2 Samuel 8 - MUKANDA USANDU WA ZAMBI 1975

¹ Kulutwe lia yuma yino David yalamba A-Filistea; yaapokwesa, yachiza chiyulo cha mbala kuli A-Filistea.

² Yalamba A-Moape. Yaapombesa hashi nikwafunjikila mufunda. Yafunjika mifunda yiali ya kushiha, ni mufunda wa muwundu wa kufunga ni mwono. A-Moape yalumuka ngamba kuli David. Yamunehena milambu.

³ David yalamba nawa Hadadezere mwana Rehobo, mwanangana wa Zoba, shimbu machiya kukolesa chiyulo chenyi ku lwiji Ufrateze.

⁴ David yatambula kuli iye kanunu ka akwa tuvwalu ni kulakaji shimbiali a akwa tuvwalu, ni makumi aali a tununu a maswalale a kwenda hashi. Tuvwalu eswe a matemba-a-jita David yaateta mijipa, yafunga tuvwalu kukoka kulakaji lia matemba-a-jita.

⁵ Muze A-Seria a ku Ndamaseku yeza kukwasa Hadadezere, mwanangana wa Zoba, David yashiha makumi aali a tununu ni tununu aali a A-Seria.

⁶ David yasa maswalale mu Seria ya Ndamaseku. A-Seria yalumuka ngamba kuli David. Yamunehena milambu. Kweswako David yatalikisa, Yehova yamwaha kukumba.

⁷ David yatambula kepwe ja oru ja atu a Hadadezere, yajineha ku Yerusaleme.

⁸ Ku Mbeta ni ku Berotai membo a Hadadezere, mwanangana David yachizako unengu wunji chikolo.

⁹ Muze Toi mwanangana wa Hamate evwile ngwo, David hashiha tujita eswe a Hadadezere,

¹⁰ Toi yatuma mwanenyi Jorame kuli mwanangana David kumumeneka, ni kumuwahisa, mumu hasa jita ni Hadadezere hamukumba. Mumu te Hadadezere wapwile nikwasa jita ni Toi. Jorame yaneha yikwachilo ya prata, ni yikwachilo ya oru, ni yikwachilo ya unengu.

¹¹ Yino nawa mwanangana David yatumbikila kuli Yehova hamuwika ni prata ni oru yize yatumbikila va ku mavungu eswe haakumba,

¹² ya Seria, ni Moape, ni A-Amone, ni A-Filistea, ni A-Amaleke, ni upite wa Hadadezere mwana Rehobo, mwanangana wa Zoba.

¹³ Jina lia David liafumanyine muze hahiluka ha kushiha A-Seria mu Chikulo cha Mungwa. Te kumi lia tununu ni tununu nake a malunga aashihile.

¹⁴ Yasa maswalale mu Endome. Ndusu mu Endome mweswe yasa maswalale, mba A-Endome eswe yalumuka ngamba kuli David. Kweswako David yatalikisa Yehova yamwaha kukumba.

¹⁵ David wapwile mwanangana wa A-Izalele eswe. David wayulile ni wapatwilile atu jenyi eswe.

¹⁶ Joabe mwana Zeluia wapwile kapitau ka tujita eswe. Yehosofate mwana Ahilude wapwile mukwa kusoneka yuma ya wanangana.

¹⁷ Zadoke mwana Ahitube, ni Ahimeleke mwana Abiatare, apwile asasendote. Seraia wapwile mukwa kusoneka mikanda.

¹⁸ Benaia mwana Jehoiada wayulile A-Cherete ni A-Pelete. Ana a David a malunga apwile asasendote.