2 Sango Ja Mianangana 15 - MUKANDA USANDU WA ZAMBI 1975

¹ Spiritu ya Zambi yahulumuka hali Azaria mwana Odede,

² mba yaya kupatwiza Asa. Yamba kuli iye ngwenyi, Ngwivwenu, Asa ni A-Yunda ni A-Mbenjamine eswe; Yehova mapwa hamwe ni yenu nyi yenu munupwa hamwe nenyi. Nyi munumufupa munumuwana, alioze nyi munumwehuka iye manwehuka.

³ Ha shimbu linene A-Izalele hahona mwe Zambi wamwenemwene, chipwe sasendote mukwa kulongesa, chipwe shimbi.

⁴ Alioze mu lamba lio muze alumukinyine kuli Yehova Zambi ya Izalele ni kumufupa, yamuwana.

⁵ Ha miaka yize kukwapwile kuhwima, chipwe ha kutuhuka chipwe ha kunjila, alioze kulifwita chinji kuli atu eswe a mu yifuchi.

⁶ Amakukine, vungu kulilamba ni vungu, chihunda kulilamba ni chihunda, mumu Zambi waapinjishile ni luyinda mweka ni mweka.

⁷ Alioze takamenu; moko jenu kanda akokoloka, mumu manukundulwila milimo yepu.

⁸ Ha kwivwa maliji ano, ni uprofeto wa profeta Odede, Asa wahamukine ni kuchiza yizelwokeso mu chifuchi cheswe cha Yunda ni Mbenjamine, ni mu yihunda yize hatambula mu chifuchi cha Eframe ku milundu. Yalulika nawa chilumbilo cha Yehova cha kulutwe lia senge lia Yehova.

⁹ Yakungulula A-Yunda ni A-Mbenjamine eswe ni waze hatunga no a ku Eframe ni Manase ni Simeone; mumu atu anji a mu Izalele ejile kuli iye ha kumona Yehova Zambi yenyi kwali hamwe nenyi.

¹⁰ Chocho yakunguluka ku Yerusaleme ha kakweji wamuchitatu ha mwaka kumi ni wamuchitano wa kuyula cha Asa.

¹¹ Yalambula yitapo kuli Yehova tangwa lize ya upite uze haneha: kulakaji shimbiali a ngombe ni tununu shimbiali a mapanga.

¹² Yakolesa usendo kufupa Yehova Zambi ya tulamba two ni mbunge jo jeswe ni mwono wo weswe;

¹³ ni mweswawo kechi kufupa Yehova Zambi ya Izalele akamushihe, apwe mukepe, apwe munene, apwe lunga, apwe pwo.

¹⁴ Yalishinga kumeso ja Yehova ni liji linene ni kukololoka, ni yitavwi, ni njalamina.

¹⁵ A-Yunda eswe yawahilila ni shingo lino mumu halishinga ni mbunge yeswe; hamufupa ni upale wo weswe, hamuwana. Mba Yehova yaaha kuhwima kweswe kwa kujingilika.

¹⁶ Ni Maka nawa, naye ya mwanangana Asa, yamuchiza ku wanangana mumu ha kulinga kaponya wa lwaji wa Ashera Kashika Asa yateta kaponya kenyi ni kumufwenyona fufuta ni kumwocha ku chitwetwe Kendrone.

¹⁷ Alioze kachijile manangamo mu Izalele. Hindu mbunge ya Asa yingunu matangwa jenyi eswe.

¹⁸ Yaneha mu zuwo lia Zambi yuma yize tato hatumbikila, ni yuma yize iye hatumbikila: prata, ni oru, ni yikwachilo.

¹⁹ Kukwapwile jita nawa ndo ku mwaka makumi atatu ni wamuchitano wa kuyula cha Asa.