2 Sango Ja Mianangana 19 - MUKANDA USANDU WA ZAMBI 1975

¹ Yehosofate mwanangana wa Yunda yahiluka ni sambukila ku zuwo lienyi mu Yerusaleme.

² Mba mukwa kumona, Jehu mwana Hanani, yamupatwiza, yamba kuli mwanangana Yehosofate ngwenyi, Te Chakutamba kukwasa yingulungulu ni kuzanga waze akuvwila kole Yehova? Ha chikuma chino ufwatulo wa Yehova hiweza hali yena.

³ Hindu yimwe yuma yipema hayiwana muli yena se wachijile Ashera mu chifuchi, mba wasele mbunge ye kufupa Zambi.

⁴ Yehosofate Watwamine ku Yerusaleme. Yatuhuka cheka nawa hakachi ka atu chize ku Mbia-shipa ndo ku chifuchi cha Eframe ku milundu nikwahilwisa kuli Yehova Zambi ya tulamba two.

⁵ Yasela ngaji mu chifuchi ndusu yihunda yeswe ya yipanga mu Yunda, chihunda ha chihunda.

⁶ Yamba kuli ngaji ngwenyi, Nyongenu kanawa chize nunalingi, mumu kunwalingile upatwilo hali atu alioze hali Yehova, mba iye kwali hamwe ni yenu mu upatwilo.

⁷ Kashika pwenu ni woma wa Yehova. Talenu kanawa nukachilinge, mumu uhenge kuushiko kuli Yehova Zambi yenu, chipwe katonde, hanji kutambula yijiko.

⁸ Chikwo nawa mu Yerusaleme Yehosofate yasela amwe A-Levi, ni asasendote, ni amwe akwa lutwe a minyachi ya atato a A-Izalele ha upatwilo wa Yehova, ni ha kusopa. O yatwama ku Yerusaleme.

⁹ Yaaha shimbi ngwenyi, Munulinga chino ni woma wa Yehova, ni kutuwika cha mbunge yingunu.

¹⁰ Mba muze akwenu waze atwama mu yihunda yo manunehena chikuma chimwe kusopa hakachi ka manyinga ni manyinga, hanji shimbi ni liji, hanji chiyulo ni upatwilo munwatoweza, kanda ahia kumeso ja Yehova akanukokele ufwatulo hali yenu ni hali akwenu. Lingenu chocho mba kunuchi kahia.

¹¹ Chikwo nawa Amaria sasendote mukwa lutwe manuyula mu yuma yeswe ya Yehova; ni Zebadia mwana Ishemali, mukwa kuyula munyachi wa Yunda manuyula mu yuma yeswe ya mwanangana; ni A-Levi nawa mapwa tusongo kumeso jenu. Lingenu ni hamu, ni Yehova akapwe hamwe ni e apema.