2 Sango Ja Mianangana 20 - MUKANDA USANDU WA ZAMBI 1975

¹ Kulutwe lia yino yuma A-Moape ni A-Amone ni amwe A-Meunime yeza mukwasa jita ni Yehosofate.

² Yikwiza nawa amwe, yalweza Yehosofate ngwo, Kuneza chihuji chinene cha sali lize lia kalunga-lwiji ku Seria akase jita ni yenu. Haheta ku Hazazone-Tama (jina likwo Engedi).

³ Yehosofate yevwa woma wunji. Yalisela kufupa Yehova. Yasela matangwa a kulitwamina kulia ndusu mu Yunda mweswe.

⁴ A-Yunda yakunguluka akete kuli Yehova aakwase. Ku yihunda yeswe ya Yunda yakatuka akafupe Yehova.

⁵ Yehosofate yamana mu chikungulwila cha A-Yunda ni A-Yerusaleme, mu zuwo lia Yehova, kulutwe lia yize yaha,

⁶ ngwenyi, Yehova Zambi ya tulamba twetu, yena uli Zambi mwilu, uli mukwa kuyula mawanangana eswe a mavungu. Tachi ni ndundo jili mu kwoko lie, kashika niumwe mahasa kulimika ni yena.

⁷ Zambi yetu, te kwahumine akwa chifuchi chino kumeso ja atu je A-Izalele? Kwachihanyine kuli ana ja kasendo ke Apalahama ku miaka ya mutolo nyi?

⁸ O hatwamamo, hakutungilamo zuwo lisandu ha jina lie, ngwo,

⁹ Nyi chipi muchituwana, hanji katana, hanji upatwilo, hanji chilungo, hanji kapunga, etu mutumana kulutwe Iia zuwo lino kumeso je (mumu jina lie lili mu zuwo lino). Mututeta kuli yena mu luyinda wetu mba yena mutwivwa mutulamwina.

¹⁰ Haliapwila A-Amone, ni A-Moape, ni akwa mulundu wa Sere kaneza. Ena kwatayijile A-Izalele kunjila mu yifuchi yo ha kukatuka ku Engitu, kashika yaajinga, kaanongesene.

¹¹ Tala haliapwila chize anatukundulula. Haneza kutumbila mu chihinga che chino hiwatwaha kuswana.

¹² Zambi yetu! Kuchi kwapatwila? Mumu yetu kutushi ndundo ja kulitachika ni mbunga yino yinene yineza kulimika ni yetu. Kutwanyingikine chize mutulinga, alioze meso jetu anatale kuli yena.

¹³ A-Yunda eswe amanyine kumeso ja Yehova hamwe ni ana jo akepe, ni mapwo jo, ni ana jo a malunga.

¹⁴ Mba mwe mu chikungulwila Spiritu ya Yehova yahulumukina hali Jahaziele mwana Zekaria, mwana Benaia, mwana Jehiele, mwana Matania, Ka-Levi wa kuli ana ja Asafwe.

¹⁵ Iye yamba ngwenyi, Panjikenu A-Yunda eswe, ni yenu A-Yerusaleme, ni yena mwanangana Yehosofate. Yehova kanambe kuli yenu ngwenyi, Kanda nwivwa woma, kanda nulishimwoka mumu ha chihuji chino chinene, mumu jita yino ya Zambi, hi ya yenu ko.

¹⁶ Hamene munuya kulimika no; o kanejila ku ukandukilo wa Jija, mba munukaawana ku songo lia chikulo ku uputukilo wa puya ya Jehiele.

¹⁷ Kuchatambile kwasa jita, enu A-Yunda ni A-Yerusaleme. Lilongenu, manenu chizechene nukamone ulamwino wa Yehova hamwe ni yenu. Kanda nwivwa woma, kanda nulishimwoka. Hamene tuhukenu kutakana no mumu Yehova kwali hamuwika ni yenu.

¹⁸ Yehosofate yahetamisa meso jenyi hashi, ni A-Yunda ni A-Yerusaleme eswe yafulamana hashi kumeso ja Yehova ni kuwayila Yehova.

