2 Sango Ja Mianangana 17 - MUKANDA USANDU WA ZAMBI 1975

¹ Mwanenyi Yehosofate yamuswana mu wanangana, mba yalitakamisa kulimika ni A-Izalele.

² Yasa maswalale mu yihunda yeswe ya yipanga mu Yunda, ni mbonge ja tujita mu chifuchi cha Yunda ni mu yihunda ya Eframe yize tato Asa watambwile.

³ Yehova wapwile hamwe ni Yehosofate mumu wendele mu ndako jitangu ja kalamba kenyi David. Kayile kuli Ambale.

⁴ Alioze wafupile Zambi ya kalamba kenyi nikwenda mu maliji jenyi. Kendele mu yitanga ya Izalele.

⁵ Kashika Yehova wakolesele wanangana mu kwoko lienyi. A-Yunda eswe anehene milambu kuli Yehosofate; wapwile ni upite ni ulemu wa kulumbama.

⁶ Mbunge yenyi yatakamine mu majila ja Yehova; ni chikwo nawa wachijile manangamo ni Ashera mu Yunda.

⁷ Ha mwaka wamuchitatu wa kuyula chenyi yatuma alemu jenyi, Mbene-hale, ni Obadia, ni Zekaria, ni Netanele, ni Mikaia, akalongese mu yihunda ya Yunda.

⁸ Hamuwika no kwayile A-Levi: Shemaia, ni Netania, ni Zebadia, ni Asahele, ni Shemiramote, ni Jehonatane, ni Adonija, ni Tobija, ni Tobadonija. Ni hamuwika no nawa asasendote Elisama ni Jorame.

⁹ Wano alongesele mu Yunda, no ambachile mukanda wa shimbi ya Yehova hamwe no. Yajingajinga mu yihunda yeswe ya Yunda nikulongesa hakachi ka atu.

¹⁰ Woma wa Yehova wejile hali akwa mavungu eswe a mu yifuchi ya kujingilika Yunda. Kashile jita nawa ni Yehosofate.

¹¹ Amwe hakachi ka A-Filistea yaneha milambu kuli Yehosofate ni lijimu lia prata. A-Arabia nawa yamunehena mapanga ni pembe; tununu shimbiali a mapanga ni kulakaji shimbiali, a kuji; ni tununu shimbiali a pembe ni kulakaji shimbiali, a kuji.

¹² Yehosofate walemene chikolo. Mu Yunda watungile mbonge ni yihunda ya kutulikila.

¹³ Wapwile ni yuma yinji ya kutulika mu yihunda ya Yunda ni tujita mu Yerusaleme, yitakame a hamu.

¹⁴ Kwalula cho nikulita ni minyachi ya atato, chino; tupitau twa tununu twa A-Yunda; kapitau Adena ni yitakame a hamu hamwe nenyi kulakaji atatu a tununu.

¹⁵ Hikusesa kuli iye kapitau Jehohana ni hamwe nenyi kulakaji aali ni makumi nake a tununu.

¹⁶ Hikusesa kuli iye kapitau Amasia mwana Zikiri, iye walihanyine ni mbunge yeswe kuli Yehova; hamwe nenyi kwapwile kulakaji aali a tununu a yitakame a hamu.

¹⁷ Ku Mbenjamine Eliada umwe chitakame wa hamu ni hamwe nenyi kulakaji aali a tununu akumbata mata a chinjamina ni kepwe.

¹⁸ Hikusesa kuli iye Yehozabade ni hamwe nenyi kulakaji ni makumi nake a tununu akwa kujama ha jita.

¹⁹ Wano avumbikile mwanangana kuweza kuli waze mwanangana wasele mu yihunda ya yipanga ndusu mu Yunda.