2 Sango Ja Mianangana 11 - MUKANDA USANDU WA ZAMBI 1975

¹ Muze Rehoboame heza ku Yerusaleme yakungulula munyachi wa A-Yunda ni A-Mbenjamine, kulakaji ni makumi nake a tununu a malunga a kusakula, eswe tujita, akase jita ni A-Izalele akahilwise wanangana cheka nawa kuli Rehoboame.

² Alioze liji lia Yehova yiliza kuli mutu wa Zambi Shemaia ngwo,

³ Hanjika ni Rehoboame mwana Solomone mwanangana wa Yunda ni kuli A-Izalele eswe mu Yunda ni Mbenjamine ngwe,

⁴ Yehova kanambe ngwenyi, Kanda nuyako chipwe kwasa jita ni akwenu. Mutu mweswe ahiluke ku zuwo lienyi mumu chuma chino chinakatuka kuli yami. Chocho yapanjika maliji a Yehova; kayile mukwasa jita ni Jeroboame.

⁵ Rehoboame Watwamine mu Yerusaleme, yatunga yihunda ya jita mu Yunda.

⁶ Yatunga Mbeteleme, ni Etame, ni Tekoa,

⁷ ni Mbete-Zure, ni Soko, ni Ndulame,

⁸ ni Ngata, ni Maresa, ni Zife,

⁹ ni Adoraime, ni Lakishi, ni Azeka,

¹⁰ ni Zora, ni Ajalone, ni Heprone mu Yunda ni mu Mbenjamine; yino yihunda ya yipanga-ya-mawe.

¹¹ Yakolesa je mbonge ni kusako tupitau, ni kulia, ni maji, ni vinyu.

¹² Chihunda ha chihunda yasamo kepwe ni makunga, ni kuyikolesa chikolo. Yunda ni Mbenjamine te niyenyi.

¹³ Asasendote ni A-Levi a mu Izalele mweswe, yakatuka ku manjiza jo eswe nikuswila kuli iye.

¹⁴ (Mumu A-Levi yakatuka ku yihunda yo ni yihinga yo; yeza ku Yunda ni Yerusaleme mumu Jeroboame ni ana jenyi yaambila, kazangile alinge milimo ya sasendote kuli Yehova.

¹⁵ Jeroboame yalitongwela asasendote a manangamo, ni ha mahamba ni ngombe aze halinga.)

¹⁶ Mba ku minyachi yeswe ya A-Izalele kwaakawile waze hasa mbunge jo kufupa Yehova Zambi ya Izalele. Wano yeza ku Yerusaleme akalambule yitapo kuli Yehova Zambi ya tulamba two.

¹⁷ Chocho yakolesa wanangana wa Yunda ni kutakamisa Rehoboame mwana Solomone miaka yitatu. Mumu endele miaka yitatu mu jila ya David ni Solomone.

¹⁸ Rehoboame yambata pwo Mahalate, mwana wa Jerimote mwana David ni mwana wa Abiale mwana wa Eliape mwana Yese.

¹⁹ Yasema nenyi ana a malunga; Yeushe, ni Shemaria, ni Zahame.

²⁰ Kulutwe lienyi yambata Maka mwana Absalome. Yasema nenyi Abija, ni Atai, ni Ziza, ni Shelomite.

²¹ Rehoboame wazangile Maka mwana Absalome helu lia mapwo jenyi eswe ni *akonkubina eswe (mumu wambachile kumi lia mapwo ni mapwo nake, ni wapwile ni makumi asambano a *akonkubina. Yasema no makumi aali a ana a malunga ni ana a malunga nake; ni makumi asambano a ana a mapwo.)

²² Rehoboame yasa Abija mwana Maka akapwe mukwa lutwe hakachi ka akwo, mwe mulemu; mumu wazangile kumuswanyisa wanangana.

²³ Yalinga ni mana; yamwanga anenyi a malunga mu yifuchi yeswe ya Yunda ni Mbenjamine mu yihunda yeswe ya kukolesa. Yaaha kulia chinji, ni kwafupila mapwo anji.