2 Sango Ja Mianangana 18 - MUKANDA USANDU WA ZAMBI 1975

¹ Yehosofate wapwile ni upite ni ulemu wa kulumbama, mba yalikata usendo ni Ahabe.

² Kulutwe lia miaka yimwe yaya kumeneka Ahabe mu Samaria. Ahabe yamushihila mapanga ni ngombe a kulumbama, ni hali atu aze ejile no, mba yamulembejeka akaye hamwe nenyi ku Ramote-Ngiliate.

³ Ahabe mwanangana wa Izalele yamba kuli Yehosofate mwanangana wa Yunda ngwenyi, Kumuoya ni yami ku Ramote-Ngiliate? Aye ngwenyi, Ami napwa chimuwika ni yena, ni atu jami kapwa ngwe atu je. Kumutuya ni yena mu jita.

⁴ Alioze Yehosofate yamba kuli mwanangana wa Izalele ngwenyi, Musono hula kama ku liji lia Yehova.

⁵ Mba mwanangana wa Izalele yakungulula aprofeta hamuwika; kulakaji awana a malunga. Yamba kuli ayo ngwenyi, Kumutuya mu jita ku Ramote-Ngiliate nyi ngulitwamine? O ngwo, Yénu; mumu Zambi kumakachikunjika mu moko ja mwanangana.

⁶ Alioze Yehosofate yamba ngwenyi, Kukushi umwe profeta wa Yehova nawa, tukamuhule?

⁷ Mwanangana wa Izalele yamba kuli Yehosofate ngwenyi, Kwali hindu umwe lunga mutuhasa kuhula Yehova kuli iye, alioze kole ngunamuvwila mumu keshi kuprofeteza chipema hali yami nilimwe tangwa, ndo chipi wika; Mikaia mwana Imala jina lienyi. Yehosofate yamba ngwenyi, Mwanangana kanda amba chocho.

⁸ Henaho mwanangana wa Izalele yasanyika kapitau ngwenyi, Neha Mikaia mwana Imala nikawashi.

⁹ Achi mwanangana wa Izalele ni Yehosofate mwanangana wa Yunda yatwama, au ha ngunja yenyi, au ha ngunja yenyi, mu mahina jo a ngungu. Kanatwama mu lwaza ha unjililo wa chikolo cha Samaria; ni aprofeta eswe kanaprofeteza kumeso jo.

¹⁰ Zedekia mwana Chenana yalilingila mbinga ja utale ngwenyi, Yehova kanambe ngwenyi, Ni jino mushinjika A-Seria ndo makuwa.

¹¹ Aprofeta eswe aprofetezele ngwo, Yénu ku Ramote-Ngiliate nikuwaha, mumu Yehova machikunjika mu moko ja mwanangana.

¹² Mukeji yoze hatuma kusanyika Mikaia yamba kuli iye ngwenyi, Aprofeta eswe ni kanwa limuwika kanambe yuma yipema kuli mwanangana. Kashika liji lie lipwe ngwe lia umwe hakachi ko, uhanjike yipema kama.

¹³ Alioze Mikaia yamba ngwenyi, Ni mwono wa Yehova chize Zambi yami mahanjika chenacho mungwamba.

¹⁴ Ha kuheta kuli mwanangana, mwanangana yamba kuli iye ngwenyi, Mikaia, kumutuya mu jita ku Ramote-Ngiliate nyi ngulitwamine? Aye yamba ngwenyi, Yénu nikuwaha; maakunjika mu moko jenu.

¹⁵ Mwanangana yamba kuli iye ngwenyi, Kangahi mungukushingisa kanda uhanjika kuli yami shina umwenemwene wika mu jina lia Yehova.

¹⁶ Profeta yamba ngwenyi. Namwene A-Izalele eswe anamwangana ha milundu ngwe mapanga waze keshi kafunga. Mba Yehova yamba ngwenyi, Wano keshi kakó; aye mutu mweswe ku zuwo lienyi ni sambukila.

