2 Samuel 9 - MUKANDA USANDU WA ZAMBI 1975

¹ David yamba ngwenyi, Hindu kwasala umwe a ku munyachi wa Saulu hanga ngumulinge vumbi mumu hali Jonatas nyi?

² Kwapwile umwe kavumbi wa A-Saulu jina lienyi Ziba. Yangusanyika eze kuli David. Mwanangana yamuhula ngwenyi, Mwe Ziba yena? Iye yakumbulula ngwenyi, Yami kavumbi kenu.

³ Mwanangana yamba ngwenyi, Kukwasalile chipwe umuwika wa kuli A-Saulu ngumulweze vumbi lia Zambi nyi? Ziba yamba kuli mwanangana ngwenyi, Kwali hindu umwe mwana wa Jonatas, chitonji ku molu jenyi.

⁴ Mwanangana ngwenyi, Kulihi ali? Ziba yamba kuli mwanangana ngwenyi, Mu zuwo lia Makire mwana Amiele mu Lo-Devale.

⁵ Mba mwanangana David yatuma, yamusaka ku zuwo lia Makire mwana Amiele ku Lo-Devale.

⁶ Mefiposhete, mwana Jonatas, mwana Saulu, yeza kuli David, yafulamana hashi, yamuwayila. David yamba ngwenyi, Mefiposhete. Iye yakumbulula ngwenyi, Yami kavumbi kenu.

⁷ David yamba kuli iye ngwenyi, Kanda wivwa woma, mumu pundu mungukulinga vumbi mumu hali tatenu Jonatas. Mungukwaha minda yeswe ya kakenu Saulu. Kumuolia ku mesa yami matangwa eswe.

⁸ Iye yawayila nawa. Yamba ngwenyi, Ami kavumbi kenu kuchi napwa, nutale kuli umwe wapwa ngwe kawa mufu?

⁹ Mba mwanangana yasanyika Ziba kavumbi ka Saulu ngwenyi, Yuma yeswe yapwile ya Saulu ni ya akwa munyachi wenyi eswe hinayihana kuli mwana wa mwata we.

¹⁰ Yena mukamulimina ye minda hamuwika ni ana je ni ngambaje. Munukakunga mbuto hanga mwana wa mwata we akapwe ni kulia. Alioze Mefiposhete mwana wa mwata we makalia ku mesa yami matangwa eswe. Ziba te kali ni kumi lia ana a malunga ni ana a malunga atano, ni makumi aali a ngamba.

¹¹ Ziba yamba kuli mwanangana ngwenyi, Yami kavumbi kenu mungulinga nikulita ni maliji eswe a mwene wami mwanangana. Alioze ha kutwala kuli Mefiposhete, mwanangana ngwenyi, Iye kumakalia ku mesa yami ngwe umwe mwana wa mwanangana.

¹² Mefiposhete te kali ni mwana wa lunga jina lienyi Mika. Akwa zuwo lia Ziba eswe apwile ngamba ja Mefiposhete.

¹³ Chocho Mefiposhete Watwamine mu Yerusaleme mumu walile ku mesa ya mwanangana. Iye te chitonji ha molu jenyi eswe ni aali.