2 Sango Ja Mianangana 2 - MUKANDA USANDU WA ZAMBI 1975

¹ Solomone wapalile kutunga zuwo ha jina lia Yehova, ni zuwo Ukwo lia wanangana wenyi.

² Solomone yasela makumi shimbiali a tununu a malunga akambate yiteli, ni makumi nake a tununu a malunga akatete mitondo mu milundu, ni tununu atatu ni kulakaji asambano a tulayi two.

³ Solomone yatuma kuli Hurame mwanangana wa Teru ngwenyi, Walingile kanawa ni tata David nikumutumina mitondo ya sedru akalitungile zuwo lia kutwamamo; hilinga chizechene ni yami.

⁴ Mungutunga zuwo ha jina lia Yehova Zambi yami ngukamutumbikilelio hanga tukamwochele insensu ya lupembo mupema kumeso jenyi, ni ha mbolo ja kutumbieka matangwa eswe, ni ha milambu ya kulumba chimene ni chingoloshi, ha masambata, ni ha kakweji mwaha, ni ha yiwanyino ya Yehova Zambi yetu ya kufunjika. Yino yapwa ya shimbi kuli A-Izalele ku miaka ya mutolo.

⁵ Zuwo mungutunga linene, mumu Zambi yetu iye munene helu lia mazambi akwo eswe.

⁶ Iya mahasa kumutungila zuwo se lilu ni lilu lia malilu kuliamutele? Ni yami kuchi munguhasa kumutungila zuwo shina kwochelamo insensu wika kumeso jenyi?

⁷ Kashika Ungutume umwe lunga kali ni utotombo wa kulinga milimo ni oru, ni prata, ni unengu, ni utale, ni mahina a ufungo, ni achila, ni alauluka; umwe wa ulangaji wa kwola cheswacho, akaliweze kuli akwa utotombo nguli no mu Yunda ni Yerusaleme, a kusela kuli tata David.

⁸ Ungutumine nawa mitondo ya sedru, ni ya kupresu, ni ya mialumuke ya ku Lebano; mumu ngunanyingika, ngamba je kali ni ulangaji wa kuteta mitondo mu Lebano, ni ngamba jami mapwa hamwe ni ngamba je

⁹ akangululikile mitondo ya kulumbama, se zuwo lino ngunambe kutunga mulipwa chikomokeso.

¹⁰ Mba munguhana kuli ngamba j e akwa kuteta mitondo, makumi aali a tununu twa njongo ja tiliku ya kundonda, ni makumi aali a tununu twa sevada, ni makumi aali a tununu twa *mbate ja vinyu, ni makumi aali a tununu twa mbate ja maji.

¹¹ Mba Hurame mwanangana wa Teru yasoneka kumbululo, yalituma kuli Solomone ngwenyi, Yehova kanazange atu jenyi, kashika hakupwisa mwanangana wo.

¹² Hurame yaweza nawa ngwenyi, Yehova Zambi ya Izalele, Tangi ya lilu ni hashi, afumane, mumu hahana kuli mwanangana David mwana umwe wa mana ni malinjekela ni yinyingi, akatungile Yehova zuwo, ni zuwo lia wanangana nawa.

¹³ Ngunatumu umwe mukwa utotombo, wa tò ni yinyingi, wapwile te wa tata Hurame.

¹⁴ Aye te mwana wa pwo umwe Ka-Ndane, alioze tato wa ku Teru. Aye chilangaji wa milimo yeswe ya oru, ni prata, ni unengu, ni utale, ni mawe, ni mutondo, ni mahina a ufungo, ni alauluka, ni a linyu lipema, ni achila. Kanahase milimo yeswayo ya kwola, ni kweseka ndesenyu yeswayo. Umusele milimo hakachi ka malunga je a utotombo ni malunga akwa utotombo a mwata wami tatenu David.

¹⁵ Kashika atume kuli tuvumbi twe ye tiliku, ni sevada, ni maji, ni vinyu mwata wami wambile,

¹⁶ mba yetu mututeta mitondo mu Lebano yeswayo unafupu. Mutuyineha kuli yenu ku kalunga-lwiji ku Yopa mu yimikuta, mba yenu munuyihetesa ku Yerusaleme.

¹⁷ Mba Solomone yalula yilambala eswe apwile mu chifuchi cha Izalele nikukaula kwalula chize tato David waalwile. Yawana kulakaji lia tununu ni makumi atano a tununu ni tununu atatu ni kulakaji asambano.

¹⁸ Hakachi ko yasela makumi shimbiali a tununu kumbata yiteli, ni makumi nake a tununu kuteta mitondo mu milundu, ni tununu atatu ni kulakaji asambano a tulayi kushinjika atu ku milimo.