2 Sango Ja Mianangana 13 - MUKANDA USANDU WA ZAMBI 1975

¹ Ha mwaka kumi ni wamuchinake wa mwanangana Jeroboame Abija yapu tuka kuyula A-Yunda.

² Wayulile miaka yitatu mu Yerusaleme. Jina lia naye Mikaia mwana Uriele wa mu Ngibia. Kwapwile jita hakachi ka Abija ni Jeroboame.

³ Abija yalulika jita ni mbunga ya tujita akwa hamu, kulakaji awana a tununu a malunga a kusakula. Jeroboame yalulika jita kulimika nenyi ni kulakaji nake a tununu a malunga a kusakula, yitakame, akwa hamu.

⁴ Abija yamana ha mulundu wa Zemaraime mu chifuchi cha Eframe ku milundu. Yamba ngwenyi, Ngwivenu! Enu Jeroboame ni A-Izalele eswe.

⁵ Chanutamba kunyingika, Yehova Zambi ya Izalele wahanyine wanangana wa Izalele kuli David ku miaka yeswe; kuli iye, ngwami, ni kuli anenyi a malunga ni usendo wa mungwa.

⁶ Hindu Jeroboame mwana Nebate ngamba ya Solomone mwana David hakatuka ni kukolema mwene wenyi.

⁷ Kwakungulukile kuli iye amwe malunga amokomoko, nikulitakamisa kulimika ni Rehoboame mwana Solomone shimbu Rehoboame wapwile mukweze wa mbunge yovu, kahashile kulimika no.

⁸ Musono nawa nunanyongo kulimika ni wanangana wa Yehova mu moko ja ana ja David. Ni yenu nuli mbunga yinene, nuli ni ngombe a oru a Jeroboame hanulingila akapwe mazambi jenu.

⁹ Ngwami, Hinwahuma asasendote a Yehova ana ja Arone, ni A-Levi. Hinwalilingila asasendote nikulita ni ndako ja atu a yifuchi yikwo. Mweswawo meza ni chimbembe wa kuji ni kuji a mapanga shimbiali akalitumbikile, mahasa kupwa sasendote ya waze hi mazambi ko.

¹⁰ Alioze ha kutwala kuli yetu Yehova iye Zambi yetu, kutwamwehukile. Tuli ni asasendote ana ja Arone kanalingila Yehova, ni A-Levi ku milimo yo.

¹¹ O kakwochela milambu ya kulumba ni insensu ya lupembo mupema kuli Yehova chimene ni chingoloshi. Ni mbolo ja kutumbieka kakusa nikulita ha mesa ya kulinanga. Kakuwika ndeya ha chikwachilo cha oru jikatemuke matangwa eswe ha ngoloshi, mumu yetu twakufunga milimo ya Yehova Zambi yetu, alioze yenu hinwamwehuka.

¹² Chikwo nawa Zambi kwali hamwe ni yetu kututetekela, ni asasendote jenyi ni yitavwi ya kulungula akahumune kutulungula kulimika ni yenu. Enu A-Izalele! Kanda nwasa jita ni Yehova Zambi ya tulamba twenu, mumu kunuchi kuwahamo.

¹³ Alioze Jeroboame yatuma amwe kujinga kunyima yo; chocho o apwile kulutwe lia A-Yunda ni akwa kujinga apwile kunyima yo.

¹⁴ Mba muze A-Yunda yatala kunyima, jita yapwile kulutwe lio ni kunyima yo. O yateta kuli Yehova ni asasendote ahumwine yitavwi.

¹⁵ Henaho malunga A-Yunda yakololoka, ni ha kukololoka malunga A-Yunda, Zambi yalamba Jeroboame ni A-Izalele eswe kuli Abija ni A-Yunda.

¹⁶ Mba A-Izalele yachina kumeso ja A-Yunda; Zambi yaakunjika ku moko jo.

¹⁷ Abija ni atu jenyi yaashiha, anji chikolo. Chocho kwafwile kuli A-Izalele kulakaji atano a tununu a malunga a kusakula.

¹⁸ Chocho A-Izalele azeyele ha miaka yize; A-Yunda akumbile mumu ajikijilile hali Yehova Zambi ya tulamba two.

¹⁹ Ni Abija yahanga Jeroboame; yamutambula yihunda: Mbetele ni tuyihunda twako, ni Njeshana ni tuyihunda twako, ni Efrone ni tuyihunda twako.

²⁰ Ni Jeroboame katambwile nawa tachi ha matangwa ja Abija, mba Yehova yamulamba, yafwa.

²¹ Alioze Abija yaliwezela ndundo. Yambata kumi lia mapwo ni mapwo awana. Yasema makumi aali a ana a malunga ni ana a malunga aali, ni kumi lia ana a mapwo ni ana a mapwo asambano.

²² Yitanga yikwo ya Abija, ni ndako jenyi, ni yambo yenyi hanayisoneka mu ulumbunwiso wa mukanda wa profeta Ido.