2 Sango Ja Mianangana 1 - MUKANDA USANDU WA ZAMBI 1975

¹ Solomone, mwana David, amutakamishine mu wanangana wenyi, ni Yehova Zambi yenyi wapwile hamwe nenyi nikumutohesa kuhiana.

² Solomone yahanjika ni A-Izalele eswe; kuli tupitau twa kanunu ni kanunu, ni tupitau twa kulakaji ni kulakaji, ni kuli ngaji, ni kuli alemu eswe mweswe mu Izalele, akwa lutwe mu minyachi ya atato.

³ Chocho Solomone ni chikungulwila cheswe hamwe nenyi yaya ku nangamo lize liapwile mu Ngibeone; mumu kwenako kwapwile mbalaka ya Zambi ya chikungulwila, yize kavumbi ka Yehova Mose alingile mu puya.

⁴ Alioze mushete wa Zambi, David te wauchijile ku Kiriate-Yerimi nikuuneha kuma kuze iye haululikila, te hautungila mbalaka mu Yerusaleme.

⁵ Chikwo nawa chilumbilo cha unengu, chize Mbezalele mwana Uri mwana Hure watungile, chatwamineko kulutwe lia tabernakulu ya Yehova. Ni Solomone ni chikungulwila kwenako yakundamina kuli Yehova.

⁶ Solomone wakandukile ku chilu mbilo cha unengu kumeso ja Yehova ku mbalaka ya chikungulwila. Yalambwilaho kanunu ka milambu ya kulumba.

⁷ Ufuku uze Zambi yasoloka kuli Solomone; yamba kuli iye ngwenyi, Tongola chize mungukwaha.

⁸ Solomone yamba kuli Zambi ngwenyi, Walingile utu wa zango unene kuli tata David, mba hiwangupwisa mwanangana kumusalakana.

⁹ Kashika, Yehova Zambi, kolesa chilakenyo che kuli tata David; mumu hiwangupwisa mwanangana wa vungu limwe liapwa ngwe fufuta ha kwoka.

¹⁰ Kashika ungwehe mana ni chinyingi ngukahase kutuhuka ni kunjila kanawa kumeso ja vungu lino; mumu iya mahasa kuyula wano atu je alemu Chichize?

¹¹ Zambi yamba kuli Solomone ngwenyi, Ha mukunda wa chuma chino mu mbunge ye; kwechile upite, hanji yikumba, hanji ulemu, hanji akashihe akwa kole je, kwechile kusuha cha miaka ye, alioze hiweta mana ni chinyingi hali yena mwene hanga ukayule atu jami nakupwishile mwanangana wo;

¹² kashika ngunakwehe mana ni chinyingi; alioze mungukwaha upite, ni yikumba, ni ulemu, kuhiana ya mianangana a kushi, chipwe mianangana aze makukaula kechi kupwa nayo.

¹³ Chocho Solomone yakatuka ku nangamo lia mu Ngibeone kumeso ja mbalaka ya chikungulwila, yeza ku Yerusaleme; mba wayulile A-Izalele.

¹⁴ Solomone yokesa matemba-a-jita ni akwa tuvwalu. Wapwile ni kanunu ka matemba ni kulakaji awana a matemba, ni kumi lia tununu ni tununu aali a akwa tuvwalu mu yihunda ya matemba ni hamuwika ni mwanangana mu Yerusaleme.

¹⁵ Mwanangana wapwishile prata ni oru mu Yerusaleme ngwe mawe, ni mitondo ya sedru wapwishile ngwe misuwa ya ha yikulo mumu ha kwoka.

¹⁶ Tuvwalu a Solomone aalanjile mu Engitu. Akwa kulanda a mwanangana aatambwile mu matanga, tanga ndando Chinganji, tanga ndando Chinganji.

¹⁷ Asakile ku Engitu temba-lia-jita ha ndando ya kulakaji asambano a shekele ja prata, ni kavwalu umuwika ha ndando ya kulakaji ni makumi atano. Chocho mianangana eswe a A-Hete ni mianangana a A-Seria apwile nikulanda kuli ayo.