2 Sango Ja Mianangana 10 - MUKANDA USANDU WA ZAMBI 1975

¹ Rehoboame yaya ku Shekeme mumu A-Izalele eswe haneza ku Shekeme kumupwisa mwanangana.

² Mba muze Jeroboame mwana Nebate wachivwile (mumu te mu Engitu ali; hachinyinako kumeso ja mwanangana Solomone), Jeroboame yakatuka ku Engitu.

³ Yatuma kumusaka, mba Jeroboame yeza hamwe ni A-Izalele eswe. Yamba kuli Rehoboame ngwo,

⁴ Tatenu atulemene kanga yilemu. Kashika lelwisenu kama ungamba ulemu wa tatenu ni kanga yenyi yilemu yize atulemene, mba mutunuvumbika.

⁵ Aye yamba kuli ayo ngwenyi, Swilenu kuno kuli yami nawa kulutwe lia matangwa atatu. Mba atu yaya.

⁶ Mwanangana Rehoboame yafupa mana kuli makulwana aze amanyine kumeso ja tato Solomone shimbu achili ni mwono, ngwenyi, Ngwehenu mana ngukakumbulule wano atu.

⁷ O yamukumbulula ngwo, Nyi muopwa ni utu kuli wano atu, nikwatomesa mbunge, nikuhanjika no maliji apema, kumakapwa tuvumbi twe twa mutolo.

⁸ Alioze yambila mana a makulwana aze hamwaha; yahula mana kuli akweze aze atatukile hamuwika nenyi, amanyine kumeso jenyi.

⁹ Yamba kuli ayo ngwenyi, Ngwehenu mana ngukakumbulule wano atu hahanjika ni yami ngwo, Lelwisenu kama kanga yize tatenu watulemene.

¹⁰ Akweze aze atatukile hamuwika nenyi yamba kuli iye ngwo, Wano atu hamba ngwo, Tatenu walemesene kanga yetu, alioze yena hapwa nuyilelwise. Nwakumbulule ngwenu, Munwe wami wa songo Wahiana mujimba weswe wa tata.

¹¹ Kashika haze tata wanulemene kanga yilemu ami munguweza ku kanga yenu. Tata wanulambile ni shikote alioze ami mungunulamba ni tuvwanda.

¹² Chocho Jeroboame ni e atu yeza kuli Rehoboame ha tangwa liamuchitatu nikulita ni liji lia mwanangana ngwenyi, Swilenu kuno kuli yami nawa ha tangwa liamuchitatu.

¹³ Mba mwanangana yaakumbulula ni liji lia tachi ni mwanangana Rehoboame yambila mana a makulwana.

¹⁴ Yahanjika no nikulita ni mana ja akweze ngwenyi, Tata walemesene kanga yenu alioze ami munguwezaho. Tata wanulambile ni shikote, alioze ami mungunulamba ni tuvwanda.

¹⁵ Chocho mwanangana kapanjikile kuli atu, mumu chuma chino chalingiwile kuli Zambi hanga Yehova akakolese liji lienyi lize ahanjikile ku kanwa lia Ahija Ka-Shilone kuli Jeroboame mwana Nebate.

¹⁶ Muze A-Izalele eswe amwene mwanangana kaapanjikile, akumbulwile mwanangana ngwo, Te chihanda tuli nacho muli David? Kutushi chihinga muli mwe mwana Yese. A-Izalele, yénu ku mazuwo jenu! Ni yena David hitala ku yuma ya zuwo lia yena mwene. Chocho A-Izalele eswe yaya ku mazuwo jo.

¹⁷ Alioze Rehoboame wayulile helu lia A-Izalele aze atwamine mu yihunda ya Yunda.

¹⁸ Mwanangana Rehoboame yatuma Handorame mukwa kuyula ungamba, alioze A-Izalele yamwasa mawe, yafwa. Mba mwanangana Rehoboame yazomboka; yanyina mu temba lienyi lia jita; yachinyina ku Yerusaleme.

¹⁹ Chocho A-Izalele yakatukila munyachi wa David ndo musono.