2 Sango Ja Mianangana 16 - MUKANDA USANDU WA ZAMBI 1975

¹ Ha mwaka makumi atatu ni wamuchisambano wa kuyula cha Asa, Mbasha mwanangana wa Izalele yeza kulimika ni A-Yunda. Yatungisa Rama kukwika waze mazanga kutuhuka, hanji kunjila kuli Asa mwanangana wa Yunda.

² Kashika Asa yachiza prata ni oru ku upite wa zuwo lia Yehova ni wa ku zuwo lia mwanangana; yatuma kuli Mbene-Hadade mwanangana wa Seria, yoze watwama mu Ndamaseku, ngwenyi,

³ Usendo uliko hakachi ka yena ni yami ngwe uze wapwile hakachi ka tata ni tatenu. Haliapwila ngunakutumina prata ni oru, kashika shiha usendo we ni Mbasha mwanangana wa Izalele hanga angukatuke kama.

⁴ Mbene-Hadade yapanjika kuli mwanangana Asa; yatuma tupitau a tujita kulimika ni yihunda ya Izalele. Yapupa Ijone, ni Ndane, ni Abele-maime, ni yihunda ya Napatali ya kutulikila.

⁵ Muze Mbasha hachivwa yalitwamina kutunga Rama; milimo yeswe yiyihola.

⁶ Mba mwanangana Asa yatwala A-Yunda eswe, yatuta mawe a ku Rama, ni mitondo yako yize te Mbasha watungile nayo. Aye yatunga nayo Ngeba ni Mizepa.

⁷ Ha mwaka uze Hanani mukwa kumona yeza kuli Asa mwanangana wa Yunda, yamba kuli iye ngwenyi, Mumu hiwajikijila hali mwanangana wa Seria, kwajikijilile Yehova Zambi ye, kashika mbunga ya tujita twa mwanangana wa Seria hanomboka mu kwoko lie.

⁸ A-Etiopia ni A-Lubimi te kapwile anji, ni matemba-a-jita ni akwa tuvwalu anji kuhiana? Hindu Yehova waakunjikile mu moko je mumu wajikijilile hali iye.

⁹ Mumu meso ja Yehova kakuzomboka ndusu hashi heswe akalisolole mukwa tachi kukwasa yoze uli ni mbunge yingunu kuli iye. Ha chuma chino hiwalinga ni uhepuke, mumu chize ku musono muopwa ni jita.

¹⁰ Asa yatenuka ni mwe mukwa kumona, yamusa mu zuwo lia ususu. Wamuvwilile ufwatulo ha chikuma chino. Asa yapinjisa amwe hakachi ka e atu nawa ha matangwa aze.

¹¹ Yitanga ya Asa, yitangu ni yasula, hanayisoneka mu mukanda wa mianangana ja Yunda ni Izalele.

¹² Ha mwaka makumi atatu ni wamuchilivwa wa kuyula chenyi Asa wapwile ni musongo mu molu jenyi. Musongo wenyi wapwile upi chikolo hindu ha musongo wenyi kafupile Yehova alioze yafupa mbuki.

¹³ Asa yaya tulo, yaya kuli tulamba twenyi ha mwaka makumi awana ni utangu wa kuyula chenyi.

¹⁴ Yamufunda mu fuka lienyi lize hatotesa hali iye mwene mu chihunda cha David. Yamusa ha muhela wa tò ni tumbuto twa lupembo mupema ni yitumbo yeka ni yeka ya kululika nikulita ni yinyingi ya mukwa yitumbo. Yalinga kahia kanji ka kumulemesa.