¹⁹ Ni A-Levi akwa munyachi wa Kohate ni akwa munyachi wa Kora yamana ha molu akahalise Yehova, mwe Zambi ya Izalele, ni liji linene kuhiana.

²⁰ Yahinduka chimenemene, yaya ku puya ya Tekoa, mba shimbu machituhuka Yehosofate yamana, yamba ngwenyi, Enu A-Yunda ni yenu A-Yerusaleme ngwivwenu. Jikijilenu hali Yehova Zambi yenu, chocho munukola; fulielenu aprofeta jenyi, chocho yuma yenu muyiwaha.

²¹ Muze halitesa ni e atu, yatongola akwa kwimbila Yehova nikuhalisa mu upeme wa usandu shimbu matetekela tujita ngwo, Sakwilenu kuli Yehova, mumu utu wa zango lienyi wa mutolo.

²² Mba muze o haputuka kwimba ni kuhalisa, Yehova yatuma akwa kujikinyina akalimike ni A-Amone, ni A-Moape, ni akwa mulundu wa Sere waze ejile kwasa jita ni A-Yunda, mba yaakumba.

²³ Mumu A-Amone ni A-Moape yalimika ni akwa mulundu wa Sere kwashiha ni kwanongesa liakulu. Mba muze hamanuna A-Sere, mweswe wakwashile kunongesa mukwo.

²⁴ Ha kuheta A-Yunda ku kaposhi ka kalayi mu puya, yatala ku mbunga yize, kumanyi eswe hanafu, halimbukila hashi. Kalilamwinyine chipwe umuwika.

²⁵ Muze Yehosofate ni atu jenyi ejile kupupa upite wo, yawana hakachi ko kulumbama cha upite ni mijimba ya afu, ni yuma ya uhenya ya ndando yilemu, mba yalichijilayo kuhiana yize mahasa kumbata. Matangwa atatu apwile nikuchiza upite mumu woka naye.

²⁶ Mba ha tangwa liamuchiwana yakungulukila mu chikulo cha Mberaka mumu kwenako yahalisa Yehova. Kashika jina lia kuma kuze ngwo, Chikulo cha Mberaka ndo musono.

²⁷ Mba yahiluka eze ku Yerusaleme ni uwahililo, malunga eswe a Yunda ni Yerusaleme, ni Yehosofate kulutwe lio; mumu Yehova haaha uwahililo hali akwa kole jo.

²⁸ Yeza ku Yerusaleme ni yisaji ya kusa, ni tulialia, ni yitavwi ndo ku zuwo lia Yehova.

²⁹ Mba woma wa Zambi wapwile hali mavungu eswe a yifuchi ha kwivwa chize Yehova hasa jita ni akwa kole ja A-Izalele.

³⁰ Chocho chifuchi cheswe cha Yehosofate chahwimine, mumu Zambi yenyi yamwaha kuhwima kweswe kwa kujingilika.

³¹ Yehosofate wayulile A-Yunda. Ha kuputuka kuyula wapwile ni makumi atatu a miaka ni miaka yitano; wayulile makumi aali a miaka ni miaka yitano mu Yerusaleme. Jina lia naye Azuba mwana Shilihi.

³² Wendele mu jila ya tato Asa. Kapiangukilemo; walingile chipema kumeso ja Yehova.

³³ Hindu kachijile manangamo, e atu kanda achisa mbunge jo kuli Zambi ya tulamba two.

³⁴ Yitanga yikwo ya Yehosofate, yitangu ni yasula, hanayisoneka mu mukanda wa sango ja Jehu mwana Hanani uze hanapalakenya ni mukanda wa mianangana ja Izalele.

³⁵ Kulutwe lia yino yuma Yehosofate mwanangana wa Yunda yalikunda ni Ahazia mwanangana wa Izalele, mukwa kulinga chipi chikolo.

³⁶ Yalikunda nenyi akatunge mato a kuya ku Tashi, mba yatunga e mato mu Ezione-Ngebere.

³⁷ Henaho Elieza mwana Dodava wa ku Maresa yaprofeteza kulimika ni Yehosofate ngwenyi, Mumu hiwalikunda ni Ahazia, kashika Yehova honwona yitanga ye. Mba mato amakukine; kahashile kuya ku Tashi.