¹⁷ Mwanangana wa Izalele yamba kuli Yehosofate ngwenyi, Kuchi nakwambanga? Au kechi kuprofeteza yipema hali yami, alioze yipi wika.

¹⁸ Mba Mikaia yamba ngwenyi, Nyi chocho panjika ku liji lia Yehova. Namwene Yehova kanatwama ha ngunja yenyi ni mbunga yeswe ya mwilu kumana ku chindume chenyi ni ku chimeso chenyi.

¹⁹ Yehova yamba ngwenyi, Iya masongojola Ahabe mwanangana wa Izalele akaye akafwe ku Ramote-Ngiliate? Umwe yamba ngwenyi, Mungulinga Chichino; mukwo ngwenyi, Mungulinga Chichize.

²⁰ Alioze yikwiza Spiritu umwe; yamana kumeso ja Yehova ngwenyi, Yami mungumusongojola. Yehova ngwenyi, Neka?

²¹ Aye yamba ngwenyi, Munguya, mungupwa spiritu ya mahuza mu makanwa ja aprofeta jenyi eswe. Aye yamba ngwenyi, Ena mukamusongojola, mukamukumba nawa. Yako ulinge chocho.

²² Kashika Yehova hasa Spiritu ya mahuza mu makanwa ja wano aprofeta je, mba Yehova hanahanjika chipi ha kutwala kuli yena.

²³ Henaho Zedekia mwana Chenana yakundama, yalamba Mikaia mbangala ha tafu ngwenyi, Mba Spiritu ya Yehova kuchi atuhuka kuli yami akahanjike kuli yena?

²⁴ Mikaia ngwenyi, Kumukachimona ha tangwa lize muze mukanjila mu chipatulo cha muchima nikuswama.

²⁵ Mwanangana wa Izalele yamba ngwenyi, Kwatenu Mikaia numuhilwise kuli Amone nguvulu ya chihunda, ni kuli Njoashe mwana wa mwanangana;

²⁶ nukambe ngwenu, Mwanangana kanambe ngwenyi, Senu yono mu zuwo lia ususu nikumulisa ni mbolo ya luyinda ni meya a luyinda ndo mungwiza ni sambukila.

²⁷ Mikaia yamba ngwenyi, Pundu, nyi muwiza ni sambukila Yehova kahanjikile ni yami. Yaweza nawa ngwenyi, Ni yenu atu eswe, panjikenu.

²⁸ Chocho mwanangana wa Izalele ni Yehosofate mwanangana wa Yunda yaya ku Ramote-Ngiliate.

²⁹ Mwanangana wa Izalele yamba kuli Yehosofate ngwenyi, Ha kunjila mu jita ami mungulihipula; alioze ena, zala mahina je a ngungu. Chocho mwanangana wa Izalele yalihipula; mba eswe aali yaya ku jita.

³⁰ Achi mwanangana wa Seria te hanambe kuli tupitau twenyi twa matemba-a-jita ngwenyi, Kanda nwasa jita ni anene chipwe akepe, ndo ni mwe mwanangana wa Izalele wika.

³¹ Kashika muze tupitau twa matemba-a-jita hamona Yehosofate, yamba ngwo, Mwanangana wa Izalele yewo! Mba yalumuka kulimika nenyi. Alioze Yehosofate yateta, ni Yehova yamukwasa. Zambi yaanyongesa kumwecha.

³² Muze tupitau twa matemba-a-jita hamona, hi mwanangana wa Izalele ko, kamukawile nawa, yahilukako.

³³ Alioze umwe mutu yanana uta wenyi chinanyina lume; yasa mwanangana wa Izalele ha unungino wa uzalo wenyi wa utale. Aye yamba kuli mukwa kwendesa temba lienyi lia jita ngwenyi, Alumuka unguchize hakachi ka tujita mumu kangwasa chipi chikolo.

³⁴ Jita yiyiliwezela tachi tangwa lize, hindu mwanangana wa Izalele yamukundwiza mu temba lienyi lia jita kulimika ni A-Seria ndo chingoloshi. Mba ha kunjila cha tangwa yafwa.