2 Sango Ja Mianangana 12 - MUKANDA USANDU WA ZAMBI 1975

¹ Alioze muze wanangana wa Rehoboame hiwakola ni mwene hatakama, Wehukile shimbi ya Yehova, ni A-Izalele eswe hamwe nenyi.

² Mba ha mwaka wamuchitano wa mwanangana Rehoboame, Shishake mwanangana wa Engitu yeza kulimika ni Yerusaleme mumu havulumuna Yehova.

³ Yeza ni kumi lia kulakaji ni kulakaji aali a matemba-a-jita, ni makumi asambano a tununu a akwa tuvwalu, ni atu aze akatukile nenyi ku Engitu kahashile kwaalula: A-Lubimi, ni A-Sukime, ni A-Etiopia.

⁴ Yatambula yihunda ya kukolesa ya Yunda, mba yeza ku Yerusaleme.

⁵ Henaho profeta Shemaia yeza kuli Rehoboame ni e alemu a Yunda waze hakungulukila ku Yerusaleme mumu hali Shishake. Yamba kuli ayo ngwenyi, Yehova kanambe ngwenyi, Enu hinwangwehuka, kashika ni yami hinanwehuka mu kwoko lia Shishake.

⁶ Mba alemu ja Izalele hamuwika ni mwanangana yalikehesa. Yamba ngwo, Yehova mukwa ululi.

⁷ Muze Yehova haamona kulikehesa, liji lia Yehova yiliza kuli Shemaia ngwo, Halikehesa; chichi kaonwona, alioze mungwapulula hakehe. Utenu wami kuuchi kazukuka hali A-Yerusaleme ku kwoko lia Shishake.

⁸ Hindu kumapwa ngamba jenyi hanga akanyingike ungamba wami ni ungamba wa mawanangana a yifuchi.

⁹ Chocho Shishake mwanangana wa Engitu yeza kulimika ni Yerusaleme, yambata upite wa zuwo lia Yehova, ni upite wa zuwo lia mwanangana—weswe yaumbata. Yambata nawa kepwe ja oru jize Solomone walingile.

¹⁰ Mwanangana Rehoboame yalinga kepwe ja unengu kujisalakana; yajikunjika kuli tupitau twa tulayi waze afungile chikolo cha zuwo lia mwanangana.

¹¹ Mba muze mwanangana maya ku zuwo lia Yehova tulayi meza ni kujimbata ni kujihilwisa mu zuwo lia tulayi.

¹² Muze iye halikehesa, ufwatulo wa Yehova kuwejile hali iye; kazangile kumwonwona liakulu. Chikwo nawa kwapwile yimwe yuma yipema mu Yunda.

¹³ Chocho mwanangana Rehoboame walitakamishine mu Yerusaleme ni kuyula. Mumu Rehoboame wapwile ni makumi awana a miaka ni mwaka umuwika ha kuputuka kuyula. Wayulile kumi lia miaka ni miaka shimbiali mu Yerusaleme chihunda chize Yehova watongwele hakachi ka minyachi yeswe ya Izalele akaseko jina lienyi. Jina lia naye Namahe Ka-Amone.

¹⁴ Rehoboame walingile chipi mumu kasele mbunge yenyi kufupa Yehova.

¹⁵ Yitanga ya Rehoboame, yitangu ni yasula, hanayisoneka mu mukanda wa Sango ja profeta Shemaia ni ja mukwa kumona Ido. Kwapwile jita hakachi ka Rehoboame ni Jeroboame matangwa eswe.

¹⁶ Rehoboame yaya tulo; yaya kuli tulamba twenyi. Yamufunda mu chihunda cha David, mba mwanenyi Abija yamuswana mu wanangana.