kuushi yitumbo mu mijingwa yenyi.

¹⁹ Ku songo lia miaka yiali mijingwa yenyi yiyimutuhuka mumu ha kuyiza, mba yafwa ni misongo yipi. Atu jenyi kamulingilile kahia ngwe hali tulamba twenyi.

²⁰ Ha kuputuka kuyula wapwile ni makumi atatu a miaka ni miaka yiali. Wayulile miaka nake mu Yerusaleme, mba ha kufwa niumwe wamuvwilile usona wakuhi. Yamufunda mu chihunda cha David, alioze hi ku mafuka a mianangana ko.