2 Sango Ja Mianangana 14 - MUKANDA USANDU WA ZAMBI 1975

¹ Chocho Abija yaya tulo, yaya kuli tulamba twenyi. Yamufunda mu chi hunda cha David, mba mwanenyi Asa yamuswana mu wanangana. Ha matangwa jenyi chifuchi chahwimine kumi lia miaka.

² Asa walingile chipema ni chize Chinalulama kumeso ja Yehova Zambi yenyi.

³ Yachiza yilumbilo ya yilambala ni manangamo, yapalwola tuponya, ni kutetateta Ashera.

⁴ Yatumina A-Yunda afupe Yehova Zambi ya tulamba ni kufunga ye shimbi ni lie liji.

⁵ Chikwo nawa yachiza mu yihunda yeswe ya Yunda manangamo ni yilumbilo ya insensu, mba chifuchi chahwimine kumeso jenyi.

⁶ Yatunga yihunda ya kukolesa mu Yunda, mumu chifuchi chahwimine. Kapwile ni jita ha miaka yize se Yehova hamwaha uhwimino.

⁷ Mumu iye yamba kuli A-Yunda ngwenyi, Tutungenu yihunda yino tukajingilike ni yipanga-ya-mawe, ni tuposhi, ni mapito ni njalo. Chifuchi nichetu mumu hitwafupa Yehova Zambi yetu. Hitwamufupa, mba hatwaha kuhwima kweswe kwa kujingilika. Chocho atungile ni milimo yo yawahile.

⁸ Asa wapwile ni tujita twa kumbata kepwe ni makunga, kulakaji atatu a tununu a mu Yunda. A mu Mbenjamine akwa kepwe ni mata a chinjamina kulakaji aali a tununu ni makumi nake a tununu. Wano eswe malunga a tachi ni hamu.

⁹ Kwejile mukwasa no jita Zera wa Etiopia ni mbunga ya kanunu ka tununu, ni kulakaji atatu a matemba. Yaheta ku Maresa.

¹⁰ Asa yatuhuka kutakana nenyi, mba yalulika jita mu chana cha Zefata ku Maresa.

¹¹ Asa yalemba kuli Yehova Zambi yenyi ngwenyi, Yehova, kukushi chikwashi shina yena hakachi ka mukwa ndundo ni yoze keshi tachi. Tukwase kama, Yehova Zambi yetu, mumu hali yena tunajikijila ni mu jina lie hitwatuhuka kulimika ni mbunga yino. Yehova, uli Zambi yetu, kanda utayiza atu kukukumba.

¹² Chocho Yehova yalamba A-Etiopia kumeso ja Asa, ni kumeso ja A-Yunda. A-Etiopia yachina.

¹³ Asa ni atu aze apwile no yaahanga ndo ku Ngerare. A-Etiopia afwile anji chocho kahashile kulikwasa, mumu akuwile kumeso ja Yehova ni tujita twenyi. A-Yunda atambwile upite wunji chikolo.

¹⁴ Yapupa yihunda yeswe ya kujingilika Ngerare mumu woma wa Yehova waakwata. Yatambula upite mu yihunda yeswe mumu te yihunda ya upite wunji.

¹⁵ Yapupa nawa matanga a ngombe nikumbata mapanga ni tumelu a kulumbama. Chocho yahiluka ku Yerusaleme.